ព័ត៌មានអន្ដរជាតិ

ការនាំចេញរបស់ថៃ កើនដល់ជាង ២៧ ប៊ីលានដុល្លារ ខ្ពស់បំផុតក្នុងរយៈពេល ១៩ ខែ

បានផុស

៧ ខែ មុន

នៅ

ថ្ងៃសុក្រ ២៩ វិច្ឆិកា ២០២៤

ដោយ

ប្រធានការិយាល័យគោលនយោបាយ និងយុទ្ធសាស្ត្រពាណិជ្ជកម្មថៃ (TPSO) លោក Poonpong Naiyanapakorn បានឱ្យដឹងថា ការនាំចេញរបស់ប្រទេសប្រចាំខែតុលា បានឈានដល់ ២៧,២២ ប៊ីលានដុល្លារ ដោយកើនឡើង ១៤,៦ ភាគរយ និងខ្ពស់បំផុតក្នុងរយៈពេល ១៩ ខែ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការនាំចូលប្រចាំខែដូចគ្នា មានចំនួន ២៨,០២ ប៊ីលានដុល្លារ ដោយកើនឡើង ១៥,៩ ភាគរយ និងបង្កើតបានជាឱនភាពពាណិជ្ជកម្មប្រមាណ ៧៩៤,៤ លានដុល្លារ។

លោក Poonpong បានគូសបញ្ជាក់ថា កត្តាជំរុញកំណើនសំខាន់ៗ រួមមានការនាំចេញដែលទាក់ទងនឹងបច្ចេកវិទ្យា ជាពិសេសកុំព្យូទ័រ ឧបករណ៍ពាក់ព័ន្ធ និងគ្រឿងបន្លាស់ ដែលស្ទុះឡើងដោយសារតែការរីកចម្រើនផ្នែកបច្ចេកវិទ្យាឌីជីថល។ កត្តាវិជ្ជមានផ្សេងៗទៀត រួមមានកំណើនតម្រូវការសកលសម្រាប់ផលិតផលកសិកម្ម និងម្ហូបអាហារ និងការថយចុះនៃអតិផរណាក្នុងទីផ្សារនាំចូលផលិតផលថៃសំខាន់ៗ។

បើគិតពីរយៈពេល ១០ ដើមឆ្នាំនេះ ការនាំចេញរបស់ថៃមានតម្លៃប្រមាណ ២៥០,៤ ប៊ីលានដុល្លារ កើនឡើង ៤,៩ ភាគរយ ខណៈការនាំចូលមានប្រមាណ ២៥៧,១៥ ប៊ីលានដុល្លារ ដោយកើនឡើង ៦,៦ ភាគរយ និងបង្កើតបានជាឱនភាពពាណិជ្ជកម្ម ៦,៧៥ ប៊ីលានដុល្លារ។

ទោះជាយ៉ាងណាក៏ដោយ ការនាំចេញរបស់ថៃនៅតែប្រឈមមុខនឹងបញ្ហាប្រឈមជាច្រើន ដូចជាភាពមិនច្បាស់លាស់ជុំវិញគោលនយោបាយពាណិជ្ជកម្មរបស់សហរដ្ឋអាមេរិកនាពេលអនាគត ការប្រែប្រួលអត្រាប្តូរប្រាក់ ជម្លោះភូមិសាស្ត្រនយោបាយដែលកំពុងបន្ត និងការកែប្រែគោលនយោបាយនាំចេញអង្កររបស់ឥណ្ឌា ដែលអាចប៉ះពាល់ដល់ការនាំចេញអង្កររបស់ថៃ ជាដើម។

គេមើលឃើញថា សេដ្ឋកិច្ចដែលដើរអូសជើងរបស់ថៃ កំពុងបន្តប្រឈមនឹងវិបត្តិក្នុងស្រុកផ្សេងៗ ជាពិសេសបំណុលគ្រួសារខ្ពស់ និងកម្សោយនៃតម្រូវការ ក៏ដូចជាផលិតកម្ម។ យ៉ាងណាមិញ វិស័យទេសចរណ៍ និងការនាំចេញ កំពុងដើរតួនាទីសំខាន់ក្នុងការជំរុញកំណើន៕