ព័ត៌មានអន្ដរជាតិ

ត្រាំ ស្នើឱ្យតុលាការកំពូលផ្អាកច្បាប់ ដែលអាចបិទ TikTok នៅអាមេរិក

បានផុស

១ year មុន

នៅ

ថ្ងៃសៅរ៍ ២៨ ធ្នូ ២០២៤

ដោយ

ប្រធានាធិបតីជាប់ឆ្នោតសហរដ្ឋអាមេរិក លោក ដូណាល់ ត្រាំ បានជំរុញឱ្យតុលាការកំពូលរបស់ប្រទេសបញ្ជាឱ្យផ្អាកការអនុវត្តច្បាប់ ដែលអាចបិទវេទិកាបណ្ដាញសង្គម TikTok នៅសហរដ្ឋអាមេរិក ដោយសំអាងថា លោកនឹងប្រើពេលវេលានៅពេលឡើងកាន់អំណាច ដើម្បីស្វែងរកដំណោះស្រាយនយោបាយលើបញ្ហានេះ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តុលាការគ្រោងនឹងបើកសវនាការជជែកដេញដោលក្នុងសំណុំរឿងនេះ នៅថ្ងៃទី ១០ ខែមករា។ ច្បាប់ដដែល តម្រូវឱ្យក្រុមហ៊ុន ByteDance ដែលជាម្ចាស់របស់ TikTok លក់វេទិកានេះឱ្យទៅក្រុមហ៊ុនអាមេរិក បើមិនដូច្នោះទេ វានឹងត្រូវបិទ។ សភាអាមេរិកបានបោះឆ្នោតគាំទ្រការបិទនេះកាលពីខែមេសារួចហើយ លុះត្រាតែ ByteDance សម្រេចចិត្តលក់ឱ្យបានមុនថ្ងៃ ១៩ មករា ពោលគឺមួយថ្ងៃ មុនលោក ត្រាំ ឡើងកាន់អំណាច។

មេធាវីរបស់លោក ត្រាំ លោក John Sauer បានថ្លែងឱ្យដឹងថា៖ «លោកប្រធានាធិបតី ត្រាំ នៅតែប្រកាន់ជំហរអព្យាក្រឹតលើជម្លោះនេះ។ លោកបានស្នើដោយគោរព ឱ្យតុលាការពិចារណាឡើងវិញ ដើម្បីពន្យាកាលកំណត់ហាមឃាត់(TikTok)នៅថ្ងៃ ១៩ មករា ដើម្បីទុកពេលឱ្យរដ្ឋបាល ត្រាំ ដែលនឹងចូលកាន់ការងារ ស្វែងរកដំណោះស្រាយនយោបាយ»។

គួររំឭកថា ការស្នើសុំយ៉ាងដូច្នេះ ធ្វើឡើងក្រោយលោក ត្រាំ បានជួបជាមួយនាយកប្រតិបត្តិក្រុមហ៊ុន TikTok Shou Zi Chew នៅខែធ្នូនេះ។ ការណ៍គួរឱ្យកត់សម្គាល់នោះគឺថា វាផ្ទុយនឹងអ្វីដែលលោកធ្លាប់បានអំពាវនាវក្នុងឆ្នាំ ២០២០ ដែលសុំឱ្យមានការបិទ TikTok នៅសហរដ្ឋអាមេរិក ឬលក់វេទិកានេះឱ្យក្រុមហ៊ុនអាមេរិក។

កន្លងមក ម្ដងហើយម្ដងទៀត អ្នកនយោបាយអាមេរិកលើកឡើងថា រដ្ឋាភិបាលចិនអាចចូលប្រើប្រាស់ទិន្នន័យរបស់អ្នកប្រើប្រាស់ TikTok នៅអាមេរិក ដែលមានអ្នកប្រើប្រាស់សកម្មប្រមាណ ១៧០ លាននាក់ ដែលនឹងបង្កដល់សន្តិសុខជាតិ។ វាជាអ្វីដែលក្រុមហ៊ុន TikTok ច្រានចោល៕