លោក ត្រាំ ថា ខ្វះ​តែមួយម៉ោងទេ ត្រូវវាយ​អ៊ីរ៉ង់ តែ​មាន​អន្តរាគមន៍​ទាន់​ពី​សម្ព័ន្ធមិត្ត

ប្រធានាធិបតីអាមេរិក លោក ដូណាល់ ត្រាំ បាន​បង្ហើប​ឱ្យដឹង​ថា លោកស្ទើរតែបញ្ជាឱ្យមានការវាយប្រហារលើប្រទេសអ៊ីរ៉ង់ឡើងវិញទៅហើយ ពោលគឺ ខ្វះតែមួយម៉ោងទៀតប៉ុណ្ណោះ តែ​ត្រូវពន្យារពេលវិញ ព្រោះ​មានការស្នើសុំពីបណ្តាប្រទេសជាសម្ព័ន្ធមិត្តក្នុងតំបន់។ នេះ​បើ​យោង​តាម​ការ​ចុះផ្សាយ​របស់​សារព័ត៌មាន TRT World នា​ថ្ងៃ​ទី​២០​ ខែ​ឧសភា ឆ្នាំ​២០២៦។

ទោះមាន​ការ​ពន្យារ​ពេល​បែប​នេះ​ក្ដី លោក ត្រាំ បាន​បញ្ជាក់​ថា លោក​​ទុកពេលឱ្យត្រឹមតែ ២ ទៅ ៣ ថ្ងៃទៀតប៉ុណ្ណោះ បើអ៊ីរ៉ង់នៅតែមិនព្រមព្រៀងគ្នា ក្នុងលក្ខខណ្ឌដែលអាចទទួលយកបានទេនោះ អាមេរិកអាចនឹងផ្តល់ «ការវាយប្រហារធំមួយទៀត» ដើម្បីទប់ស្កាត់មិនឱ្យអ៊ីរ៉ង់មានអាវុធនុយក្លេអ៊ែរឡើយ។

ស្របពេលជាមួយគ្នានេះ ខាងភាគីអ៊ីរ៉ង់ឯណោះវិញ ក៏បានបើកកកាយពីព័ត៌មានលម្អិតនៃសំណើថ្មីចំនួន ១៤ចំណុច ដែលខ្លួនបានដាក់ជូនអាមេរិក តាមរយៈប្រទេសប៉ាគីស្ថាន ដែលជាអ្នកសម្របសម្រួល។ អនុរដ្ឋមន្ត្រីការបរទេសអ៊ីរ៉ង់ លោក Kazem Gharibabadi បានបញ្ជាក់ថា សំណើថ្មីនេះ គឺសង្កត់ធ្ងន់លើសិទ្ធិរបស់ខ្លួន ក្នុងការចម្រាញ់សារធាតុអ៊ុយរ៉ាញ៉ូម សម្រាប់ប្រើប្រាស់ក្នុងផ្លូវសន្តិភាព។ ក្រៅពីនេះ អ៊ីរ៉ង់បានទាមទារឱ្យមានការបញ្ចប់ជម្លោះ នៅគ្រប់សមរភូមិទាំងអស់ រួមទាំងនៅ​ប្រទេស​លីបង់ ឱ្យអាមេរិកដកការបិទខ្ទប់ផ្លូវទឹក ព្រមទាំងសងការខូចខាត ដែលកើតឡើងដោយសារសង្គ្រាម កាលពីចុង​ខែកុម្ភៈ ដើម្បីយកថវិកាមកស្តារប្រទេសឡើងវិញ ថែមទាំង​ទាមទារ​ឱ្យ​ដកទ័ពអាមេរិកចេញពីតំបន់ជុំវិញទីក្រុងតេហេរ៉ង់ទៀតផង។

ដ្បិត​​លក្ខខណ្ឌរបស់អ៊ីរ៉ង់មើលទៅហាក់ដូចជាតឹងរ៉ឹង ហើយលោក ត្រាំ ធ្លាប់បានបដិសេធថា មិនអាចទទួលយកបានក៏ដោយ ក៏​អនុប្រធានាធិបតីអាមេរិក លោក JD Vance បានប្រាប់អ្នកសារព័ត៌មានបែបលួងលោមវិញថា កិច្ចចរចារវាងប្រទេសទាំងពីរ មានការវិវត្តទៅមុខបានច្រើនហើយ ហើយលោកជឿថា មិនមានខាងណា ចង់ឃើញការផ្ទុះអាវុធដាក់គ្នាឡើងវិញនោះទេ។

គួររំលឹកផងដែរថា ភាពតានតឹងនេះ បានឈានដល់ចំណុចប្រកាសអាសន្ន បន្ទាប់ពីអាមេរិក បានដាក់ទណ្ឌកម្មបិទខ្ទប់កំពង់ផែរបស់អ៊ីរ៉ង់ កាលពីពាក់កណ្តាលខែមេសា ដែលធ្វើឱ្យអ៊ីរ៉ង់ឆ្លើយតបវិញ ដោយការបិទច្រកសមុទ្រយុទ្ធសាស្ត្រហ័រមូស (Hormuz)។ នៅពេលនេះ ពិភពលោកកំពុងអ៊ុតមើលយ៉ាងអន្ទះសារថា តើកិច្ចព្រមព្រៀងសន្តិភាព អាចនឹងលេចរូបរាងឡើងនៅក្នុងសប្តាហ៍នេះ ឬមួយក៏តំបន់មជ្ឈិមបូព៌ា ត្រូវធ្លាក់ក្នុងសង្គ្រាមដ៏ធំមួយទៀត តាមបញ្ជារបស់លោក ត្រាំ៕

ប្រែសម្រួល៖ ឈាង