ព័ត៌មានអន្ដរជាតិ

ឥណ្ឌូណេស៊ីចង់ជំរុញការអភិវឌ្ឍឧស្សាហកម្មហ្គាសក្នុងស្រុក ដើម្បីកាត់បន្ថយការនាំចូល

បានផុស

១ year មុន

នៅ

ថ្ងៃចន្ទ ២០ មករា ២០២៥

ដោយ

រដ្ឋមន្ត្រីក្រសួងថាមពល និងធនធានរ៉ែឥណ្ឌូណេស៊ី លោក Bahlil Lahadalia បានសង្កត់ធ្ងន់ពីតម្រូវការនៃការអភិវឌ្ឍឧស្សាហកម្មហ្គាស (LPG) ក្នុងស្រុក ដើម្បីកាត់បន្ថយការនាំចូល។ នេះបើតាមការចុះផ្សាយរបស់ទីភ្នាក់ងារសារព័ត៌មានរដ្ឋ Antara ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានថ្លែងកាលពីថ្ងៃសុក្រសប្ដាហ៍មុនថា៖ «យើងត្រូវអភិវឌ្ឍឧស្សាហកម្ម LPG ដោយប្រើប្រាស់ឧស្ម័ន C3 (ប្រូប៉ាន) និង C4 (ប៊ុយតាន) ហើយយើងក៏ត្រូវការជំរុញបណ្តាញហ្គាសក្នុងផ្ទះ ដើម្បីផ្គត់ផ្គង់តម្រូវការរបស់មនុស្សផងដែរ»។

លោករដ្ឋមន្ត្រីដដែលបន្តថា ការប្រើប្រាស់ហ្គាសក្នុងស្រុកក្នុងឥណ្ឌូណេស៊ី មានប្រហែល ៨ លានតោន/ឆ្នាំ យ៉ាងណាមិញ ឧស្សាហកម្មក្នុងស្រុក ផលិតបានត្រឹមតែ ១,៤ លានតោន/ឆ្នាំ ប៉ុណ្ណេះ។ ដូច្នេះ ឥណ្ឌូណេស៊ីត្រូវនាំចូលហ្គាស ប្រមាណពី ៦-៧ លានតោន ជារៀងរាល់ឆ្នាំ ដែលបណ្ដាលឱ្យលោកប្រធានាធិបតី ប្រាបូវូ ស៊ូប៊ីយ៉ានតូ ជំរុញកិច្ចប្រឹងប្រែងកាត់បន្ថយការនាំចូល។

លោក Lahadalia បានពន្យល់ថា ការអភិវឌ្ឍឧស្សាហកម្មហ្គាសមានសារៈសំខាន់ក្នុងការរក្សាតុល្យភាពសេដ្ឋកិច្ច និងបង្រួមឱនភាពនៅក្នុងសមតុល្យពាណិជ្ជកម្ម និងរូបិយវត្ថុអន្តរជាតិ។

បច្ចុប្បន្ននេះ ឥណ្ឌូណេស៊ីចំណាយប្រាក់អន្តរជាតិយ៉ាងច្រើនលើការនាំចូលហ្គាស ប្រហែល ២៧,៥ ប៊ីលានដុល្លារ/ឆ្នាំៗ ដើម្បីទិញប្រេង និងឧស្ម័ន រួមទាំងហ្គាស LPG ផងដែរ។ តួលេខនេះមានផលប៉ះពាល់ដោយផ្ទាល់ទៅលើសមតុល្យពាណិជ្ជកម្ម និងការទូទាត់របស់ប្រទេស ដែលទាមទារឱ្យមានការអភិវឌ្ឍក្នុងស្រុកដើម្បីដោះស្រាយ៕