ព័ត៌មានអន្ដរជាតិ

អតីតនាយករដ្ឋមន្រ្តីថៃ លោក ថាក់ស៊ីន ប្ដេជ្ញាស្ដារសេដ្ឋកិច្ចប្រទេស

បានផុស

១ year មុន

នៅ

ថ្ងៃព្រហស្បតិ៍ ៣០ មករា ២០២៥

ដោយ

អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រា បានសន្យាកាលពីថ្ងៃពុធថា បានសន្យាលះបង់ខ្លួនក្នុងរយៈពេល ៣ ឆ្នាំខាងមុខ ដើម្បីស្តារឡើងវិញនូវសេដ្ឋកិច្ចប្រទេស ដែលទ្រុធទ្រោមដោយសារតែអ្នកកាន់កាប់ជំនាន់ចាស់គ្រប់គ្រងមិនល្អ។ នេះបើតាមការចុះផ្សាយរបស់កាសែតបាងប៉ុស្តិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ថាក់ស៊ី ដែលជាឪពុករបស់អ្នកស្រីនាយករដ្ឋមន្រ្តី ផែតងតាន ស៊ីណាវ៉ាត្រា បានធ្វើការប្ដេជ្ញានេះ នៅពេលថ្លែងទៅកាន់ហ្វូងមនុស្ស នៅស្រុក Phan នៃខេត្ត Chiang Rai ពេលលោកកំពុងជួយឃោសនាឱ្យបេក្ខជនគណបក្សភឿថៃម្នាក់ ក្នុងការប្រកួតប្រជែងការបោះឆ្នោតមូលដ្ឋាន នាថ្ងៃទី ១ កុម្ភៈខាងមុខ។

លោកបានលើកឡើងថា៖ «សេដ្ឋកិច្ចបានដួលរលំទូទាំងប្រទេស។ ខណៈប្រាក់ចំណូលរបស់ប្រជាជនត្រូវបាត់បង់ ប្រាក់ចំណេញរបស់ធនាគារពាណិជ្ជកម្មឯណោះវិញ បានកើនឡើង ១៤ ភាគរយ ធៀបនឹងកំណើន ៣ ភាគរយ នៃ GDP (ផលិតផលក្នុងស្រុកសរុប) ដែលបង្ហាញពីអតុល្យភាពសេដ្ឋកិច្ចបណ្តាលមកពីការគ្រប់គ្រងមិនត្រឹមត្រូវពីមុន»។ អតីតនាយករដ្ឋមន្រ្តីថៃដដែល អះអាងថា សេដ្ឋកិច្ចថៃបច្ចុប្បន្ន គឺអាក្រក់ជាងអំឡុងវិបត្តិហិរញ្ញវត្ថុអាស៊ីឆ្នាំ ១៩៩៧ ទៅទៀត។

ជាមួយគ្នានោះ លោក ថាក់ស៊ីន គូសបញ្ជាក់ថា អ្នកស្រី ផែតងតាន នៅតែជានាយករដ្ឋមន្រ្តីថៃពេញទី ហើយលោកគ្រាន់តែផ្ដល់ការគាំទ្រពីក្រោយឆាក ដើម្បីជួយដល់កិច្ចខិតខំប្រឹងប្រែងស្ដារសេដ្ឋកិច្ចឡើងវិញរបស់រដ្ឋាភិបាលប៉ុណ្ណោះ។

លោកបានសន្យាថា ក្នុងរយៈពេល៣ឆ្នាំខាងមុខ លោកនឹងលះបង់ខ្លួនឯងក្នុងការដោះស្រាយបញ្ហាសេដ្ឋកិច្ច និងស្តារភាពរុងរឿងឡើងវិញ ស្រដៀងទៅនឹងកាលដែលលោកធ្វើជានាយករដ្ឋមន្ត្រីរបស់ប្រទេសដែរ ដែលកាលនោះ «ថៃមានកំណើនសេដ្ឋកិច្ចយ៉ាងឆាប់រហ័ស»។

ជាផ្នែកនៃកិច្ចខិតខំប្រឹងប្រែងដើម្បីស្តារសេដ្ឋកិច្ចឡើងវិញ លោក ថាក់ស៊ីន ថា រដ្ឋាភិបាលគ្រោងនឹងពង្រីកការនាំចេញផលិតផលកសិកម្មទៅកាន់ប្រទេសចិន ដែលថ្មីៗនេះបានយល់ព្រមទិញដំឡូងមីចំនួន ៣០០ ០០០ តោន ដែលធ្វើឱ្យតម្លៃកើនឡើង។ លោកក៏បានប្ដេជ្ញាថានឹងស្វែងរកមធ្យោបាយជំរុញតម្លៃដំណាំផ្សេងៗទៀត រួមទាំងស្រូវ និងកៅស៊ូជាដើម៕