ព័ត៌មានអន្ដរជាតិ

ត្រាំ មិនខ្វល់ពីគម្រោង EU ដែលហាមឃាត់ការនាំចូលស្បៀងពីអាមេរិក

បានផុស

១ year មុន

នៅ

ថ្ងៃចន្ទ ១៧ កុម្ភៈ ២០២៥

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ កាលពីថ្ងៃអាទិត្យបាននិយាយក្នុងឥរិយាបទមិនខ្វល់ខ្វាយ ចំពោះសេចក្ដីរាយការណ៍ដែលថា សហភាពអឺរ៉ុប (EU) កំពុងជំរុញលើការហាមឃាត់ការនាំចូលសណ្ដែកសៀង និងទំនិញស្បៀងផ្សេងៗទៀតពីសហរដ្ឋអាមេរិក ចំពេលដែលភាពតានតឹងនៃទំនាក់ទំនងរវាងសម្ព័ន្ធទាំង២បានកើនឡើង ទាំងផ្នែកនយោបាយ និងពាណិជ្ជកម្ម។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងទៅកាន់អ្នកសារព័ត៌មានក្រោយចូលរួមការប្រណាំងរថយន្ត Daytona 500 ក្នុងរដ្ឋហ្វ្លរីដា លោក Trump បានគូសបញ្ជាក់ជាថ្មីថា សហរដ្ឋអាមេរិកកំពុងប្រកាន់ខ្ជាប់នូវផែនការរបស់ខ្លួនក្នុងការចាប់ផ្តើមអនុវត្ត «ពន្ធគយឆ្លើយតបឱ្យស្មើភាពគ្នា» ដែលសំដៅលើពន្ធដាក់លើទំនិញនៃប្រទេសដទៃ ក្នុងអត្រាដែលប្រទេសដទៃដាក់លើទំនិញរបស់អាមេរិក។

លោកថ្លែងចំពោះផែនការរបស់សហភាពអឺរ៉ុបយ៉ាងដូច្នេះថា៖ «មិនអីទេ ខ្ញុំមិនប្រកាន់ទេ។ ឱ្យពួកគេធ្វើចុះ។ ឱ្យពួកគេធ្វើ វាគ្រាន់តែធ្វើឱ្យពួកគេរងផលប៉ះពាល់ប៉ុណ្ណោះ»។

គួររំឭកថា កាលពីថ្ងៃអាទិត្យផងដែរថា កាសែត Financial Times បានរាយការណ៍ថា គណៈកម្មការអឺរ៉ុបនឹងយល់ព្រមនៅសប្តាហ៍ក្រោយ ដើម្បីសម្រេចការកំណត់ការនាំចូលដ៏តឹងរ៉ឹងលើទំនិញស្បៀងមួយចំនួន ដោយធ្វើឡើងតាមស្តង់ដារផ្សេងៗគ្នា ក្នុងកិច្ចខិតខំប្រឹងប្រែងដើម្បីការពារកសិកររបស់អឺរ៉ុប ដោយលើកឡើងផងដែរចំពោះគោលនយោបាយពាណិជ្ជកម្មស្មើភាពគ្នារបស់លោក ត្រាំ។

របាយការណ៍បានដដែលថា គោលដៅដំបូងនៃគម្រោងរបស់ប្លុក អាចរាប់បញ្ចូលទាំងដំណាំរបស់សហរដ្ឋអាមេរិក ដូចជាសណ្តែកសៀងដែលដាំដុះដោយប្រើថ្នាំសម្លាប់សត្វល្អិត ខណៈកសិករសហភាពអឺរ៉ុបមិនត្រូវបានអនុញ្ញាតឱ្យប្រើប្រាស់។

ជុំវិញបញ្ហានេះ មន្ត្រីសេតវិមានម្នាក់បានប្រាប់រ៉យទ័រថា លោក ត្រាំ កំពុងប្រយុទ្ធដើម្បីពាណិជ្ជកម្មដោយយុត្តិធម៌ និងស្មើភាពគ្នាទៅវិញទៅមក ហើយនឹងក្រោកឈរឡើងសម្រាប់កសិករអាមេរិក។

គួរគូសបញ្ជាក់ថា ភាពតានតឹងរវាងសហរដ្ឋអាមេរិក និងសហភាពអឺរ៉ុបកំពុងកើនឡើង បន្ទាប់ពីលោក ត្រាំ ប្រកាសដាក់ពន្ធ ២៥ ភាគរយ លើដែកថែប និងអាលុយមីញ៉ូមចាប់ពីថ្ងៃទី ១២ មីនាពន្ធឆ្លើយតបឱ្យស្មើភាពគ្នាពីខែមេសា និងពន្ធដាច់ដោយឡែកមួយចំនួនទៀតលើរថយន្ត ឱសថ និងបន្ទះឈីប។ ខណៈបង្ហាញពីទំនោរលើការចរចា សហភាពអឺរ៉ុបក៏បានប្រកាសថានឹងវាយបកជាមួយនឹងវិធានការពន្ធផងដែរ។ ក្រៅពីនេះ ទំនាក់ទំនងរវាងសម្ព័ន្ធមិត្តទាំង២ ក៏រង្គុះរង្គើជុំវិញបញ្ហាសន្តិសុខ និងការពារជាតិផងដែរ ជាពិសេសលើបញ្ហាអ៊ុយក្រែន៕