ព័ត៌មានជាតិ

គណនីអ៊ីវ៉ាឡេតរបស់កម្ពុជាកើនដល់ ២០,៧ លាន និង អេចឃ្យូអរកូតអាជីវកម្មកើនដល់ ៤,៥លានគណនី ក្នុងឆ្នាំ២០២៤

បានផុស

១ year មុន

នៅ

ថ្ងៃអង្គារ ២៥ កុម្ភៈ ២០២៥

ដោយ

ធនាគារជាតិនៃកម្ពុជា (NBC) បានឱ្យដឹងថា គណនីអ៊ីវ៉ាឡេតកើនដល់ ២០,៧ លានគណនី និងចំនួនពាណិជ្ជករដែលចុះឈ្មោះប្រើប្រាស់ខេអេចឃ្យូអរកូតកើនដល់ ៤,៥លានគណនី ដែលបង្ហាញអំពីការរីកចំរើនយ៉ាងឆាប់រហ័សនៃការទូទាត់តាមប្រព័ន្ធអេឡិចត្រូនិកនៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍ប្រចាំឆ្នាំរបស់ NBC ចេញផ្សាយកាលពីសប្តាហ៍មុន ចំពោះការទូទាត់តម្លៃធំតាមប្រព័ន្ធធនាគារអេឡិចត្រូនិក (OBS) សរុបមាន៨២,៨ ពាន់ប្រតិបត្តការ ស្មើនឹង ៥០៧,៦ ទ្រីលានរៀលកើនឡើងជិត៣១%ធៀបនឹងឆ្នាំ២០២៣ ខណៈប្រព័ន្ធទូទាត់រាយតាមរយៈប្រព័ន្ធរីធេលផេ (Retail Pay) ជាប្រាក់រៀលមានចំនួន៧ពាន់ប្រតិបត្តិការថយចុះជាង៥៨%ធៀបនឹងឆ្នាំ២០២៣ និងទំហំព្រាក់ទូទាត់២៣៥,៧ប៊ីលានរៀលថយចុះជាង៤៦% ខណៈដែលប្រតិបត្តិការជាប្រាក់ដុល្លារមានចំនួន១៩ពាន់ប្រតិបត្តិការថយចុះជិត៥៩% និងទំហំប្រាក់ទូទាត់១២៩,៦លានដុល្លារថយចុះជិត៣៩%។

លោកស្រីបណ្ឌិត ជា សិរី ទេសាភិបាលនៃ NBC បានលើកឡើងថា ស្របតាមនវានុវត្តន៍បច្ចេកវិទ្យា និងគោលនយោបាយរបស់រាជរដ្ឋាភិបាលក្នុងការជំរុញសេដ្ឋកិច្ច និងសង្គមឌីជិថល ប្រព័ន្ធទូទាត់សងប្រាក់ទាំងតម្លៃរាយ និងតម្លៃធំ ត្រូវបានធ្វើទំនើបកម្មជាលំដាប់។

លោកស្រីបណ្ឌិតថ្លែងថា៖« ការអភិវឌ្ឍហេដ្ឋារចនាសម្ព័ន្ធប្រព័ន្ធទូទាត់សងប្រាក់ បានសម្រួលដល់ការទូទាត់ពាណិជ្ជកម្ម និងសកម្មភាពសេដ្ឋកិច្ចទាំងក្នុងប្រទេសនិងក្នុងតំបន់ ព្រមទាំងបានរួមចំណែកជំរុញបរិយាបន្នហិរញ្ញវត្ថុទៀតផង។ កម្មវិធីទូទាត់បាគងទេសចរត្រូវបានដាក់ឱ្យដំណើការ ដើម្បីរួមចំណែកលើកកម្ពស់វិស័យទេចរណ៍ ដោយអនុញ្ញាតឱ្យភ្ញៀវទេចរអន្តរជាតិអាចធ្វើប្រតិបត្តិការទូទាត់ទំនិញ និងសេវាតាមឃ្យូអរកូត»។

លោក តូច ចៅចេក ប្រធាននាយកប្រតិបត្តិធនាគារប្រៃសណីយ៍កម្ពុជា បានថ្លែងប្រាប់កម្ពុជាថ្មីនៅថ្ងៃទី២៥ ខែកុម្ភៈនេះថា នៅក្នុងយុគសម័យនេះ គឺជាសម័យកាលនៃការប្រើប្រាស់ប្រព័ន្ធបច្ចេកវិទ្យាឌីជីថល ការណ៍នេះបណ្តាគ្រឹះស្ថានធនាគារ និងហិរញ្ញវត្ថុនានាត្រូវតែធ្វើការវិនិយោគលើឌីជីថល មិនថាតូច ឬធំនោះទេ ប៉ុន្តែនៅក្នុងសហគមន៍ឬទីជននបទ អ្នកប្រើប្រាស់ហាក់នៅមិនទាន់មានការចាប់អារម្មណ៍ខ្លាំងនៅឡើយ។ ជាក់ស្ដែង ធនាគារប្រៃសណីយ៍ ក៏ដូចជាធនាគារដទៃទៀត គឺប្រឹងប្រែងសំដៅធ្វើយ៉ាងណាឱ្យការប្រើប្រាស់ប្រព័ន្ធឌីជីថលកាន់តែមានការរីកចម្រើនខ្លាំងជាបន្តបន្ទាប់។

លោកបានអះអាងទៀតថា៖« «បច្ចុប្បន្នប្រជាពលរដ្ឋមួយចំនួនចាយលុយ គឺសឹងតែលែងកាន់លុយទៀតហើយ ច្រើនតែប្រើ QR ស្គែន ដូច្នេះយើងអាចឃើញបានថា ប្រតិបត្តិការ ស្គែន QR មានការកើនឡើងកាន់តែខ្ពស់ទៅៗ ហើយប្រតិបត្តិការដកលុយតាមបញ្ជរផ្សេងៗមានការថយចុះ បើទោះបីជាទូអេធីអឹមកាន់តែច្រើនក៏ដោយ ប៉ុន្តែប្រតិបត្តិការហាក់មិនសូវរីកចម្រើនដូចការឌីជីថលនោះទេ»។

លោកស្រីបណ្ឌិត ជា សិរីបានថ្លែងបន្តទៀតថា ប្រព័ន្ធទូទាត់សងប្រាក់ត្រូវបានតភ្ជាប់ជាមួយបណ្តាប្រទេសជាច្រើនក្នុងតំបន់ និងក្រុមហ៊ុនផ្តល់សេវាទូទាត់អន្តរជាតិនានាដូចជា ប្រទេសថៃ វៀតណាម ម៉ាឡេស៊ី កូរ៉េខាងត្បូង ក្រុមហ៊ុនយូញៀនផអន្តរិជាតិ អាលីផេ និងក្រុមហ៊ុនបណ្តាញទូទាត់ម៉ាស្ទរ័កាត ជាដើម ដែលបាននិងកំពុងសម្រួលដល់ការធ្វើពាណិជ្ជកម្ម វិនិយោគ និងទេចរណ៍ឱ្យមានភាពងាយស្រួល ឆាប់រហ័ស និងសុវត្ថិភាព៕