ព័ត៌មានជាតិ

ច្រកទ្វារព្រំដែនអន្តរជាតិ ៤ កន្លែង សិក្សាកំណត់ទីតាំងសាងសង់ ប្រើប្រាស់ហិរញ្ញប្បទានធនាគារវិនិយោគហេដ្ឋារចនាសម្ព័ន្ធអាស៊ី

បានផុស

៥ ខែ មុន

នៅ

ថ្ងៃអង្គារ ៤ មីនា ២០២៥

ដោយ

ស្ថានីយច្រកទ្វារព្រំដែនអន្តរជាតិ ៤ កន្លែង កំពុងត្រូវបានសិក្សាដើម្បីកំណត់ទីតាំងសម្រាប់ដំណើរការសាងសង់ ក្រោមគម្រោងជំរុញការតភ្ជាប់ហេដ្ឋារចនាសម្ព័ន្ធច្រកទ្វារព្រំដែន (3CEP) ក្នុងក្របខ័ណ្ឌហិរញ្ញប្បទានធនាគារវិនិយោគហេដ្ឋារចនាសម្ព័ន្ធអាស៊ី (AIIB)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចប្រជុំមួយបានរៀបចំឡើងកាលពីម្សិលមិញនេះ ក្រោមវត្តមានលោក ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន និងក៏មានការចូលរួមពីតំណាងមន្រ្តីមកពីក្រសួងសេដ្ឋកិច្ច និងហិរញ្ញវត្ថុ រួមទាំងអភិបាលនៃគណៈអភិបាលខេត្តទាំង ៤ ដែលពាក់ព័ន្ធមានខេត្តក្រចេះ រតនគិរី តាកែវ និងត្បូងឃ្មុំ ដើម្បីពិនិត្យរបាយការណ៍បឋម និងពិនិត្យពិភាក្សា កំណត់ទីតាំងនិងជំរុញការងារបន្តអនុវត្តរបស់គម្រោងសាងសង់អគារស្ថានីយច្រកទ្វារព្រំដែនឱ្យប្រព្រឹត្តទៅបានដោយរលូន និងទទួលបានជោគជ័យ។

មន្រ្តីដែលបានចូលរួមក្នុងកិច្ចប្រជុំបានឲ្យដឹងថា ការអនុវត្តការងារនេះទាមទារឱ្យមានការបង្កើតក្រុមការងារបច្ចេកទេសចំពោះកិច្ច ដើម្បីចុះសិក្សាស្រាវជ្រាវបន្ថែមអំពីស្ថានភាពទីតាំង ទំហំដីត្រូវការ និងការកាន់កាប់ ស្ថានភាពភូមិសាស្រ្ត ការពិនិត្យមើលលទ្ធភាព និងដីត្រៀមសម្រាប់ការសាងសង់ វិធានការត្រៀមបម្រុងទុកដីសម្រាប់ការចរចារ និងដោះស្រាយផលប៉ះពាល់ផ្សេងៗ។

បើតាមមន្រ្តីក្រសួងសាធារណការ និងដឹកជញ្ជូន ស្ថានីយច្រកទ្វារព្រំដែនអន្តរជាតិ ៤ កន្លែង ដែលកំពុងត្រូវបានសិក្សាដើម្បីកំណត់ទីតាំងសម្រាប់ដំណើរការសាងសង់ ក្រោមគម្រោងជំរុញការតភ្ជាប់ហេដ្ឋារចនាសម្ព័ន្ធច្រកទ្វារព្រំដែន (3CEP) ក្នុងក្របខ័ណ្ឌហិរញ្ញប្បទានធនាគារវិនិយោគហេដ្ឋារចនាសម្ព័ន្ធអាស៊ី (AIIB) មាននៅច្រកកទ្វារអន្តរជាតិត្រពាំងស្រែ ភ្នំដិន ត្រពាំងផ្លុង និងអូរយ៉ាដាវ ដែលស្ថិតនៅក្នុងខេត្តក្រចេះ តាកែវ ត្បូងឃ្មុំ និងរតនគិរី៕