ព័ត៌មានជាតិ

សភាពាណិជ្ជកម្មកម្ពុជា-ក្រុមហ៊ុន កូដីងហ្គេត ចុះ MOU បណ្ដុះបណ្ដាលជំនាញឌីជីថល ក្នុងវិស័យ SMEs

បានផុស

១ year មុន

នៅ

ថ្ងៃសុក្រ ២៨ មីនា ២០២៥

ដោយ

សភាពាណិជ្ជកម្មកម្ពុជា និងក្រុមហ៊ុន កូដីងហ្គេត ថេកណូឡូជីបានចុះ អនុស្សរណៈនៃការយោគយល់គ្នា (MOU) ស្តីពី «កិច្ចសហប្រតិបត្តិការក្នុងការរៀបចំកម្មវិធីបណ្ដុះបណ្ដាលជំនាញឌីជីថលដល់សហគ្រាសធុនតូច និងមធ្យម(SMEs)» ដើម្បីពង្រឹងសមត្ថភាពបនែ្ថមទៀតដល់ម្ចាស់សហគ្រាសទាំងឱ្យធ្វើការស្វែងយល់និងចេះទាញយកអត្ថប្រយោជន៍ពីការប្រើប្រាស់ប្រព័ន្ធបច្ចេកវិទ្យាលើមុខជំនួយរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអនុស្សរណៈរួមគ្នានេះ ធ្វើឡើងនៅថ្ងៃទី២៧ ខែមីនា ឆ្នាំ២០២៥ នៅមជ្ឈមណ្ឌលអភិវឌ្ឍធុរកិច្ច (BDC) ក្នុងគោលបំណង ផ្ដល់នូវចំណេះដឹងឌីជីថលតាមរយៈវគ្គបណ្ដុះបណ្ដាលនានា ដែលរៀបចំឡើងដោយសភាពាណិជ្ជកម្មកម្ពុជា និងក្រុមហ៊ុន កូដីងហ្គេត ថេកណូឡូជី ក៏ដូចជាលើកកម្ពស់ការយល់ដឹងអំពីការធ្វើអាជីវកម្មដោយប្រើប្រាស់បច្ចេកវិទ្យាថ្មីៗ ជាពិសេសប្រព័ន្ធបញ្ញាសិប្បនិម្មិត (AI) ជូនដល់សហគ្រាសធុនតូច និងមធ្យម ដែលជាសមាជិក សមាជិកា សភាពាណិជ្ជកម្មកម្ពុជា។

មិនតែប៉ុណ្ណោះ តាមរយៈ MOU នេះ ក៏នឹងជំរុញឱ្យមានភាពប្រសើរឡើងនូវផលិតភាព និងលើកកម្ពស់ការប្រកួតប្រជែងសម្រាប់អាជីវកម្មនៅក្នុងប្រទេសកម្ពុជា។ ព្រមទាំង ជាការលើកកម្ពស់សមត្ថភាព និងការអនុវត្តបច្ចេកវិទ្យាឌីជីថលថ្មីៗ ដល់សមាជិក សមាជិកា សភាពាណិជ្ជកម្មកម្ពុជា ដែលជាចលករសំខាន់ក្នុងការជំរុញកំណើនសេដ្ឋកិច្ចកម្ពុជា តាមរយៈការប្រើប្រាស់ជំនាញឌីជីថលក្នុងការដឹកនាំ និងប្រតិបត្តិការអាជីវកម្មរបស់ពួកគេផងដែរ៕