ព័ត៌មានជាតិ

កម្ពុជាជំរុញ Brand Name ខ្លួនឯង «ផលិតផ្ទាល់នៅកម្ពុជា» ដើម្បីកសាងអំណាចទិញ

បានផុស

១១ ខែ មុន

នៅ

ថ្ងៃព្រហស្បតិ៍ ២៩ ឧសភា ២០២៥

ដោយ

រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ នៅក្នុងវេទិកាសេដ្ឋកិច្ចកម្ពុជា ក្នុងពន្ធបដិការអាមេរិក បានគូសបញ្ជាក់ថា បច្ចុប្បន្នក្រសួងពាណិជ្ជកម្មបាននិងកំពុងខិតខំជំរុញការបង្កើតយីហោ (Brand Name) ដោយខ្លួនឯង ផលិតផ្ទាល់នៅក្នុងប្រទេសកម្ពុជាដោយខ្លួនឯងឱ្យមានភាពល្បីល្បាញដូចប្រទេសដទៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ប៉ែន សុវិជាតិ បានមានប្រសាសន៍នៅក្នុង «វេទិកាសេដ្ឋកិច្ចកម្ពុជា» របស់កម្ពុជាថ្មីកាលពីពេលថ្មីៗនេះថា ថ្មីៗនេះដើម្បីឆ្លើយតបទៅនឹងការចោទប្រកាន់ និងការព្រួយបារម្ភនានាជុំវិញការជាប់ពន្ធរបស់សហរដ្ឋអាមេរិក ក្រសួងពាណិជ្ជកម្មបានចេញលិខិតអនុញ្ញាតបញ្ជាក់ដើមកំណើតទំនិញមួយទៀត ដែលមិនយកកម្រៃសេវានោះទេ។

លោកថា កន្លងមក ការស្នើសុំវិញ្ញាបនបត្រដើមទំនិញសម្រាប់ការនាំចេញប្រកាសរួមអន្តរក្រសួងហិរញ្ញវត្ថុពាណិជ្ជកម្ម ក្រសួងយកកម្រៃសេវា ប៉ុន្តែចំពោះលិខិតបញ្ជាក់សម្រាប់ទីផ្សារអាមេរិកមិនមានយកកម្រៃសេវានោះទេ គឺក្រសួងពាណិជ្ជកម្មធ្វើជូនឱ្យបានលឿនបំផុតនៅពេលនាំចេញទៅទីផ្សារសហរដ្ឋអាមេរិក។

លោកបានអះអាងថា «កម្ពុជាធ្វើបែបនេះ គឺដើម្បីបញ្ជាក់ពីការយកចិត្តទុកដាក់យ៉ាងខ្លាំងទៅលើប្រភពដើមទំនិញ។ កម្ពុជាចង់បាន Brand Name ដោយខ្លួនឯង ផលិតនៅប្រទេសកម្ពុជាដោយខ្លួនឯង ព្រោះកម្ពុជាចង់ឱ្យការផលិតនៅក្នុងស្រុកដោយខ្លួនឯង មានភាពល្បីល្បាញដូចប្រទេសដទៃដែរ»។

លោកថា «កន្លងការផលិតឡាននៅក្នុងប្រទេសជប៉ុនមិនមានអ្នកខ្វល់ខ្វាយនោះទេ ប៉ុន្តែមួយរយៈពេលមក ម្នាក់ៗរកតែទំនិញផលិតនៅក្នុងប្រទេសជប៉ុន។ ឥឡូវនេះជាក់ស្តែង ការផលិតឡាននៅក្នុងប្រទេសចិន ពីមុនឡានចិនមើលទៅដូចគ្មានគុណភាព ប៉ុន្តែងាកមកមើលបច្ចុប្បន្ន មានការចាប់អារម្មណ៍ច្រើនលើការផលិតរថរបស់ចិន ដូចជា BYD ជាដើមដោយផ្អែកលើកកត្តាតម្លៃសមរម្យ គុណភាព ជាដើម»។ លោក ប៉ែន សុវិជាតិ បន្ថែមបែបនេះ។

លោកបានថ្លែងបន្តទៀតថា ពីមួយថ្ងៃទៅមួយថ្ងៃការកសាង Brand Name នេះ ជាចំណុចមួយសំខាន់ដែលក្រសួងពាណិជ្ជកម្មខិតខំជំរុញ ដោយចង់បានការផលិតនៅកម្ពុជាទាំងផលិតកសិកម្ម ទាំងផលិតផលឧស្សាហកម្មធនស្រាលទាំងទំនិញជាម៉ាកសម្គាល់ភូមិសាស្រ្តទំនិញ គឺកម្ពុជាចង់បាន «Make In Cambodia» ដូច្នេះអ្វីដែលជាគោលដៅនេះហើយដែលជាការបង្កើនការទុកចិត្ត៕