តម្លៃប្រេងអន្តរជាតិ​ហក់ឡើងជាង ៤% ពេលបិទការជួញដូរម្សិលមិញ ជុំវិញជម្លោះអ៊ីស្រាអែល-អ៊ីរ៉ង់

តម្លៃប្រេងបានកើនឡើងជាង ៤ ភាគរយ​ ពេលបិទការជួញដូរនៅថ្ងៃអង្គារម្សិលមិញ ដោយសារតែភាពតានតឹងនៃជម្លោះអ៊ីស្រាអែល-អ៊ីរ៉ង់​ដែលកំពុងបន្ត បើទោះបីជាហេដ្ឋារចនាសម្ព័ន្ធប្រេង និងឧស្ម័នសំខាន់ៗមិនទាន់​រង​ផល​ប៉ះពាល់ខ្លាំងក៏ដោយ។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

​ប្រេងឆៅនាពេលអនាគត ម៉ាក​ Brent បាន​បិទការជួញដូរនៅតម្លៃ ៧៦,៤៥ ដុល្លារ/បារ៉ែល ដោយ​កើនឡើង ៣,២២ ដុល្លារ ឬ ៤,៤ ភាគរយ។ ចំណែកឯប្រេងឆៅអាមេរិក ម៉ាក ​West Texas Intermediate (WTI) បានបញ្ចប់ការជួញដូរក្នុងតម្លៃ ៧៤,៨៤ ដុល្លារ/បារ៉ែល ដោយ​កើនឡើង ៣,០៧ ដុល្លារ ឬ ៤,២៨ ភាគរយ។ ​

ពេលបើកការជួញដូរលើទីផ្សារអាស៊ីនៅព្រឹកថ្ងៃពុធនេះ តម្លៃប្រេងទាំង២ មិនសូវជាមានការប្រែប្រួលប៉ុន្មាននោះទេ ខណៈវិនិយោគិនបន្តមើលស្ថានការណ៍ ជាពិសេសពាក់ព័ន្ធនឹងច្រកដឹកប្រេងដ៏សំខាន់របស់ពិភពលោក Hormuz ដែលជាផ្លូវនាំចេញប្រេងប្រមាណ ១/៥ នៃតម្រូវការសកល។

បើតាមរ៉យទ័រ ទោះបីជាមិនមានការរំខានខ្លាំងដល់លំហូរប្រេងក៏ដោយ ​អ៊ីរ៉ង់​បាន​ផ្អាកដោយផ្នែក​ផលិតកម្មឧស្ម័នធម្មជាតិ​នៅតំបន់ South Pars ​ក្រោយ​ការវាយប្រហាររបស់អ៊ីស្រាអែល បណ្តាលឱ្យមានភ្លើងឆេះនៅទីនោះកាលពីថ្ងៃសៅរ៍។ អ៊ីស្រាអែល​ក៏បាន​កំណត់​គោលដៅ​លើ​ឃ្លាំង​ប្រេង​ Shahran របស់​អ៊ីរ៉ង់​ផងដែរ។

​ចូលដល់ថ្ងៃទី ៦ នៅថ្ងៃពុធនេះ ​អ៊ីស្រាអែល និងអ៊ីរ៉ង់​នៅតែបន្តវាយប្រហារគ្នាតាមអាកាសទៅវិញទៅមក ខណៈលោក ដូណាល់ ត្រាំ ប្រធានាធិបតីអាមេរិក ដែលជាសម្ព័ន្ធមិត្តរបស់អ៊ីស្រាអែល បង្ខំទាមទារឱ្យមេដឹកនាំកំពូលអ៊ីរ៉ង់ចុះចាញ់។

អ្នកវិភាគមើលឃើញថា ជម្លោះរវាងគូសត្រូវមជ្ឈិមបូព៌ាទាំង ២ បង្កជាហានិភ័យភូមិសាស្រ្តនយោបាយសម្រាប់ទីផ្សារប្រេងសកល ដែលធ្វើឱ្យ​តម្លៃហក់ឡើង ដោយសារក្ដីបារម្ភពីការផ្គត់ផ្គង់ប្រេង។ យ៉ាងណាមិញ អ្នកជំនាញខ្លះលើកឡើងថា ហានិភ័យនៃការបិទច្រកប្រេង Hormuz របស់អ៊ីរ៉ង់ អាចមានទាប ដោយសារតែ​ប្រទេសនេះ​នៅតែត្រូវការចំណូល ខណៈសហរដ្ឋអាមេរិក​មិនចង់ឱ្យប្រេងឡើងថ្លៃ ដោយសារតែបញ្ហាអតិផរណាក្នុងស្រុក៕