ហាងឆេងមាសក្នុងស្រុកលក់ចេញក្នុងតម្លៃ ៤០៣ ដុល្លារ មួយជី

តម្លៃមាសបានបើកផ្សារនៅ ៤០២០ ដុល្លារ ក្នុងមួយតម្លឹង នៅថ្ងៃច័ន្ទនេះ ខណៈ​អ្នកជំនាញហិរញ្ញវត្ថុយល់ឃើញថា ហាងឆេងមាសទំនងនៅរង់ចាំចម្លើយជំនូបរវាងលោក ដូណាល់ ត្រាំ ប្រ​ធានាធិបតីអាមេរិក និងលោក វ៉្លាឌីមៀ ពូទីន ប្រធា​នាធិបតីរុស្ស៊ី ជុំវិញការបញ្ចប់សង្គ្រាមរុស្ស៊ី-អ៊ុយក្រែនកាលពីថ្ងៃទី ១៥ ខែសីហា ឆ្នាំ ២០២៥ កន្លងទៅ។

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន ​PP Link securities បានប្រាប់ឱ្យដឹងនៅថ្ងៃទី ១៨ ខែសីហា ឆ្នាំ ២០២៥ នេះថា ប្រសិនបើលទ្ធផលជំនូប​របស់លោក ដូណាល់ ត្រាំ និងលោក ពូទី មិនទាន់មានផ្លែផ្កាការច្បាស់លាស់ ហើយ​ទីផ្សារតម្លៃមាស ឬក៏សេដ្ឋកិច្ចពិភពលោក ឬភូមិសាស្ត្រនយោបាយពិភពលោក មិនទាន់​មានភាពច្បាស់លាស់ តម្លៃហាងឆេងមាសនៅតែបន្តកើនឡើង។

លោក ឡុង សំណាង៖ «លុះត្រាតែចម្លើយ និងលទ្ធផលទាំងអស់នោះមានភាពច្បាស់​លាស់​បានត្រឹមត្រូវ នោះនឹងអាចធ្វើ​ឱ្យតម្លៃហាងឆេងមាសមានការប្រែប្រួលពិតប្រាកដ»។

គិតត្រឹមម៉ោង ៩ ព្រឹកថ្ងៃទី ១៨ ខែសីហា ឆ្នាំ ២០២៥ តម្លៃមាសកំពុងជួញដូរក្នុងតម្លៃ ៤០៣០ ក្នុងមួយតម្លឹង។ សម្រាប់​ហាង​ឆេងមាសក្នុងស្រុកតាមបណ្ដាហាងនានានៅរាជធានីភ្នំពេញលក់ចេញ​ក្នុងតម្លៃ ៤០៣ ដុល្លារក្នុងមួយជី៕

អត្ថបទ៖ ឡេង ដេត