ព័ត៌មានជាតិ

មន្ត្រីក្រសួងកសិកម្ម ចុះពន្យល់ស្ថានភាពតម្លៃស្រូវស្រង៉ែធ្លាក់ថ្លៃនៅស្រុកមោងឫស្សី

បានផុស

១០ ខែ មុន

នៅ

ថ្ងៃអាទិត្យ ២៤ សីហា ២០២៥

ដោយ

ស្រុកមោងឫស្សី នៃខេត្តបាត់ដំបង គឺជាស្រុកគោលដៅកសិកម្មដ៏សំខាន់មួយ ក្នុងចំណោមស្រុកនានាក្នុងខេត្ត ខណះបច្ចុប្បន្នសិករសម្រុកគ្នាធ្វើស្រូវស្រង៉ែច្រើនបំផុត។

នៅក្នុងរយះពេលប៉ុន្មាថ្ងៃចុងក្រោយនេះ ក្រោយពីការសម្របសម្រួលតម្លៃស្រូវរបស់កសិករនៅស្រុកសង្កែនិងស្រុកមោងឫស្សី មន្ត្រីក្រសួងកសិកម្មបានកៀងគរខាងរោងម៉ាស៊ីនជួយទិញស្រូវកសិករ ទើបតម្លៃស្រូវបានហក់ឡើងដល់ ៨០០ រៀល ក្នុង ១ គីឡូក្រាម តែមិនបានប៉ុន្មានផង ស្រូវក៏បានធ្លាក់ថ្លៃយ៉ាងគំហុកវិញដោយនៅត្រឹមចន្លោះពី ៦២០ ទៅ ៦៦០ រៀលប៉ុណ្ណោះ ក្នុង ១ គីឡូក្រាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការធ្លាក់តម្លៃយ៉ាងគំហុកនេះ បានបង្កឲ្យកសិករក្នុងស្រុកមោងឫស្សីបានប្រត្តិកម្ម ទើបមានមន្ត្រីពីក្រសួងកសិកម្មតបតាមសំណើពីកសិករ បានចុះពន្យល់និងណែនាំដល់កសិករឲ្យបានយល់អំពីការប្រែប្រួលតម្លៃស្រូវជាបន្តបន្ទាប់នេះ។

លោក ឈឹម វជ្ជរ៉ា ប្រធានមន្ទីរកសិកម្មខេត្តបាត់ដំបងទទួលស្គាល់ថា ឆ្នាំនេះទិន្នផលស្រូវកសិករពិតជាធ្លាក់តម្លៃគួរឲ្យកត់សម្គាល់ ដោយសារតែខាងវៀតណាមបន្ថយល្បឿននៃការបញ្ជាទិញ។ ការកកស្ទះទីផ្សារស្រូវនេះ មុនការដាំដុះខាងមន្ត្រីជំនាញចាប់ពីថ្នាក់ក្រសួង និងខាងមន្ទីរ បានណែនាំកសិករឲ្យងាកមកដាំស្រូវពូជក្នុងស្រុកវិញ ដោយខាងក្រសួងអាចគ្រប់គ្រងបានលើតម្លៃស្រូវពូជក្នុងស្រុក បានប្រសើរជាងផលិតស្រូវពូជក្រៅស្រុក។

លោក ឈឹម វជ្ជរ៉ា បានលើកឡើងពីកិច្ចខិតខំប្រឹងប្រែងអន្តរាគមន៍ក្រសួង ក្នុងការផ្តល់នូវហិរញ្ញប្បទានពិសេសដល់រោងម៉ាសុីនដេីម្បីប្រមូលទិញស្រូវពីកសិករ និងរក្សាតម្លៃស្រូវកុំឲ្យធ្លាក់ថ្លៃ។

ក្នុងការចុះជួបជាមួយកសិករ លោក ឃឹម ហ្វីណង់ អនុរដ្ឋលេខាធិការមកពីក្រសួងកសិកម្ម ក៏បានផ្តល់នូវទស្សនៈទាននៃការចូលរួមក្នុងសហគមន៌កសិកម្មទំនេីប ដេីម្បីបញ្ចៀសបាននូវបញ្ហាប្រឈម និងតម្លៃទីផ្សារកសិផល ដែលមានភាពមិនច្បាស់លាស់កន្លងមក និងដើម្បីធានាបាននូវការផ្គត់ផ្គង់ផលិតផលកសិកម្ម ទាំងបរិមាណគុណភាព និងតម្លៃច្បាស់លាស់រវាងអ្នកផលិត និងក្រុមហ៊ុនទទួលទិញ។

ពាក់ព័ន្ធតម្លៃស្រូវឆ្នាំនេះ មន្រ្តីកសិកម្មខេត្តបាត់ដំបងបានបញ្ជាក់ប្រាប់កម្ពុជាថ្មី តាំងពីកសិករចាប់ផ្តើមប្រមូលផលក្នុងវគ្គទី ១ លោកមិនទាន់អាចដឹងបានថាយ៉ាងណានោះទេ ខណៈឆ្នាំនេះឈ្មួញវៀតណាមបានបន្ថយកម្រិតក្នុងការបញ្ជាទិញ ដែលនឹងអាចប៉ះពាល់ដល់តម្លៃទីផ្សារស្រូវរបស់កសិករ។

ស្របពេលឆ្នាំនេះកសិករផលិតស្រូវបានលើសពីការរំពឹងទុក ខណះការផ្គត់ផ្គង់ក្នុងខេត្តមានប្រមាណ ៤០% ហើយ ៦០% ទៀតសម្រាប់ការនាំចេញ ហើយការប្រមូលផលវគ្គទី ១ មានប្រមាណជាង ២០ មុឺនហិកតា ស្មើនិងប្រមាណជិត ១ លានតោន (៨៨មុឺនតោន) ខណះទិន្នផលស្រូវឆ្នាំនេះអាចហក់ដល់ទៅខ្ទង់ ២ លានតោន បើគិតទាំងស្រូវប្រាំងផង៕

អត្ថបទ÷សៅ សារិទ្ធ