​កម្ពុជាត្រៀមស្វាគមន៍​ភ្ញៀវទេសចរ​ មកពី​ទីក្រុង​ម៉ាឡាកា​ ប្រទេសម៉ាឡេស៊ី​

កម្ពុជា និងម៉ាឡេស៊ីកំពុងចាប់ដៃគ្នាក្នុងការជំរុញវិស័យទេសចរណ៍រវាងប្រទេសទាំងពីរឱ្យកាន់តែភាពរីកចម្រើនបន្ថែមទៀត ស្របពេលដែលរដ្ឋាភិបាលកំពុងដាក់ទិសដៅក្នុងការទាក់ទាញទេសចរណ៍ម៉ូស្លីមពីបណ្តាប្រទេសនានានៅជុំវិញពិភពលោក។

លោក ហួត ហាក់ រដ្ឋមន្ត្រីក្រសួងទេសចរណ៍ ​នៅថ្ងៃទី ២៨ ខែកញ្ញា ​ឆ្នាំ ២០២៥​ បានជួបពិភាក្សាការងារ​ជាមួយលោក YAB Datuk Seri Utama Ab Rauf Bin Yusoh, Chief Minister of Melaka ដោយទទួលលទ្ធផលផ្លែផ្កាជាច្រើន ក្នុងនោះមានដូចជា ពង្រឹងកិច្ច សហប្រតិបត្តិការលើការងារ​ទេសចរណ៍មូស្លីម, ការផ្សព្វផ្សាយទេសចរណ៍រួមគ្នា ម៉ាឡាកានិងកម្ពុជា ព្រមទាំងជំរុញការរៀបចំកញ្ចប់ទស្សនកិច្ចរួមគ្នាដោយមានការលើកទឹកចិត្តនិងមានភាពទាក់​ទាញ។

​ដោយសារទីក្រុងម៉ាឡាកា ជាទីក្រុងប្រវត្តិសាស្ត្រ និងបានដាក់​បញ្ចូលក្នុងតំបន់បេតិកភណ្ឌ​ពិភពលោក​, ភាគីទាំងពីរក៏បានផ្លាស់ប្តូរទស្សនៈ​ និងស្នើឱ្យមានការចែករំលែកបទពិសោធល្អៗ​ក្នុង​ការគ្រប់គ្រងទីតាំងបេតិកភណ្ឌ និងទេសចរណ៍ទីក្រុង។

តាមរយៈការដាក់ចេញផែនការអភិវឌ្ឍទេសចរណ៍មូស្លីម (២០២៣-២០២៧) និងស្តង់ដាមូស្លីមហ្រែនលី កម្ពុជាត្រៀមខ្លួនរួចជាស្រេចក្នុងការត្រៀម​ទទួលស្វាគមន៍ភ្ញៀវ​ទេសចរពីម៉ាឡាកា ពិសេសទេសចរណ៍មូស្លីម។​

​សូមបញ្ជាក់ជូនថា នៅម៉ាឡេស៊ី Chief Minister of Melaka មានតួនាទីជាប្រមុខរាជរដ្ឋាភិបាល​នៅ​រដ្ឋម៉ាឡាកា ប្រទេសម៉ាឡេស៊ី ដែលគ្រប់គ្រងអំណាចនីតិប្រតិបត្តិនៅក្នុងរដ្ឋម៉ាឡាកា៕