សប្បាយមើល! កម្ពុជា ប្រកួត​មិត្តភាព​អន្តរជាតិ ២ សប្តាហ៍​​ជាប់​គ្នា​នៅ​អូឡាំពិក ខែ​ក្រោយ

សហព័ន្ធបាល់ទាត់ កម្ពុជា (FFC) បានប្រកាសជាផ្លូវការអំពីក្រុមបាល់ទាត់ជម្រើសជាតិ កម្ពុជា នឹងមានការប្រកួតមិត្តភាពអន្តរជាតិចំនួន ២ ប្រកួតនៅខែក្រោយ ដើម្បីកម្តៅសាច់ដុំត្រៀមការប្រកួតពាន ASEAN Championship ឆ្នាំ ២០២៦។

ក្រុមគោព្រៃ កម្ពុជា នឹងមានការប្រកួតមិត្តភាព ២ ប្រកួតនៅពហុកីឡដ្ឋានជាតិ អូឡាំពិក ក្នុងទឹកដីកម្ពុជា។ នៅថ្ងៃទី ៤ ខែ មិថុនា ឆ្នាំ ២០២៦ កម្ពុជា នឹង​ប្រកួតមមិត្តភាព​អន្តរជាតិ​ទល់នឹងក្រុមជម្រើសជាតិ ប៊ូតាន​ ដែលជាក្រុមមានចំណាត់ថ្នាក់ក្នុង FIFA លេខ ១៨៦។ ចំណែកមួយប្រកួតទៀត នៅថ្ងៃទី ៩ ខែ មិថុនា ឆ្នាំ ២០២៦ នឹងត្រូវជួបក្រុមជម្រើសកោះ ហុងកុង ដែលមានចំណាត់ថ្នាក់ក្នុង FIFA លេខ ១៥៥។

ការប្រកួតមិត្តភាពនាខែក្រោយនេះ គឺជាការត្រឡប់មកវិញរបស់ជម្រើសជាតិ កម្ពុជា បន្ទាប់ពីប្រកួតចុងក្រោយទល់នឹងក្រុមជម្រើសជាតិ ហុងកុង កាលពីខែ វិច្ឆិកា ឆ្នាំ ២០២៥។ ការប្រកួត ២ ប្រកួតនេះរបស់ជម្រើសជាតិ កម្ពុជា គឺមិនមែនជាការប្រកួតមិត្តភាពធម្មតានោះទេ ប៉ន្តែជាការប្រមូលផ្តុំកីឡាករ ដើម្បីប្រកួតកម្តៅសាច់ដុំត្រៀមពាន ASEAN Championship ដែលចាប់ផ្តើមពីថ្ងៃទី ២៤ ខែ កក្កដា ដល់ថ្ងៃទី ២៦ ខែ សីហា ឆ្នាំ ២០២៦៕៕

អត្ថបទ៖ សេម កុសល