មកកៀកហើយ! ទីបំផុត វីរុសកូវីដបំប្លែងខ្លួនឥណ្ឌា ចូលដល់ វៀតណាម

ក្រសួងសុខាភិបាលវៀតណាមបានឲ្យដឹងថា អ្នកជំនាញឥណ្ឌាចំនួន៤នាក់ និងបុរសជនជាតិវៀតណាមម្នាក់ ដែលធ្វើការនៅសណ្ឋាគារមួយ ត្រូវបានរកឃើញ ឆ្លងវីរុសកូវីដ-១៩បំប្លែងខ្លួនឥណ្ឌា។

លទ្ធផលត្រូវបានប្រកាសកាលពីថ្ងៃសុក្រ បន្ទាប់ពីការពិនិត្យសំណាកអ្នកជំងឺ ដោយវិទ្យាស្ថានជាតិអនាម័យនិងរោគរាតត្បាត។ វីរុសកូវីដបំបែ្លងខ្លួនឥណ្ឌា B.1.167 គឺជាវីរុសបំប្លែងខ្លួនទ្វេដង ដែលត្រូវបានកត់ត្រាជាលើកដំបូងនៅក្នុងប្រទេសវៀតណាម។

បុរសជនជាតិវៀតណាម គឺជាអ្នកទទួលភ្ញៀវនៅសណ្ឋាគារ Nhu Nguyet 2 ក្នុងខេត្ត Yen Bai ភាគខាងជើង។ បុរសវ័យ៦៣ឆ្នាំរូបនេះ បានទាក់ទងជាមួយក្រុមអ្នកជំនាញឥណ្ឌា នៅពេលពួកគេមកសណ្ឋាគារកាលពីថ្ងៃទី១៨ខែមេសា ដើម្បីធ្វើចត្តាឡីស័ក។ ក្នុងចំណោមជនជាតិឥណ្ឌាចំនួន១១នាក់ មាន៤នាក់ត្រូវបានបញ្ជាក់ថាឆ្លងជំងឺកូវីដ-១៩បំប្លែងខ្លួន។

អង្គការសុខភាពពិភពលោក (WHO) បាននិយាយថា វីរុស B.1.617 ត្រូវបានរកឃើញជាលើកដំបូងនៅក្នុងប្រទេសឥណ្ឌាកាលពីខែធ្នូ។ 

វាត្រូវបានគេស្គាល់ថា ជាវីរុសដែលឆ្លងកាន់តែសាហាវនិងមានភាពធន់នឹងវ៉ាក់សាំងនាពេលបច្ចុប្បន្ន៕

ប្រែសម្រួលដោយ៖ Vann Vann

ប្រភព៖ VN Express

ចុចអាន៖ វៀតណាម រកឃើញករណីឆ្លង កូវីដ ក្នុងសហគមន៍លើកដំបូង ក្រោយស្ងប់ស្ងាត់ជាងមួយខែ