ពិតឬអត់! ពាក់ម៉ាសពីរជាន់អាចការពារការចម្លងវីរុសកូវីដបានល្អជាងពាក់តែមួយ?

ស្ថិតក្នុងវិបត្តិនៃមេរោគរាតត្បាត ពិភពលោកបានផ្លាស់ប្ដូរនិន្នាការថ្មី ដោយតម្រូវឱ្យគ្រប់គ្នាពាក់ម៉ាសជាប្រចាំ រាល់ពេលទៅកន្លែងសាធារណៈ ឬកន្លែងបិទជិតណាមួយ។ ការពាក់ម៉ាសបានក្លាយជាទម្លាប់ រហូតមានអ្នកខ្លះខ្លាចការចម្លងវីរុសខ្លាំង ហើយជឿជាក់ថា ការពាក់ម៉ាស់ពីរជាន់ អាចការពារបានល្អជាងពាក់តែមួយទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយពីមជ្ឈមណ្ឌលត្រួតពិនិត្យនិងបង្ការជំងឺ (CDC) សហរដ្ឋអាមេរិក បានបង្ហាញថា ការពាក់ម៉ាសអាចកាត់បន្ថយហានិភ័យពីការឆ្លងវីរុសកូវីដ-១៩ បានច្រើនជាង ៧០%​ ឯណោះ។

បើអ៊ីចឹង! ពាក់ម៉ាសពីរជាន់ មិនរឹតតែអាចការពារបានខ្លាំងថែមទៀត? នេះជាការពន្យល់ពីអ្នកជំនាញសុខាភិបាល។

លោក Scott Segal សាស្ត្រាចារ្យនិងជាប្រធានផ្នែកថ្នាំសន្លប់នៅមជ្ឈមណ្ឌលឱសថសាស្ត្រ Wake Forest Baptist Health រដ្ឋ កាលីហ្វញ៉ា និយាយថា មកទល់ពេលនេះ មានទិន្នន័យវិទ្យាសាស្រ្តតិចតួចប៉ុណ្ណោះដែលចង្អុលបង្ហាញពីអត្ថប្រយោជន៍នៃការពាក់ម៉ាសពីរជាន់ ពោលគឺការពាក់ម៉ាសត្រួតគ្នាដល់ទៅពីរ ក៏មិនខុសគ្នាប៉ុន្មានពីការពាក់តែមួយដែរ។

វេជ្ជបណ្ឌិតរូបនេះបន្ថែមថា បើសិនម៉ាសដែលយើងប្រើជាប្រភេទម៉ាសស្ដើង គុណភាពមិនល្អ ការពាក់ពីរជាន់ក៏ជារឿងសមហេតុផលផងដែរ។ យ៉ាងណាមិញលោកណែនាំឱ្យប្រើម៉ាសក្រណាត់ដែលអាចបោកគត់បាន ព្រមទាំងអាចប្រើបានទាំងសងខាង​ ទើបជាការប្រសើរ។

រីឯអ្នកជំនាញខាងជំងឺឆ្លង លោក Amesh Adalja, MD ក៏អ្នកសិក្សាជាន់ខ្ពស់នៃមជ្ឈមណ្ឌលសន្តិសុខសុខាភិបាលនៃសាកលវិទ្យាល័យ Johns Hopkins ក្នុងរដ្ឋ ម៉ារីឡេន បានយល់ស្របដែរថា ម៉ាសមានមុខពីរ (ប្រើបានទាំងខាង) ពិតជាមានប្រសិទ្ធភាពជាងម៉ាសដែលប្រើបានតែម្ដង។​​

ទោះយ៉ាងណា ប្រសិនបើពាក់ម៉ាសមុខពីរធ្វើឱ្យពិបាកដកដង្ហើម យើងអាចជ្រើសរើសប្រើម៉ាសទូទៅដែលងាយស្រួលស្រូបខ្យល់ចេញចូលជាង។

ជាថ្មីម្ដងទៀត ការពាក់ម៉ាសជាវិធានបង្ការគ្រោះថ្នាក់ពីការចម្លងនៃវីរុស ទោះមិនអាចការពារបាន១០០%ក៏ដោយ។ ចំណែកការពាក់ម៉ាសត្រួតគ្នា មិនទាន់មានទិន្នន័យគាំទ្រថាអាចការពារសុវត្ថិភាពច្រើនជាងការពាក់ម៉ាសតែមួយនោះទេ៕

ប្រែសម្រួល៖ សន្យា

ប្រភព៖ Health

ចុចអាន៖ ហេតុផលធំៗទាំង ៥ ដែលគ្រប់គ្នាគួរពាក់ម៉ាស មិនអាចអាក់ខាន

ចុចអាន៖ ពាក់ម៉ាសនិងរក្សាគម្លាតខ្ជាប់ខ្ជួន អាចការពារហានិភ័យចម្លងកូវីដ សឹង១០0ភាគរយ