តាមពិត WHO ប្រកាសអាសន្នពីជំងឺកូវីដ ១៩ តាំងពីដើមឆ្នាំ ២០២០ មកម្ល៉េះ

ចាប់តាំងពីការផ្ទុះឡើងនៃវីរុសកូរ៉ូណាត្រូវបានប្រកាសថាជា “រោគរាតត្បាតជាសកល” អង្គការសុខភាពពិភពលោក (WHO) បានបញ្ជាក់ថា ខ្លួនបានប្រកាសអាសន្នពីរោគរាតត្បាតនេះក្នុងកម្រិតខ្ពស់បំផុតដើម្បីជំរុញសកម្មភាពគ្រប់ប្រទេសទាំងអស់នៅដើមឆ្នាំ ២០២០ ។

នៅពេលត្រូវបានគេសួរនៅឯសន្និសីទកាសែតថាតើអង្គការនេះគួរតែប្រើពាក្យ “រោគរាតត្បាត” ឆាប់ៗនេះដែរឬក៏យ៉ាងណា លោកស្រី Maria Van Kerkhove ប្រធានផ្នែកបច្ចេកទេសរបស់អង្គការសុខភាពពិភពលោក (WHO) ស្ដីពីជំងឺកូវីដ ១៩ បាននិយាយថា WHO បានប្រកាសអាសន្នផ្នែកសុខភាពសាធារណអន្តរជាតិតាំងតែពីថ្ងៃទី ៣០ ខែមករា ឆ្នាំមុន មកម្ល៉េះ ។

នៅថ្ងៃទី ៣០ ខែមករា ឆ្នាំ ២០២០ អង្គការសុខភាពពិភពលោកបានប្រកាសពីការផ្ទុះជំងឺនេះ ដែលក្រោយមកត្រូវបានគេដាក់ឈ្មោះថា ជំងឺកូវីដ ១៩ ជាភាពអាសន្នផ្នែកសុខភាពសាធារណអន្តរជាតិ បន្ទាប់ពីការពិភាក្សារយៈពេល ២ ថ្ងៃដោយក្រុមអ្នកជំនាញអន្តរជាតិ ។

លោក Michael Ryan នាយកប្រតិបត្តិនៃកម្មវិធីបន្ទាន់ផ្នែកសុខភាពរបស់អង្គការសុខភាពពិភពលោកបាននិយាយនៅក្នុងសន្និសីទកាសែតនោះថា កម្រិតនៃការប្រកាសអាសន្ននេះអាចធ្វើទៅបានខ្ពស់បំផុតក្រោមកិច្ចព្រមព្រៀងរួមរវាងរដ្ឋជាសមាជិកអង្គការសុខភាពពិភពលោក ។

លោកបានបន្ថែមទៀតថា មានកិច្ចព្រមព្រៀងស្របច្បាប់រវាងសមាជិកអង្គការសុខភាពពិភពលោកចំនួន ១៩៤ ប្រទេសដែលបានព្រមព្រៀងគ្នាក្នុងឆ្នាំ ២០០៥ ដែលពួកគេបានរួមគ្នា និងព្រមព្រៀងគ្នាអំពីអ្វីដែលនឹងបង្ហាញពីការប្រុងប្រយ័ត្នខ្ពស់បំផុតសម្រាប់ស្ថានភាពសុខភាពសាធារណៈសកលលោក ។

លោកបាននិយាយថា “នេះគឺជាកិច្ចព្រមព្រៀងរវាងរដ្ឋជាសមាជិកទាំងអស់នៅលើភពផែនដីដែលបានព្រមព្រៀងគ្នានៅក្នុងច្បាប់ថា នេះនឹងតំណាងឲ្យមានសកម្មភាពសមូហភាពក្នុងការឆ្លើយតបចំពោះការទប់ស្កាត់រោគរាតត្បាត” ។

គួរបញ្ជាក់ថា គិតត្រឹមពេលនេះនៅលើពិភពលោកមានករណីឆ្លងជំងឺកូវីដ ១៩ ចំនួន ១៦៣,១៦២,០៩៤ ករណី និងមានអ្នកស្លាប់ចំនួន ៣,៣៨៣,០០៥ នាក់ ខណៈមានអ្នកជាសះស្បើយចំនួន ១៤១,៤៥៨,៨៤៩ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ WHO ព្រមាន​បញ្ចៀស​ការ​ប្រើ​ថ្នាំ​លេប​ប្រឆាំង​ប៉ារ៉ាស៊ីត Ivermectin មក​ព្យាបាល​អ្នក​ជំងឺ​កូវីដ ដាច់ខាត

ចុចអាន ៖ WHO ថា រលកថ្មីនៃករណីឆ្លងនៅទ្វីបអាហ្វ្រិក កើតឡើងព្រោះតែ កូវីដបំប្លែងខ្លួនថ្មី ការពន្យារពេលផ្គត់ផ្គង់ និងការយឺតយ៉ាវចាក់វ៉ាក់សាំង