ទីតាំង ៥ កន្លែងពាក់ព័ន្ធអ្នកជំងឺ​កូវីដ១៩ ឆ្លងចូលដល់ផ្សារធំថ្មីមួយទៀត

អនុគណៈកម្មការស្រាវជ្រាវជំងឺកូវីដ១៩ បានប្រកាសទីតាំងចំនួន ៥ កន្លែងពាក់ព័ន្ធជាមួយអ្នកជំងឺកូវីដ១៩។ អនុគណៈកម្មការ ក៏អំពាវនាវឱ្យប្រជាពលរដ្ឋធ្លាប់ទៅទីតាំងទាំងនេះ ត្រូវតាមដានសុខភាពជាប្រចាំ និងដាក់ខ្លួនឱ្យនៅដាច់ដោយឡែករយៈពេល ១៤ ថ្ងៃ។

ទីតាំងទាំង៥នោះរួមមាន៖

១. តូបលេខ I1 238 – I1-239 ក្នុង ផ្សារធំថ្មី ខាងជ្រុងជាប់បន្ទប់ទឹក ចាប់ពីថ្ងៃទី ២៤ ដល់ថ្ងៃទី ៣០ ខែមិថុនា មានអ្នកជំងឺកូវីដ១៩ គឺជាអ្នកលក់ខោអាវនៅតូបខាងលើ។

២. បុគ្គលិកធ្វើការខាងផ្នែករត់តុ​នៅភោជនីយដ្ឋាន សេង លីប មានវិជ្ជមានកូវីដ១៩។ ភោជនីយដ្ឋាន សេង លីប​ ដែលមានទីតាំងស្ថិតនៅតាមផ្លូវ ផ្លូវមន្នីវង្ស សង្កាត់ស្រះចក ខណ្ឌដូនពេញ ត្រូវប្រុងប្រយ័ត្នចាប់ពីថ្ងៃទី ២៤ ខែមិថុនា ដល់ថ្ងៃទី២ ខែកក្កដា។

៣. អ្នកជំងឺកូវីដ១៩ ស្ថិតនៅ ហាង មី-អា​ (MI-A Japan) សាខា ផ្សារទំនើប AEON ១ ដែលមាន​ទី​តាំង​ស្ថិតនៅជាន់ទី១ នៃផ្សារទំនើប​ AEON ១ ផ្លូវសុធារស់ សង្កាត់ទន្លេបាសាក់ ខណ្ឌចំការមន។ អ្នកដែលបានទៅទីនោះ នៅថ្ងៃទី ៣០ ខែមិថុនា ត្រូវដាក់ខ្លួនឱ្យដាច់ដោយឡែក រយៈពេល ១៤ ថ្ងៃ និងតាមដានសុខភាពជាប្រចាំ។

៤. បុគ្គលិកបម្រើការងារ នៅធនាគារ ABA សាខាផ្លូវមុនីវង្ស ដែលមានទីតាំងស្ថិតនៅអគារលេខ ២៩៨ABCD ផ្លូវមុនីវង្ស សង្កាត់បឹងរាំង ខណ្ឌដូនពេញ។ អ្នកដែលបានទៅទីនោះ ចាប់ពីថ្ងៃទី ២៤ ខែមិថុនា ដល់ថ្ងៃទី ១ ខែកក្កដា សូមដាក់ខ្លួនឱ្យដាច់ដោយឡែក១៤ ថ្ងៃ។

៥. អ្នកជំងឺកូវីដ១៩ បានទៅហាង Daiso​ Japan សាខាផ្សារទំនើប AEON ១ ដែលមានទីតាំង​ស្ថិតនៅ​ជាន់ទី១ នៃផ្សារទំនើប​ AEON ១ ផ្លូវសុធារស់ សង្កាត់ទន្លេបាសាក់ ខណ្ឌចំការមន។ អ្នកដែលបានទៅទីនោះ នៅថ្ងៃទី ៣០ ខែមិថុនា ចាប់ពីម៉ោង ១២៖៤០ ដល់ម៉ោង ១ ត្រូវប្រុងប្រយ័ត្នតាមដានសុខភាព និងដាក់ខ្លួនឱ្យនៅដោយឡែក៕ ដោយៈ ឡេង ដេត