ស្រស់ស្អាត មានន័យ ឈុតតំណាងជាតិ “សុវណ្ណទេពីមណីសាគរ” របស់ សៃ ហ្វុន ត្រៀមប្រកួតបវរកញ្ញាភេទទី៣

ពិតជាស្រស់ស្អាតប្លែក ឈុតតំណាងជាតិ “សុវណ្ណទេពីមណីសាគរ” របស់ សៃ ហ្វុន បវរកញ្ញាភេទទី៣ ថែមទាំងមានអត្ថន័យល្អ និងគួរឲ្យទាក់ទាញ ជាពិសេសការបញ្ចប់ភាពរើសអើងភេទថែមទៀតផង។

នេះបើតាមរយៈហ្វេសប៊ុកផេក Team Cambodia បានបង្ហោះថា ឈុ​តៈ សុវណ្ណ​ទេពី​មណី​សាគរ ពស្ត្រ​ដ៏​វិចិត្រ​នេះ បាន​រចនា​ច្នៃប្រឌិត​ឡើង​ក្រោម​ទម្រង់​នៃ​តួអង្គ​ទេពី (​ទេវី​) មួយអង្គ ជា​តំណាងឱ្យ​អ្នក​ឃុំគ្រង ថែរក្សា​ដែនទឹក ព្រមទាំង​បាន​ផ្តល់នូវ​វារិដែល​មិនចេះ​រីងស្ងួត​ដល់​សព្វ​សត្វ ក្នុងការ​រស់រានមានជីវិត​នៅលើ​ដែន​ប្រឹថពី​ពសុន្ធរា​នេះ ជាង​នេះទៅទៀត​ព្រមទាំង​បាន​ពាំនាំ​ភោគទ្រព្យ​ដ៏​មានតម្លៃ ជា​ប្រភព​នៃ​អាហារ និង​ការប្រើប្រាស់​ផ្សេងៗ ផ្តល់​ជា​សំណើម​ដល់​ភាវៈមានជីវិត​ទាំងឡាយ​លើ​ផែនដី នេះ​តាម​ដំណើរ​នៃ​វដ្ដសន្ធិ​ដែល​មិនចេះ​ឈប់​។ តាមរយៈឈុត​ពស្ត្រ​នេះ បាន​តំណាង​ជា​សំឡេង​ប្រៀប​ដូច​មហា​វា​រិ ​ដែលជា​មគ្គ​មួយ​ដ៏​ត្រកាល​ដែល​បាន​តំណាង​នូវ​ការតភ្ជាប់​ពី​ទ្វីប​មួយ​ទៅកាន់​ទ្វីប​មួយទៀត​នៅលើ​សកលលោក​យើង​នេះ​បង្កើតបានជា​ចក្រ​វា​ឡ និង​សព្វ​សត្វ​។ នៅទីណាៗ មហា​វា​រិ ដ៏​មាន​គុណូបការៈ​ដ៏​មានតម្លៃ សម្រាប់​ជីវិត ទោះជា​ស្ថិត​នៅទីណាៗ ក្នុងការ​ចាប់បដិសន្ធិ​ក្រោម​ការតាក់តែង នៃ​ធម្មជាតិ បុថុជ្ជន​គ្រប់ៗ​រូប​សុទ្ធតែ​មានតម្លៃ និង​សេចក្តីថ្លៃថ្នូរ​ក្នុងនាម​ជា​មនុស្សជាតិមួយរូប​ដ៏​ប្រពៃ​។ សូម​បញ្ឈប់​នូវ​ការរើសអើង​ភេទ ចាប់ពីពេលនេះ​តទៅ មនុស្ស​ពុំ​អាច​ជ្រើសរើស​យោនយកកំណើត ប៉ុន្តែ​មនុស្ស​អាច​ជ្រើសរើស​បដិបទា ជា​បែបណា​ក្នុង​សង្គមជាតិ​។

សូមបញ្ជាក់ថា កញ្ញា សៃ ហ្វុន បានធ្វើដំណើរចាកចេញពីប្រទេសកម្ពុជា កាលពីថ្ងៃទី ១៤ ខែមិថុនា ឆ្នាំ ២០២២ ទៅប្រកួតកម្មវិធី Miss International Queen នៅប្រទេសថៃ។ គួររំលឹកដែរថា នៅរសៀលនេះ នឹងមានកម្មវិធី Miq Pride Together Big Day ដែលមានការប្រកួត ៣ គឺ People Of Pride Talk, National Costume និងTalent Quest៕

អត្ថបទ៖ ផានិត