វណ្ណដា ឧបត្ថម្ភ៩៩៩ដុល្លារក្នុងយុទ្ធនាការ១០០​លានរៀលដើម្បីតបស្នងព្រឹទ្ធាចារ្យ គង់ ណៃ

ជាការចូលរួមអបអរសាទរទៅកាន់ព្រឹទ្ធាចារ្យកោសល្យវោហារ គង់ ណៃ ដែលទទួលបានការទស្សនា១០០លានដងក្នុង​បទTime To Rise”បារមី” បានបង្កើតយុទ្ធនាការ១០០លានរៀលដើម្បីរៃអង្គាសថវិកាតបស្នងព្រឹទ្ធាចារ្យ គង់ ណៃ ។

ផលិតកម្ម “បារមី” បានបញ្ជាក់ថា ដើម្បីតបស្នងទៅដល់ព្រឹទ្ធាចារ្យ គង់ ណៃ ពួកយើងផ្ដើមបង្កើតយុទ្ធនាការ១០០លាន​រៀល “Rise For Master Kong Nay” ដើម្បីរៃអង្គាសថវិកាក្នុងគោលបំណងជួយសម្រាលបន្ទុកថ្លៃចំណាយព្យាបាល​ជំងឺ និងជីវភាពប្រចាំថ្ងៃរបស់ព្រឹទ្ធាចារ្យ គង់ ណៃ។

ប្រភពលើកឡើងថា ដូចដែលអ្នកទាំងអស់គ្នាបានដឹងមកហើយថា ព្រឹទ្ធាចារ្យ គង់ ណៃ លោកបានសម្រាកព្យាបាលនៅមន្ទីរពេទ្យយូរមកហើយ ក្នុងពេលបច្ចុប្បន្ននេះ ស្ថានភាពរបស់ព្រឹទ្ធាចារ្យ គង់ ណៃ បានរាងធូរសើ្បយបន្ដិចហើយតែមិនទាន់មានកម្លាំងគ្រប់គ្រាន់មិនអាចធ្វើដំណើរ និងមិនអាចធ្វើការសម្ដែងដូចមុន។

ប្រភពបានបន្តថា ដូចនេះហើយទើបក្រុមហ៊ុន បារមី សិល្បករ និងសិល្បការិនីបានផ្ដួចផ្ដើមគំនិតបង្កើតយុទ្ធនាការនេះឡើង។ តោះចូលរួមយុទ្ធនាការរបស់យើងនឹងចាប់ផ្ដើមពីថ្ងៃទី២៥ ខែតុលា រហូតដល់ថ្ងៃទី២៥ ខែវិច្ឆិកា ឆ្នាំ២០២២។ ក្នុងការប្រកាសយុទ្ធនាការនេះដែរ តារាចម្រៀងរ៉េប វណ្ណដា ក៏បានចូលរួមឧបត្ថម្ភថវិកាផ្ទាល់ខ្លួនចំនួន៩៩៩ដុល្លារ ជូនលោកតា គង់ ណៃ ផងដែរ៕

អត្ថបទ៖ ចាន់រ៉ា