វណ្ណដា ទម្លាយការឈឺចាប់ក្នុងចិត្តពីទង្វើឃោរឃៅរបស់យោធាថៃ លើពលរដ្ឋស្លូតត្រង់កម្ពុជា ទៅកាន់ពិភពលោក

ជាថ្មីម្តងទៀត តារាចម្រៀងរ៉េបល្បីឈ្មោះលោក ម៉ាន់ វណ្ណដា ចេញមកទម្លាញអារម្មណ៍ដ៏ឈឺចាប់បំផុតចំពោះទង្វើឈ្លានពានពីសំណាក់យោធាថៃឈ្លានពាន មកលើប្រទេសកម្ពុជា ពិសេសប្រជាជនស្លូតត្រង់ដោយបានទម្លាក់គ្រាប់បែក ចូលក្នុងតំបន់ដែលមានប្រជាជនកំពុងរស់នៅ ដោយមិនញញើតច្បាប់អន្តរជាតិ និងថែមទាំងចូលជ្រៅក្នុងដែនអធិបតេយ្យកម្ពុជា។

វណ្ណដា កន្លងមកធ្លាប់បានទទូច និងចេញសារបំផុសដោយដាស់ស្មារតីប្រជាជនក៏ដូចកូនខ្មែរគ្រប់រូបត្រូវចងចាំសង្គ្រាមឈ្លានពានរបស់ចោរសៀម ព្រោះទង្វើនេះគឺព្រៃផ្សៃគ្មានមនុស្សធម៌គុណធម៌ជាមនុស្សទេដែលសកម្មភាពនេះ ជាការវាយប្រហារដ៏កំរោលដោយមិនរើសគោលដៅរបស់យោធាថៃ ជាការរំលោភបំពានច្បាប់មនុស្សធម៌អន្តរជាតិ។

ដោយការឈឺចាប់នូវទង្វើដ៏ឃោរឃៅពីសំណាក់យោធាថៃ តារាចម្រៀងរ៉េបរូបនេះ ចេញសារប្រាប់ទៅកាន់ពិភពលោកប្រាប់ពីការឈឺចាប់របស់កម្ពុជាថា “សូមពិភពលោកស្តាប់ពួកយើងឱ្យច្បាស់ ពេលនេះ បេះដូងរបស់ពួកយើងពិតជាឈឺចាប់ធ្ងន់ធ្ងរណាស់។ ឈឺចាប់ខ្លាំងណាស់ ទឹកភ្នែកក៏ហូរច្រើនណាស់ដែរ។ កុមារត្រូវរត់ជំនួសដោយការរៀនសូត្រ។ ក្រុមគ្រួសារ ត្រូវចាកចេញពីផ្ទះ ដែលខំសាងសង់ឡើង ដោយក្តីស្រឡាញ់។ តំបន់ប្រវត្តិសាស្ត្រនិងទីកន្លែងអប់រំដែលមានគោលបំណងការពារអនាគតរបស់យើងត្រូវបានខូចខាត។ យើងពិតជាធុញទ្រាន់នឹងការឮសំឡេងគ្រាប់ផ្លោងជាងក្តីសុបិនរបស់កុមារ”។

លោកបន្តថា “យើងនឿយហត់នឹងការឃើញសិស្ស មនុស្សចាស់និងមនុស្សស្លូតត្រង់រងទុក្ខដោយសារការសម្រេចចិត្ត ដែលពួកគេមិនដែលចង់ធ្វើ។ ប្រជាជនកម្ពុជាមិនបានស្វែងរកសង្គ្រាមនោះទេ។ យើងស្វែងរកសន្តិភាព។ យើងធ្លាប់បានស្គាល់អំពើរបបប្រល័យពូជសាសន៍រួចហើយ។ យើងបានខំសាងសង់ឡើងវិ ញរួចពីផេះផង់រួចហើយ​យើងមិនព្រមត្រឡប់ទៅភា ពខ្មៅងងឹតនោះវិញទេ។ យើងសុំតែសុខសុវត្ថិភាព។ យើងសុំតែឱ្យមានភាពជាមនុស្ស។កម្ពុជាឈរលើសេ ចក្តីថ្លៃថ្នូរ វប្បធម៌និងការរស់រានមានជីវិតមិនមែនជាការបំផ្លាញនោះទេ”។

ជាមួយគ្នានេះ វណ្ណដា ក៏អំពាវនាវដល់ជនរួមជាតិ ត្រូវឈរជាមួយគ្នាជួយគ្នាទៅវិញទៅមក ព្រោះសាមគ្គីភាពគឺជាកម្លាំងដ៏ធំ និងស្នើកុំបណ្តោយឱ្យការឈឺចាប់ពេលនេះ ប្រែក្លាយជាការប្រឆាំងនឹងមនុស្សជាតិ។ លោករំលឹកថា “យើងជាជាតិសាសន៍មួយដែលឈ្នះពីរឿងដែលមិនអាចទៅរួច។ យើងនឹងឈ្នះសង្គ្រាមនេះជាមួយនឹងសន្តិភាព និងមិនមែនដោយការស្អប់ខ្ពើមឡើយ។ ដោយការឈឺចាប់ យើងជ្រើសរើសសន្តិភាព។ ដោយការភ័យខ្លាច យើងជ្រើសរើសការស់រាន។ ដោយភាពងងឹត យើងជ្រើសរើសក្តីសង្ឃឹម។

គិតមកដល់ពេលនេះយោធាថៃនៅតែបន្តយ៉ាងគឃ្លើនក្នុងការឈ្លានពានមកកាន់ប្រទេសកម្ពុជាដោយបានទម្លាក់គ្រាប់បែកបាញ់ផ្លោងចូលទីតាំងប្រជាជនស៊ីវិលកម្ពុជា និងបានបំផ្លិចបំផ្លាញហេដ្ឋារចនាសម្ព័ន្ធស៊ីវិល, មន្ទីពេទ្យ, សាលារៀន, វត្តអារាម, អាគារធំៗ និងផ្លូវស្ពានជាដើម៕ ដោយ ៖ ចាន់រ៉ា