វីរៈនិច្ច បង្ហោះរូបជាមួយតារារ៉េប G-Devith និង វណ្ណដា សរសេរសារបង្កប់អត្ថន័យជ្រៅ

ដូចដែលយើងដឹងស្រាប់ហើយថា តារាចម្រៀងរ៉េបដ៏ល្បីល្បាញ២រូប លោក G-Devith និង លោក វណ្ណដា កំពុងតែមានជម្លោះផ្ទុះឡើងសារជាថ្មី ធ្វើឲ្យមានការប្រកួតប្រជែងគ្នាយ៉ាងខ្លាំងក្លាបែងចែកបក្សពួករបស់អ្នកគាំទ្រជា២ក្រុម។ យ៉ាងណាមិញ តារារ៉េបទាំង២ដួង សុទ្ធតែមានសមត្ថភាពខ្លាំងរៀងៗខ្លួន ជាគ្រាប់ពេជ្ររបស់កម្ពុជាមិនអាចប្រកែកបាន។

បើទោះបីជាមានការបែកចែកបក្សពួកខាង G-Devith និង ខាង វណ្ណដា ក្ដី នៅក្នុងចង្កោមសិល្បៈគឺគេមានការទទួលស្គាល់សមត្ថភាព និងប្រជាប្រិយភាពរបស់អ្នកទាំងពីរ។ ជាមួយគ្នានេះដែរ តារាចម្រៀងស្រី អ្នកនាង វីរៈនិច្ច បានបង្ហោះរូបភាពជាមួយតារារ៉េបទាំង២ដួងនេះ ព្រមជាមួយនឹងការសរសេរសារគាំទ្រ ដោយមិនរើសយកខាងណាមួយនោះទេ។

នៅក្នុងនោះ វីរៈនិច្ច បានសរសេរថា “តន្ត្រីធ្វើឲ្យយើងមានទំនាក់ទំនង ប៉ុន្ដែក្ដីស្រឡាញ់ និងក្ដីគោរពធ្វើឲ្យយើងកាន់តែខ្លាំងឡើង។ ចែករំលែកឆាកតន្ត្រីជាមួយសិល្បករដ៏អស្ចារ្យទាំង២នាក់ វណ្ណដា និង G-Devith រំលឹកខ្ញុំឲ្យដឹងថា​ ពួកយើងមិនមែនត្រឹមតែជាអ្នកសម្ដែងលើឆាកនោះទេ ពួកយើងជាគ្រួសារតែមួយ”។

ជាពិសេស ក្នុងអត្ថន័យនេះ តារាស្រី វីរៈនិច្ច ចង់បង្ហាញឲ្យឃើញអំពីការគាំទ្ររបស់ខ្លួនទៅកាន់តារាចម្រៀងរ៉េបទាំង២នាក់ ហើយក៏ចង់ក្រើនរំលឹកដែរថា ពួកយើងសុទ្ធសឹងតែជាសិល្បករដូចគ្នា រួមឆាកជាមួយគ្នា មិនមានបែងចែកបក្សពួកនោះទេ សូមអ្នកគាំទ្រពិចារណាតាមការគួរ៕

ប្រភព៖ Virak Nich