ផលិតកម្មបារមី បង្ហើបថា វណ្ណដា និង វណ្ណថាន គ្រោងចាប់ដៃគ្នាចេញបទថ្មី ក្រោយផ្ទុះបទ “កម្លោះស្រុកខ្មែរ”

ស្របពេលដែលបទ “កម្លោះស្រុកខ្មែរ” ដែលជាចម្រៀងរួមគ្នារវាង វណ្ណដា និង វណ្ណថាន ផ្ទុះការគាំទ្រខ្លាំងរហូតមានអ្នកចូលទស្សនាដល់ទៅ ១០០លានដង ត្រឹមរយ:ពេល ១ឆ្នាំ ស្រាប់តែខាងផលិតកម្មបង្ហើបថាអ្នកទាំង២នឹងចាប់ដៃគ្នាចេញបទថ្មីដើម្បីបម្រើអារម្មណ៍ទស្សនិកជនពិសេសអ្នកគាំទ្រ។

ទន្ទឹមគ្នានៃការអបអរដែលបទ “កម្លោះស្រុកខ្មែរ” ផ្ទុះការគាំទ្រយ៉ាងគំហុកផលិតកម្ម”បារមី” បានឲ្យដឹងបែបនេះថា “សមិទ្ធផលដ៏មានមោទនភាពមួយទៀតសម្រាប់ឆ្នាំនេះ សូមអរគុណជាពិសេសទៅកាន់ពុកម៉ែបងប្អូនទាំងអស់ សម្រាប់ការគាំទ្រ”។ ផលិតកម្មបានបញ្ជាក់ថា “ឮថាបងVanthan- វណ្ណថាន និង បងVann Da- វណ្ណដា មានកាដូពិសេសជូនទាំងអស់គ្នា”។

ដោយមានការបង្ហើបដូច្នេះ គេឃើញមានអ្នកគាំទ្រ និងមហាជនពិសេសមិត្តៗយុវវ័យបានយល់ថា វណ្ណដា និង វណ្ណថាន នឹងមានបទថ្មីសម្រាប់ពួកគេឆាប់ៗនេះ ខណ:ខាងផលិតកម្ម”បារមី” បានឆ្លើយតបខ្លីថា អត់ដឹងថាពេលណាទេ ចាំសួរពួកគាត់ម្នាក់មួយទៅ។

កាលពីអំឡុងដើមខែមេសាឆ្នាំ២០២៣ ពោលគឺជិតដល់ឱកាសនៃពិធីបុណ្យចូលឆ្នាំខ្មែរ នៅលើទំព័រផេកផ្លូវការផលិតកម្ម “បារមី” បានទម្លាយ MVបទថ្មីមានចំ ណងជើងថា«កំលោះស្រុកខ្មែរ »ជាការច្រៀងរួមគ្នារវងតារាចម្រៀងរ៉េប វណ្ណដា និង វណ្ណថានខណ:ដែលបទនេះផ្ទុះការគាំទ្រខ្លាំងពីសំណាក់មហាជនទាំងក្នុងនឹងក្រៅប្រទេស។

កាលណោះបទ «កម្លោះស្រុកខ្មែរ »ចេញបានត្រឹមរយ:ខ្លីប៉ុណ្ណោះ សន្ទុះនៃការគាំទ្របានកើនឡើងខ្លាំងគួរ ឲ្យកត់សម្គាល់។ ទោះបីជាយ៉ាងណាគេរំពឹងថា សម្រាប់ការពួតដៃគ្នាធ្វើបទថ្មីរបស់ វណ្ណដា និង វណ្ណថាន នឹងមានរសជាតិថ្មីប្លែកថែម ព្រោះអ្នកទាំង២សុទ្ធតែមានទេពកោសល្យសិល្ប:ខ្លាំងដូចគ្នា៕ អត្ថបទ៖ ចាន់រ៉ា