ភ្នំពេញ ៖ បន្ទាប់ពីមានកំហុសឆ្គងដោយអចេតនា និងខ្វះស្មារតីប្រុងប្រយ័ត្ននៃក្រុមការងារបានធ្វេសប្រហេសកាន់ ទង់ជាតិបញ្ច្រាស់ក្នុងកម្មវិធី«បើកកីឡាស៊ីហ្គេ មលើកទី៣២»នៅពហុកីឡាដ្ឋានជាតិមរតកតេជោកាលពីល្ងាចថ្ងៃទី០៥ ខែឧសភាឆ្នាំ២០២៣ ផលិតកម្មថោនចេញលិខិតសុំទោសជាសាធារណ:ជូនចំពោះពលរដ្ឋ ឥណ្ឌូនេស៊ី វៀតណាម និង មីយ៉ាន់ម៉ា។

បើយោងតាមលិខិតសុំទោសរបស់ផលិតកម្មថោនបានបញ្ជាក់ថា «សូមគោរពជូនពលរដ្ឋឥណ្ឌូនេស៊ី ពលរដ្ឋវៀតណាម ពលរដ្ឋមីយ៉ាន់ម៉ា(ភូមា)ផលិតកម្មទីក្រុងភាពយន្ត សុំធ្វើការសុំទោសជាសាធារណៈនិងសុំការអនុគ្រោះជាទីបំផុត​ពីសំណាក់ពលរដ្ឋឥណ្ឌូនេស៊ី ពលរដ្ឋវៀតណាម ពលរដ្ឋមីយ៉ាន់ម៉ា (ភូមា) ដោយខ្វះស្មារតីប្រុង​ប្រយ័ត្ននៃក្រុមការ​ងារបានធ្វេសប្រហែស កាន់ទង់ជាតិបញ្រ្ចាស់ក្នុងកម្មវិធី «បើកកីឡាស៊ីហ្គេមលើកទី៣២» នៅពហុកីឡាដ្ឋាន​ជាតិមរតកតេជោកាលពីល្ងាចថ្ងៃទី០៥ ខែឧសភា ឆ្នាំ២០២៣» ។

ក្រោយពីបានពិនិត្យឡើងវិញទើបដឹងថា ក្រុមការងារបានកាន់ទង់ជាតិនៃប្រទេសសាធារណរដ្ឋឥណ្ឌូនេស៊ី ប្រទេសសាធារណរដ្ឋសង្គមនិយមវៀតណាម ប្រទេសសាធារណរដ្ឋនៃសហភាពមីយ៉ាន់ម៉ា(ភូមា)បញ្រ្ចាស់​ដោយអចេតនាជាហេតុនាំឲ្យប៉ះពាល់ដល់កិត្តិនាមនៃប្រជាជាតិខាងលើ។

លិខិតសុំទោសបានលើកឡើងទៀតថា ផលិតកម្មទីក្រុងភាពយន្តសូមធ្វើការសុំទោសជាសាធារណៈ និងសុំក្តីអនុគ្រោះ​បំផុតពីប្រមុខរាជរដ្ឋាភិបាលកម្ពុជាប្រជាពលរដ្ឋខ្មែរ និងពលរដ្ឋបរទេសបានទស្សនាផ្សាយផ្ទាល់ពីព្រឹត្តិការណ៍​កីឡាស៊ីហ្គេមលើក​ទី៣២​នៅពហុកីឡាដ្ឋានជាតិមរតកតេជោ។

លិខិតបន្តថា ជាថ្មីម្តងទៀតផលិតកម្មទីក្រុងភាពយន្ត ក្រោយចេញលិខិតសុំទោសជាសាធារណៈនេះរួច នឹងធ្វើលិខិត​សុំទោសដល់ប្រមុខរាជរដ្ឋាភិបាលកម្ពុជា ប្រជាពលរដ្ឋខ្មែរ និងដាក់លិខិតសុំទោសជូន​ដល់​បណ្តាស្ថាន​ទូតនៃប្រទេស​ខាងលើបន្ថែមទៀត៕

អត្ថបទ៖ ចាន់រ៉ា