ចុះសំបុត្រអាពាហ៍ពិពាហ៍ ២០ឆ្នាំ កុំកុំ ទើបដឹកដៃភរិយារៀបការយ៉ាងអភិជន

ក្រោយចុះអេតាស៊ីវិលរយៈពេល ២០ឆ្នាំ កាលពីថ្ងៃទី២០ ​ខែកក្កដា ឆ្នាំ២០២៣ តារាសម្ដែងហុងកុង កុំកុំ (Donnie Yen) និងភរិយាដែលជាតារាម៉ូដែល អ្នកស្រី Cissy Wang បានចាប់ដៃគ្នារៀបការតាមប្រពៃណីអឺរ៉ុប នៅបឹង Como ប្រទេសអ៊ីតាលី។

បឹង Como ស្ថិតនៅតំបន់ជើងភ្នំនៃភ្នំអាល់ ភាគខាងជើងប្រទេសអ៊ីតាលី ជាមួយនឹងទិដ្ឋភាពដ៏ស្រស់ស្អាត និងទេសភាពរ៉ូមែនទិក ជាកន្លែងពេញនិយមរបស់គូស្នេហ៍ជាច្រើនជ្រើសរើសប្រារព្ធខួបស្នេហ៍ និងពិធីមង្គលការ ក្នុងនោះរួមទាំងកំពូលតារាសម្ដែងកុងហ្វូ កុំកុំ និងភរិយាផងដែរ​។

កុំកុំ និងអ្នកស្រី Cissy បានប្រារព្ធពិធីមង្គលការយ៉ាងអភិជនតាមបែបលោកខាងលិច បន្ទាប់ពីពួកគេចុះសំបុត្រអាពាហ៍ពិពាហ៍កាលពីឆ្នាំ២០០៣ និងរួមរស់ជាមួយគ្នាមានកូនប្រុសស្រីចំនួន ៣នាក់។

អមជាមួយនឹងការបង្ហោះរូបថត តារាប្រុសវ័យ ៥៩ឆ្នាំរូបនេះ បាន​សរសេរ​នៅ​លើគណនី Weibo របស់លោក​ថា “ពេលវេលា​ដើរទៅមុខ​លឿនណាស់ មួយភ្លែតសោះប្រពន្ធ​ជា​ទី​ស្រឡាញ់​របស់​ខ្ញុំ Cissy និង​ខ្ញុំ​ បាន​ចាប់​ដៃ​គ្នា​អស់​រយៈពេល ២០ឆ្នាំទៅហើយ។ អរគុណប្រពន្ធសម្រាប់ការស្រឡាញ់ ចិត្តបរិសុទ្ធ ភាពទន់ភ្លន់ ដែលអមដំណើរបងរហូតមក និងតែងតែធ្វើជាអ្នកគាំទ្ររបស់បងជានិច្ច” ។

ពិធី​អាពាហ៍ពិពាហ៍របស់តារាជើងចាស់ហុងកុងរូបនេះ ត្រូវគេទម្លាយថា បានរៀបចំយ៉ាងប្រណីតបែបអភិជន ដែលប្រមូលផ្ដុំម៉ាកសម្លៀកបំពាក់ និងគ្រឿងតុបតែងនានា សុទ្ធសឹងប្រេនៗ ព្រមទាំងមានភ្ញៀវដែលជាសាច់ញាតិ ក៏ដូចជាមិត្តភក្តិជិតស្និទ្ធចូលរួមអបអរសាទរផងដែរ៕

ប្រែសម្រួល៖ សន្យា

ចុចអាន៖ ស្ថានភាពជីវិត សាន់ ឆាយ តួឯកស្រីរឿង F4 តៃវ៉ាន់ ក្រោយចប់ការចាក់ផ្សាយ ២២ឆ្នាំ