ជីវិតកម្សាន្ដ

ឧកញ៉ា ខេមរៈ សិរីមន្ត ថា ដើម្បីនាំសិល្បៈតន្ត្រីខ្មែរទៅកាន់អន្តរជាតិ ត្រូវមានធាតុផ្សំជាច្រើន

បានផុស

១ year មុន

នៅ

ថ្ងៃពុធ ២៤ មករា ២០២៤

ដោយ

កំពូលតារាចម្រៀងឧកញ៉ា ខេមរៈ សិរីមន្ត បានលើកទស្សនៈមួយបំផុសឲ្យមានការចូលរួមគាំទ្រពីគ្រប់ភាគីពាក់ព័ន្ធ ដើម្បីឆក់ឱកាសនាំសិល្បៈតន្ត្រីខ្មែរទៅកាន់ទីផ្សារអន្តរជាតិ ដោយលោកចាត់ទុកថា ផ្នែកនេះ ត្រូវមានធាតុផ្សំជាច្រើនរួមគ្នាលើកស្ទួយសិល្បៈជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គេកត់សម្គាល់ឃើញថា តារាចម្រៀងចាស់វស្សា ឧកញ៉ា ខេមរៈ សិរីមន្ត បច្ចុប្បន្នកាន់តែច្បាមបានទីផ្សារគាំទ្រច្រើនឡើងវិញ បន្ទាប់ពីតារាប្រុសរូបនេះ ចេញបទ «CALL ME PAPA» ធ្វើឲ្យកក្រើកទីផ្សារក្នុងស្រុក និងក្រៅស្រុក ដែលមានអ្នកគាំទ្រច្រើនត្រឹមរយៈពេលខ្លី។ យ៉ាងណាមិញ អ្វីដែល លោក ខេមរៈ សិរីមន្ត ចង់បានពេលនេះ គឺត្រូវការកម្លាំងសាមគ្គីគ្នា ដើម្បីសិល្បៈតន្ត្រីខ្មែរកាន់តែល្បីទៅទីផ្សារអន្តរជាតិ។

កំពូលតារាចម្រៀងមានងារជាឧកញ៉ា ខេមរៈ សិរីមន្ត បានលើកឡើងប្រយោគមួយខ្លីក្នុងន័យដូច្នេះថា «ចម្រៀងតែមួយមុខមិនទាន់គ្រប់គ្រាន់ទេ គឺមានធាតុផ្សំជាច្រើនទៀត ដើម្បីនាំសិល្បៈតន្ត្រីខ្មែរទៅអន្តរជាតិ»។ នេះជាខ្លឹមសារដែលលោកឧកញ៉ា ខេមរៈ សិរីមន្ត ទទូចចង់បាន និងស្នើដល់បណ្ដាអ្នកគាំទ្រ ក៏ដូចជាសិល្បករទាំងអស់ ត្រូវមានការចូលរួមវិញជាធ្លុងមួយក្នុងការលើកស្ទួយវិស័យសិល្បៈជាតិ។

គួរបញ្ជាក់ដែរថា តារាចម្រៀងឧកញ៉ា ខេមរៈ សិរីមន្ត ត្រូវបានមហាជន និងអ្នកគាំទ្រ សង្កេតឃើញថា បន្ទាប់ពីជោគជ័យលើការងារសិល្បៈច្រើនឆ្នាំមកនេះ គឺលោកបានសាងកេរ្តិ៍ឈ្មោះល្បីល្បាញខ្លាំង។ មិនតែប៉ុណ្ណោះ នាកំឡុងរយៈពេលប៉ុន្មានឆ្នាំចុងក្រោយនេះ លោកក៏បានងាកមកចាប់ជំនួញថ្មីមួយទៀត គឺលើវិស័យអចលនទ្រព្យ ដោយបានធ្វើការអភិវឌ្ឍជាផ្ទះ និងដីឡូត៍នៅតំបន់មួយចំនួន ជាពិសេសក្នុងខេត្តបន្ទាយមានជ័យ៕

អត្ថបទ ៖ ចាន់រ៉ា