Miss Mera Cambodia បង្កើតដោយកូនខ្មែរ បានរកឃើញម្ចាស់មកុដដំបូងគេហើយ

ក្រោយដំណើរការអស់រយៈពេលជាច្រើនខែ ពេលនេះកម្មវិធី Miss Mera Cambodia 2024 បានរកឃើញនារីឯកដែលជាម្ចាស់មកុដកាលពីយប់មិញរួចទៅហើយ គឺកញ្ញា ថាន រតនា។

បើទោះបីជាការបើកទំព័រថ្មីរបស់កម្មវិធី Miss Mera Cambodia ក៏ពិតមែន តែកម្មវិធីដែលកូនខ្មែរបានបង្កើតឡើងមួយនេះ វាពិតជាធ្វើឲ្យអ្នកគាំទ្រវិស័យបវរកញ្ញានៅប្រទេសកម្ពុជាកោតសរសើរដឹកដៃនៃការដឹកនាំ និងរៀបចំកម្មវិធីបានយ៉ាងល្អ។ ដោយកាលពីយប់មិញនេះ អ្នកទស្សនាតាមការ Live និងផ្ទាល់ បានសម្ដែងការភ្ញាក់ផ្អើលក្រោយការរៀបចំដ៏អស្ចារ្យរបស់កម្មវិធី Miss Mera Cambodia បង្កើតដោយកូនខ្មែរ កញ្ញា ខាត់ ស្រីច័ន្ទ ដែលជាអតីតលំដាប់រងទី៤ Miss Grand Cambodia 2020 មិនថា ភ្លើង ឆាក ភ្លេង កាមេរ៉ា និងសំលៀកបំពាក់បវរកញ្ញា គឺឃើញថាល្អច្រើន។

ទន្ទឹងនឹងនោះ កម្មវិធី Miss Mera Cambodia 2024 ក៏បានរកឃើញម្ចាស់មកុដដំបូងគេ គឺកញ្ញា ថាន រតនា ក្រោយចំណាយពេលវេលាអស់រយៈពេលជាច្រើនខែមកនេះ ហើយលំដាប់រងទីមួយបានទៅកញ្ញា លឹម ណាលី និងលំដាប់រងទី៣ បានទៅលើកញ្ញា សូ​ ពេជ្រវលក្ខណ៍។ បើក្រឡេកទៅមើលពីម្ចាស់កមុដវិញ នៅមិនទាន់ដឹងច្បាស់ថានឹងចេញទៅប្រកួតក្នុងកម្មវិធីណាមួយទេ ប៉ុន្តែតាមការបញ្ជក់របស់ម្ចាស់កម្មវិធី Miss Mera Cambodia កញ្ញា ខាត់ ស្រីច័ន្ទ បានឲ្យដឹងថា មានខាងកម្មវិធីអន្តរជាតិ ២ ៣ រួចមកហើយទាក់ទងមកដើម្បីបញ្ជូនបវរកញ្ញាទៅចូលរួមប្រកួតតែកញ្ញានៅមិនទាន់សម្រេចចិត្តនៅឡើយទេ៕

អត្ថបទ៖ ផានិត