តារារ៉េប G-Devith ថា ឆ្នាំ២០២៤ បានគ្រប់យ៉ាង ប៉ុន្តែបាត់របស់មួយ គឺទំនុកចិត្ត

លើវិថីសិល្បៈរយ:ពេលប៉ុន្មានឆ្នាំមកនេះ សង្កេតឃើញថា តារាចម្រៀងរ៉េប លោក ងួន ចាន់ដេវីត ពិតជាមានភាពលេចធ្លោខ្លាំងមិនធម្មតា និងបានកសាងនូវស្នាដៃសិល្បៈសហសម័យផងដែរ។ តួយ៉ាង ក្នុងឆ្នាំ២០២៤នេះ លោកនិងភរិយា ក៏បានរួមចំណែកលើកស្ទួយវប្បធម៌ជាតិ តាមរយៈការនិពន្ធចម្រៀង និងព្រឹត្តិការណ៍លើកស្ទួយវប្បធម៌ ដែលមិនធ្លាប់មានសិល្បករសិល្បការិនីរូបណាធ្វើនោះឡើយ។

តាមរយៈចម្រៀងរ៉េប ដែលរំលេចនូវប្រវត្តិសាស្ត្រ និងអរិយធម៌ខ្មែរពេញដោយអត្ថន័យជាច្រើនបទ លោក ងួន ចាន់ដេវីត ទទួលបានការចាប់អារម្មណ៍កាន់តែខ្លាំងពីសំណាក់មហាជន និងស្ងើចសរសើរចំពោះសមត្ថភាពរបស់តារាចម្រៀងរូបនេះ ដែលមិនត្រឹមអាចនិពន្ធ និងច្រៀងប៉ុណ្ណោះទេ លោកនៅអាចចាប់យកពីគុណតម្លៃនៃវប្បធម៌ជាតិកាន់តែជ្រៅ យកមកបង្ហាញតាមបទចម្រៀងទៀតផង។

ស្របពេលដែលអាជីពសិល្ប: កាន់តែមានភាពរីកចម្រើននិងទទួលបានផ្លែផ្កាគួរជាទីមោទន: លោក ងួន ចាន់ដេវីត ស្រាប់តែទម្លាយអារម្មណ៍ខ្លួនថា អំឡុងឆ្នាំ២០២៤ លោកបានគ្រប់យ៉ាង ប៉ុន្តែបាត់របស់មួយគឺទំនុកចិត្ត។

G-Devith បានបញ្ជាក់ខ្លីថា “ឆ្នាំ២០២៤ បានគ្រប់យ៉ាង តែបាត់របស់មួយគឺទំនុកចិត្ត តែរឿងនេះ ខ្ញុំមិនមែនអ្នកខាតទេប្រហែលអាចជាគេអ្នកខាតច្រើនជាង ជូនពរសំណាងល្អ។ ទោះបីយ៉ាងណា លោកមិនបានបង្ហើបឱ្យដឹងទេថា លោកមានការខកបំណង ឬអន់ចិត្តនឹងរឿងអ្វីនោះឡើយ”។

សូមជម្រាបថា លោក ងួន ចាន់ដេវីដ និងភរិយា ត្រូវបានគេស្គាល់ថា ជាតារាចម្រៀងគូស្នេហ៍ ដែលនៅតែមានប្រជាប្រិយភាពក្នុងបេះដូងអ្នកគាំទ្រ បន្ទាប់ពីចាប់ដៃគ្នាដើរលើវិថីចម្រៀងរ៉េប លែងជ្រកក្រោមផលិតកម្ម្ម និងទោះបីជាក្លាយជាឪពុកម្តាយគេហើយក៏ដោយ ការងារសិល្បៈរបស់ប្តីប្រពន្ធមួយគូនេះ នៅតែមមារញឹកដដែល៕ អត្ថបទ៖ ចាន់រ៉ា