កុយ អេនណា ដើរដល់ស្រុកមួយ ក្នុងទឹកដីខេត្តសៀមរាបហើយ

ដំណើរថ្មើជើងក្រោមប្រធានបទ “ដើរដោយក្តីសង្ឃឹម ដើរដើម្បីទេសចរណ៍” ដែលគិតមកទល់ពេលនេះ គឺមានរយ:ពេល ១៦ថ្ងៃរបស់ កុយ អេណា គឺបានឈានចូលដល់ទឹកដីនៃខេត្តសៀមរាបហើយ។ នេះបើតាមការបញ្ជាក់ឲ្យដឹងពី កុយ អេណា នៅវេលាព្រឹកថ្ងៃនេះ។

ប្រាកដណាស់ បើគិតមកទល់ត្រឹមថ្ងៃទី១៩ ខែកញ្ញាឆ្នាំ ២០២៥នេះ គឺរយៈពេល ១៦ថ្ងៃមកហើយនៃដំណើរបេសកកម្មរបស់បវរកញ្ញា កុយ អេនណា ដែលបានចាកចេញពីទីក្រុងភ្នំពេញទៅកាន់ខេត្តសៀមរាប ក្នុងកម្មវិធីសប្បុរធម៌លើកដំបូងរបស់ខ្លួន ក្រោមប្រធានបទ «ដើរដោយក្តីសង្ឃឹម ដើរដើម្បីទេសចរណ៍» បើគិតចាប់តាំងពីព្រឹកថ្ងៃទី០៤ ខែកញ្ញាឆ្នាំ ២០២៥ កន្លងទៅ។

តួយ៉ាង ភ្លាមៗឈានដល់ទឹកដីខេត្តសៀមរាប កញ្ញា កុយ អេនណា បានបញ្ជាក់ពីអារម្មណ៍របស់ខ្លួនដូច្នេះថា “រំភើបណាស់អរគុណដែលបានដំឡើងផ្ទាំងប៉ាណូត្រៀមស្វាគមន៍រូបនាងខ្ញុំនៅកំពង់ក្តីបន្តិចទៀតនាងខ្ញុំទៅដល់ហើយ”។

ដំណើរថ្មេីជេីងរបស់ អេនណា មកដល់ពេលនេះគឺធ្វើឡើងប្រកបដោយសុវត្ថិភាព និងទទួលបានការស្វាគមន៍យ៉ាងកក់ក្តៅពីប្រជាពលរដ្ឋគ្រប់មជ្ឈដ្ឋានទាំងចាស់ក្មេង-ប្រុសស្រី។

គួរបញ្ជាក់ដែរថា ដំណើរថ្មើរជើងរបស់កញ្ញា កុយ អេន ណា ធ្វើឡើងក្នុងគោលបំណងធំៗចំនួន២ គឺ ដើម្បីរៃអង្គាសថវិកាសប្បុរសធម៌ជួយគាំទ្រដល់កុមារ និងជនពិការក្នុងមណ្ឌលខ្វះខាតនៅកម្ពុជា និងមួយទៀត ដើម្បីចូលរួមចំណែកផ្សព្វផ្សាយទេសចរណ៍ពីរាជធានីភ្នំពេញឆ្ពោះទៅកាន់ទឹកដីសៀមរាបប្រមាណជាង ៣០០ គីឡូម៉ែត្រ៕ ចាន់រ៉ា