មនុស្សរាប់ពាន់នាក់ត្រូវជម្លៀសចេញពីឆ្នេរសមុទ្រហ្វីលីពីន ខណៈព្យុះថ្មី Fengshen ខិតជិតមកដល់

អ្នកស្រុករាប់ពាន់នាក់នៅតាមបណ្តោយឆ្នេរសមុទ្រប៉ាស៊ីហ្វិករបស់ប្រទេសហ្វីលីពីនបានជម្លៀសចេញពីផ្ទះរបស់ពួកគេនៅថ្ងៃសៅរ៍នេះ ខណៈដែលព្យុះត្រូពិកថ្មី Fengshen ខិតជិតមកដល់និងនាំមកនូវភ្លៀងធ្លាក់ខ្លាំងនិងទឹកជំនន់ធ្ងន់ធ្ងរ។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី១៨ខែតុលា។

យោងតាមការិយាល័យអាកាសធាតុហ្វីលីពីន ព្យុះនេះត្រូវបានគេរំពឹងថានឹងបោកបក់ជាលើកដំបូងទៅលើខេត្តCatanduanes នៅល្ងាចថ្ងៃសៅរ៍នេះ ដោយមានខ្យល់បក់រហូតដល់ ៩០ គីឡូម៉ែត្រក្នុងមួយម៉ោង បន្ទាប់មកនឹងវាយប្រហារឆ្នេរសមុទ្រភាគខាងកើតកោះ Luzon នៅព្រឹកថ្ងៃអាទិត្យ។

អាជ្ញាធរហ្វីលីពីន​បាន​ព្រមាន​ពី​រលកសមុទ្រ​កម្ពស់​ពី​១​ទៅ​២​ម៉ែត្រ និង​អាច​នឹង​មាន​ទឹកជំនន់​នៅ​តំបន់​មាត់សមុទ្រ។ ជាការប្រុងប្រយ័ត្ន មនុស្សជិត១ម៉ឺន៧ពាន់នាក់នៅក្នុងខេត្ត Albay និងជាង៩ពាន់ នាក់នៅខេត្ត Catanduanes បានផ្លាស់ប្តូរទៅកាន់មជ្ឈមណ្ឌលជម្លៀសរួចហើយ។ មន្ត្រីមូលដ្ឋានហ្វីលីពីនក៏បានដំណើរការផែនការសង្គ្រោះបន្ទាន់ផងដែរ ជាពិសេសសម្រាប់អ្នករស់នៅក្បែរឆ្នេរសមុទ្រ តំបន់ទឹកជំនន់ និងតំបន់ដែលងាយនឹងបាក់ដី។

គួរបញ្ជាក់ថាការមកដល់របស់ព្យុះ Fengshen កើតឡើងស្របពេលដែលប្រទេសនេះនៅតែងើបឡើងវិញពីការរញ្ជួយដីជាបន្តបន្ទាប់ដែលបានសម្លាប់មនុស្សយ៉ាងហោចណាស់ ៨៧ នាក់ក្នុងរយៈពេលបីសប្តាហ៍កន្លងមកនេះ។

ប្រទេសហ្វីលីពីន ប្រឈមនឹងព្យុះចំនួន ២០ ក្នុងមួយឆ្នាំ គឺជាប្រទេសមួយដែលងាយរងគ្រោះនឹងគ្រោះមហន្តរាយធម្មជាតិបំផុតនៅក្នុងពិភពលោក ខណៈអ្នក​ជំនាញ​និយាយ​ថា ការ​ប្រែប្រួល​អាកាស​ធាតុ​កំពុង​ធ្វើ​ឱ្យ​ព្យុះ​ទាំង​នេះ​កាន់​តែ​ញឹកញាប់ និង​ខ្លាំងជាងមុនទៅទៀត៕

អត្ថបទ៖ ប៊ុន សុភាព