ចិន កោះហៅឯកអគ្គរដ្ឋទូតហ្វីលីពីន ជុំវិញការប៉ះទង្គិចគ្នានៅសមុទ្រ​ចិន​ខាង​ត្បូង

ទីក្រុងប៉េកាំង បានប្រកាស​នៅ​ថ្ងៃអង្គារ ទី​២១ ខែ​កក្កដា ឆ្នាំ​២០២៦ នេះ ថា ខ្លួនបានកោះហៅឯកអគ្គរដ្ឋទូតហ្វីលីពីនប្រចាំនៅប្រទេសចិន ដើម្បីធ្វើការតវ៉ាជាផ្លូវការ បន្ទាប់ពីមានការប៉ះទង្គិចគ្នារវាងនាវារបស់ប្រទេសទាំងពីរនៅ​ក្នុង​តំបន់ Second Thomas Shoal កាលពីថ្ងៃចន្ទ។

យោងតាម​ Reuters ហេតុការណ៍នេះ បានកើតឡើងស្របពេលដែលប្រទេសទាំងពីរ បានចោទប្រកាន់គ្នាទៅវិញទៅមក ដោយភាគីទីក្រុងម៉ានីលអះអាងថា មន្ត្រីកងទ័ពជើងទឹករបស់ខ្លួនម្នាក់ ត្រូវបានគេ​វាយចំក្បាល ខណៈដែលភាគីចិនបញ្ជាក់​ថា ហ្វីលីពីនជាអ្នកបង្កហេតុមុន។

យ៉ាងណាមិញ ក្នុងថ្ងៃដដែលនោះ ឆ្មាំសមុទ្រចិនបានរៀបរាប់​ថា ខ្លួនបានអនុញ្ញាតឱ្យភាគីហ្វីលីពីនធ្វើការបញ្ជូនបុគ្គលិក ដែលរងរបួសចេញពីនាវាចម្បាំងហ្វីលីពីន ដែលមាន​ជម្លោះ​នោះ ដោយប្រើប្រាស់ទូកតូច ​ផ្អែក​​លើគោលការណ៍​មនុស្សធម៌។ រហូតមកទល់ពេលនេះ ស្ថានទូតហ្វីលីពីនប្រចាំនៅទីក្រុងប៉េកាំង មិនទាន់មានការឆ្លើយតបណាមួយ ចំពោះសំណើសុំការអត្ថាធិប្បាយ ជុំវិញបញ្ហានេះនៅឡើយទេ៕

ប្រែសម្រួល៖ ឈាង