ព័ត៌មានអន្ដរជាតិ

រុស្ស៊ី ប្តេជ្ញាឆ្លើយតបបើអាមេរិក បំពានគោល ការណ៍ ផ្អាកសាកល្បងនុយក្លេអ៊ែរ

បានផុស

៨ ខែ មុន

នៅ

ថ្ងៃសុក្រ ៣១ តុលា ២០២៥

ដោយ

ប៉ុន្មានម៉ោងប៉ុណ្ណោះបន្ទាប់ពីប្រធានាធិបតីអាមេរិក ប្រកាសពីផែនការសាកល្បងអាវុធនុយក្លេអ៊ែរឡើងវិញ ក្រោយផ្អាកអស់៣ទសវត្សរ៍ ស្រាប់តែភាគីរុស្ស៊ី បានចេញមកព្រមានថា ខ្លួននឹងឆ្លើយតបបើទីក្រុងវ៉ាស៊ីនតោនបំពានគោលការណ៍អាវុធនុយក្លេអែរ។ នេះបើតាមការផ្សាយរបស់ RT។

អាវុធនុយក្លេអ៊ែររុស្ស៊ី (រូបថត៖ Sputnik)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការព្រមាននេះគឺចេញពីមាត់អ្នកនាំពាក្យវិមានក្រឹមឡាំង Dmitry Peskov ដែលប្រកាសកាលពីថ្ងៃព្រហស្បតិ៍ទី៣០ខែតុលាឆ្នាំ២០២៥ថា៖ «លោកប្រធានាធិបតីរុស្ស៊ី វ្ល៉ាឌីមៀរ ពូទីន បានចេញសេចក្តីថ្លែងការណ៍ម្តងហើយម្តងទៀតថា ប្រសិនបើនរណាម្នាក់បំពានលើគោលការណ៍ផ្អាកសាកល្បងនុយក្លេអ៊ែរជាបណ្ដោះអាសន្ន នោះទីក្រុងមូស្គូនឹងចាត់វិធានការទៅតាមនោះផងដែរ»។

ការអះអាងនេះកើតឡើងបន្ទាប់ពី លោក ដូណាល់ ត្រាំ ចេញបញ្ជាឲ្យក្រសួងការពារជាតិចាប់ផ្តើមសាកល្បងអាវុធនុយក្លេអ៊ែរឡើងវិញជាបន្ទាន់ៗ បន្ទាប់ពីផ្អាកតាំងតែពីឆ្នាំ១៩៩២មកម៉្លេះ។

នៅក្នុងការបង្ហោះតាមប្រព័ន្ធផ្សព្វផ្សាយសង្គមដែលធ្វើឡើងភ្លាមៗមុនពេលកិច្ចប្រជុំជាមួយប្រធានាធិបតីចិន ស៊ី ជីនពីង នៅទីក្រុងប៊ូសាន ប្រទេសកូរ៉េខាងត្បូង លោកត្រាំ និយាយថា ចំណាត់ការនេះគឺដើម្បីឆ្លើយតបទៅនឹងកម្មវិធីសាកល្បងនុយក្លេអ៊ែរដែលធ្វើឡើងដោយប្រទេសជាគូប្រជែង។

ការប្រកាសនេះ តំណាងឲ្យការផ្លាស់ប្តូរយ៉ាងខ្លាំងក្នុងគោលនយោបាយនុយក្លេអ៊ែររបស់សហរដ្ឋអាមេរិក ដែលមានជាយូរមកហើយ។ អាមេរិកមិនបានធ្វើការសាកល្បងនុយក្លេអ៊ែរពេញលេញចាប់តាំងពីឆ្នាំ១៩៩២មក ដែលជាការផ្អាកដោយខ្លួនឯងដើម្បីជាផ្នែកមួយនៃកិច្ចខិតខំប្រឹងប្រែងអន្តរជាតិក្នុងការកម្រិតការរីកសាយអាវុធនុយក្លេអ៊ែរ។

សូមជម្រាបថា បើតាមការប៉ាន់ស្មានរបស់វិទ្យាស្ថានស្រាវជ្រាវសន្តិភាពអន្តរជាតិស្តុកខុល (SIPRI), រុស្ស៊ីឈរលេខ១លើពិភពលោកជាប្រទេសមានក្បាលគ្រាប់នុយក្លេអ៊ែរច្រើនជាងគេ (៥ ៤៥៩គ្រាប់), លេខ២ អាមេរិក (៥ ១៧៧គ្រាប់) និងលេខ៣ចិន ដែលគេព្យាករណ៍ថា នឹងឈានដល់ ១ ៥០០គ្រាប់ ត្រឹមឆ្នាំ២០៣៥៕

អត្ថបទ៖ សុខ សុវណ្ណ

ចុចអាន៖ អាមេរិកនឹងសាកល្បងអាវុធនុយក្លេអ៊ែរភ្លាមៗឡើងវិញ ក្រោយផ្អាកអស់៣ទសវត្សរ៍