ជប៉ុន ផ្អាកជើងហោះហើរភ្លាមៗ ក្រោយផ្ទុះភ្នំភ្លើងគំរាមគំហែងដល់ជីវិត

ការផ្ទុះដ៏ខ្លាំងក្លាមួយបានវាយប្រហារភ្នំភ្លើង Sakurajima នៅលើកោះ Kyushu ភាគនិរតីនៃប្រទេសជប៉ុន កាលពីព្រឹកថ្ងៃអាទិត្យទី ១៦ ខែវិច្ឆិកា ដោយបញ្ជូនផ្សែង-ផេះយ៉ាងច្រើនសន្ធឹកសន្ធាប់ឡើងដល់កម្ពស់ ៤.៤ គីឡូម៉ែត្រ និងបណ្តាលឲ្យមានការលុបចោលជើងហោះហើរជាងរាប់សិបភ្លាមៗ។

ទីភ្នាក់ងារឧតុនិយមជប៉ុន (JMA) បានរាយការណ៍ថា ការផ្ទុះដំបូងបានកើតឡើងនៅម៉ោងប្រហែល ១ ព្រឹក ម៉ោងក្នុងស្រុកនៅជិតរណ្តៅ Minamidake បន្ទាប់មកដោយការផ្ទុះពីរបន្ថែមទៀតនៅម៉ោងប្រហែល ២:៣០ ព្រឹក និង ៨:៥០ ព្រឹក។ ផេះភ្នំភ្លើងបានអណ្តែតទៅភាគឦសាន ប៉ះពាល់ដល់ទីក្រុង Kagoshima ក៏ដូចជាខេត្ត Miyazaki និងផ្នែកខ្លះនៃតំបន់ Kumamoto។

អាជ្ញាធរមូលដ្ឋានបានរាយការណ៍ថា ជើងហោះហើរប្រហែល ៣០ ចេញចូលអាកាសយានដ្ឋាន Kagoshima ត្រូវបានលុបចោលដោយសារតែផេះធ្លាក់ និងវិធានការសុវត្ថិភាពពាក់ព័ន្ធ ។ យ៉ាងណាក៏ដោយ មិនមានរបាយការណ៍អំពីការរងរបួស ឬការខូចខាតរចនាសម្ព័ន្ធអគារទេ ប៉ុន្តែថ្មភ្នំភ្លើងធំៗត្រូវបានខ្ចាយទៅដល់ស្ថានីយ៍ទីប្រាំនៃភ្នំភ្លើង ដែលបង្ហាញពីភាពធ្ងន់ធ្ងរនៃការផ្ទុះ។ ប៉ុន្តែមិនមានលំហូរភ្នំភ្លើង pyroclastic ត្រូវបានគេសង្កេតឃើញ ក្នុងអំឡុងពេលហរតុការណ៍ផ្ទុះនោះទេ។

សូមបញ្ចាក់ដែរថា Sakurajima គឺជាភ្នំភ្លើងសកម្មបំផុតមួយក្នុងប្រទេសជប៉ុន ហើយត្រូវបានត្រួតពិនិត្យយ៉ាងដិតដល់ដោយសារតែការផ្ទុះញឹកញាប់របស់វា។ ភ្នំភ្លើងនេះ ដើមឡើយជាកោះមួយមុនពេលត្រូវបានភ្ជាប់ទៅនឹងឧបទ្វីប Osumi ក្នុង Kyushu បន្ទាប់ពីលំហូរកម្អែលភ្នំភ្លើងដ៏ធំមួយ ក្នុងឆ្នាំ ១៩១៤៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

១១ នាក់ស្លាប់ និង១២ នាក់បាត់ខ្លួន ក្នុងហេតុការណ៍បាក់ដីនៅ ឥណ្ឌូណេស៊ី