លោក ត្រាំ នឹងទូរស័ព្ទមកមេដឹកនាំកម្ពុជានិងថៃ ដើម្បីបញ្ចប់សង្គ្រាម

ប្រធានាធិបតីអាមេរិក ដូណាល់ ត្រាំ ប្រកាសថា លោកនឹងទូរស័ព្ទទៅមេដឹកនាំកម្ពុជានិងថៃ ដើម្បីបញ្ចប់សង្គ្រាម បន្ទាប់ពីការប្រយុទ្ធគ្នាបានផ្ទុះឡើងសាជាថ្មីនៅព្រំដែន។ នេះបើតាមការផ្សាយរបស់ Bloomberg នៅថ្ងៃពុធទី១០ខែធ្នូឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងព្រឹត្តិការណ៍មួយនៅរដ្ឋ Pennsylvania មេដឹកនាំមហាអំណាចផុតលេខរូបនេះបញ្ជាក់ថា៖ «លោកនឹងទូរស័ព្ទទៅមេដឹកនាំកម្ពុជា-ថៃនៅថ្ងៃស្អែក ហើយ​បញ្ឈប់​សង្គ្រាម​រវាង​ប្រទេស​ដ៏​មាន​ឥទ្ធិពល​ទាំងពីរ»។

ការប្រកាសរបស់លោក ត្រាំ កើតឡើងស្របពេលការប្រយុទ្ធនៅព្រំដែនកម្ពុជា-ថៃ បានផ្ទុះឡើងសាជាថ្មី ដែលផ្តើមចេញពីការឈ្លានពានរបស់ថៃ រហូតធ្វើឲ្យកម្ពុជាអស់ការអត់ធ្មត់ ក៏បង្ខំចិត្តតបតទៅវិញ។

មុននេះដែររដ្ឋមន្ត្រីការបរទេសអាមេរិក Marco Rubio និយាយថា៖ «អាមេរិក​ព្រួយ​បារម្ភខ្លាំងណាស់ បន្ទាប់ពីការ​ប្រយុទ្ធ​គ្នាផ្ទុះឡើងជាថ្មី ​នៅទីតាំង​មួយចំនួនតាម​បណ្តោយ​ព្រំដែន​កម្ពុជា-ថៃ បណ្តាលឲ្យមានការ​ស្លាប់មនុស្ស​និង​របួសជាច្រើននាក់»។

លោកបន្តថា៖ «យើងសូមជំរុញយ៉ាងមុតមាំឲ្យបញ្ឈប់ជាបន្ទាន់នូវអរិភាព ហើយការពារជនស៊ីវិល ដោយភាគីទាំងសងខាងត្រូវត្រឡប់ទៅរកវិធានការបន្ធូរបន្ថយភាពតានតឹង ដែលមានចែងក្នុងកិច្ចព្រមព្រៀងសន្តិភាពទីក្រុងគូឡាឡាំពួថ្ងៃទី២៦ ខែតុលា ឆ្នាំ២០២៥ ដែលចុះហត្ថលេខាដោយនាយករដ្ឋមន្ត្រីកម្ពុជា និងថៃ និងធ្វើជាសាក្សីដោយប្រធានាធិបតីអាមេរិក ដូណាល់ ត្រាំ និងនាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម»។

សូមជម្រាបជាថ្មី ជម្លោះកម្ពុជា-ថៃ គឺជាជម្លោះមួយក្នុងចំណោមប្រាំបី ដែលលោកត្រាំ អះអាងថា បានបញ្ចប់តាមរយៈការគំរាមយកពន្ធ និងគោលនយោបាយសន្តិភាពរបស់រដ្ឋាភិបាលទីក្រុងវ៉ាស៊ីនតោន៕

អត្ថបទ៖ សុខ សុវណ្ណ