គណបក្ស Kla Tham តែងតាំងបុគ្គលមានរឿងអាស្រូវពាក់ព័ន្ធ Scammer ជាបេក្ខជននាយករដ្ឋមន្ត្រីថៃ

Kla Tham​ ដែលជាគណបក្សមានឥទ្ធិពលមួយក្នុងនយោបាយថៃនាពេលបច្ចុប្បន្ន បានបញ្ជាក់ពីការតែងតាំងលោក Thamanat Prompow (ថាម៉ាណាត ព្រហ្មផៅ) ជាបេក្ខជនប្រជែងតំណែងនាយករដ្ឋមន្ត្រី ក្នុងការបោះឆ្នោតនាពេលខាងមុខ។

តាមការផ្សាយរបស់ Bangkok Post, មេបក្ស Kla Tham លោកស្រី Narumon Pinyosinwat (ណារីមន ភីណូស៊ីនវ៉ាត់) បានអះអាងកាលពីថ្ងៃអង្គារទី១៦ខែធ្នូឆ្នាំ២០២៥ថា គណបក្សគ្មានផែនការ ដាក់ឈ្មោះបេក្ខជននាយករដ្ឋមន្ត្រីឲ្យគ្រប់ចំនួនអតិបរមា៣រូបទេ ប៉ុន្តែផ្តោតសំខាន់លើលក្ខណៈសម្បត្តិសមត្ថភាពជាជាងចំនួន។

លោក Thamanat គឺជាបុគ្គលម្នាក់ដែលញាំញីដោយរឿងអាស្រូវជាប់ពាក់ព័ន្ធនឹងបណ្តាញក្រុមឧក្រិដ្ឋជនឆបោកតាមអនឡាញ ដ្បិតលោកចេញមុខបដិសេធម្តងហើយម្តងទៀតក៏ដោយ។

អតីតរដ្ឋមន្ត្រីក្រសួងកសិកម្មរូបនេះ បានរងការចោទប្រកាន់និងពាក្យរិះគន់ជាច្រើន ទាក់ទងនឹងសកម្មភាពខុសច្បាប់ ជាពិសេស Scammer តែម្តង។

កាលពីកន្លងទៅ លោក Chuvit Kamolvisit ជាអ្នកនយោបាយនិងជាអ្នកលាតត្រដាងរឿងអាស្រូវនៅថៃ បានចោទប្រកាន់លោក Thamanat ថា មានទំនាក់ទំនងជាមួយ ក្រុមឧក្រិដ្ឋជនចិនពណ៌ប្រផេះ (Chinese Grey Capital) ដែលប្រតិបត្តិការនៅក្នុងប្រទេសថៃ។

ក្រុមទាំងនេះជារឿយៗត្រូវបានផ្សារភ្ជាប់ទៅនឹងការលាងលុយកខ្វក់ បនល្បែងស៊ីសងខុសច្បាប់ និងក្នុងករណីខ្លះ គឺការគាំទ្រដល់បណ្តាញឆបោកតាមប្រព័ន្ធបច្ចេកវិទ្យា (Call Center Scams)។

កាលពីខែតុលា សមាជិកសភាគណបក្សប្រជាជនថៃ Rangsiman Rome ក៏ចោទលោក Thamanat ​ផងដែរ ជុំវិញទំនាក់ទំនងដ៏គួរឲ្យសង្ស័យជាមួយមេក្រុមឧក្រិដ្ឋកម្មអនឡាញសញ្ជាតិអាហ្វ្រិកខាងត្បូងម្នាក់។ មិនត្រឹមប៉ុណ្ណឹង លោក Rangsiman ថែមទាំងបង្ហាញរូបថតប៉ុន្មានសន្លឹក ដែលលោក Thamanat នៅជាមួយបុរសសញ្ជាតិអាហ្វ្រិកខាងត្បូងក្នុងពិធីសាសនានាទៀតផង។

ម្យ៉ាងលោក Thamanat ត្រូវបានកោះហៅឲ្យបង្ហាញខ្លួននៅចំពោះមុខគណៈកម្មាធិការសភាសន្តិសុខរដ្ឋម្តងរួចហើយ ដើម្បីបំភ្លឺពីទំនាក់ទំនងរបស់គាត់ជាមួយមេក្រុមឧក្រិដ្ឋកម្មម្នាក់នោះ។

សូមជម្រាបថា ​ការ​បោះឆ្នោត​ជាតិ​នៃប្រទេសថៃ នឹងរៀបចំឡើង​នៅ​ថ្ងៃ​ទី​​៨​ខែ​កុម្ភៈ​ឆ្នាំ​​២០២៦ បន្ទាប់ពី​ការ​រំលាយ​សភា​កាល​ពី​ថ្ងៃ​ទី​១២​​ធ្នូ​៕

អត្ថបទ៖ សុខ សុវណ្ណ