បក្សភឿថៃ ដាក់​បេក្ខជន​នាយករដ្ឋមន្ត្រី​បី​រូប​សម្រាប់​ការបោះឆ្នោត​ខែ​កុម្ភៈឆ្នាំ​២០២៦

គណបក្ស​ភឿថៃ បាន​ប្រកាស​ឈ្មោះ​​បេក្ខជន​នាយករដ្ឋមន្ត្រី​ចំនួន​បី​រូប មុន​ការ​បោះឆ្នោត​ជាតិ​ ដែល​ត្រូវ​បាន​រំពឹង​ទុក​នៅ​ថ្ងៃ​ទី​​៨​ខែ​កុម្ភៈ​ឆ្នាំ​​២០២៦ បន្ទាប់ពី​ការ​រំលាយ​សភា​កាល​ពី​ថ្ងៃ​ទី​១២​​ធ្នូ​។

ចេញផ្សាយ​នា​ថ្ងៃ​អង្គារ​ទី​១៦​ធ្នូ សារព័ត៌មាន Thai Enquirer បាន​ឲ្យ​ដឹង​ថា បេក្ខជន​ដែល​ត្រូវ​បាន​តែងតាំង​មាន​ លោក Julapun Amornvivat ដែល​ជា​មេដឹកនាំ​គណបក្ស, លោក Suriya Juangroongruangkit ដែល​ជា​អ្នក​នយោបាយ​ជើងចាស់ និង​ជា​អតីត​រដ្ឋមន្ត្រី​ក្រសួង​ដឹកជញ្ជូន, និង​លោក Yodchanan Wongsawat ដែល​ជា​ក្មួយប្រុស​របស់​អតីត​នាយករដ្ឋមន្ត្រី លោក ថាក់ស៊ីន ស៊ីណាវ៉ាត្រ។

លោក Julapun Amornvivat វ័យ៥០ឆ្នាំ ជាប្រធានគណបក្ស និងជាឥស្សរជនឆ្នើមមកពីខេត្តឈៀងម៉ៃ។ លោក Julapun ដែលបានចាប់ផ្តើមអាជីពនយោបាយរបស់លោកក្នុងសម័យកាលថៃរ៉ាក់ថៃ ត្រូវបានគេស្គាល់ដោយសារការផ្តោតលើគោលនយោបាយសេដ្ឋកិច្ច និងបានតស៊ូមតិក្នុងការផ្គូរផ្គងសមាជិកបក្សវ័យក្មេងជាមួយអ្នកនយោបាយជើងចាស់។​ ចំណែក​ឯ​លោក Suriya Jungrungreangkit វ័យ៧១ឆ្នាំ ជាប្រធាននាយកការបោះឆ្នោតរបស់គណបក្សភឿថៃ និងជាអ្នកនយោបាយជើងចាស់ដែលធ្លាប់កាន់តំណែងរដ្ឋមន្ត្រីជាច្រើន រួមទាំងតំណែងជាឧបនាយករដ្ឋមន្ត្រីផងដែរ។ លោកត្រូវបានចាត់ទុកនៅក្នុងបក្សថាជាអ្នកសម្រុះសម្រួលអំណាចដែលមានបទពិសោធន៍។

លោក Yodchanan ដែលមានវ័យ៤៦ឆ្នាំ គឺជាកូនប្រុសច្បងរបស់អតីតនាយករដ្ឋមន្ត្រី លោក Somchai Wongsawat និងអ្នកស្រី Yaowapha Wongsawat ដែលជាបងស្រីរបស់លោកថាក់ស៊ីន។ ក្នុងអំឡុងពេលរដ្ឋបាលរបស់លោកស្រី ផែថងថាន ស៊ីណាវ៉ាត្រ លោក Yodchanan បានបម្រើការជាសមាជិកអ្នកជំនាញនៃក្រុមប្រឹក្សាភិបាលនៃទីភ្នាក់ងារអភិវឌ្ឍន៍រដ្ឋាភិបាលឌីជីថល ដោយផ្តោតលើការគ្រប់គ្រង និងធនធានមនុស្ស។ លោកក៏បានចូលរួមក្នុងកម្មវិធីអ្នកជំនាញវ័យក្មេងភឿថៃក្នុងនាមជាវាគ្មិនផងដែរ។

បច្ចុប្បន្ន លោក Yodchanan កំពុងបម្រើការជាអនុប្រធានផ្នែកស្រាវជ្រាវ និងទំនាក់ទំនងអន្តរជាតិ និងជានាយកមន្ទីរពិសោធន៍ BCI (Brain–Computer Interface) នៃមហាវិទ្យាល័យវិស្វកម្មរបស់សាកលវិទ្យាល័យ Mahidol។

សូម​ជម្រាប​ថា គណបក្សនយោបាយធំៗ ដែល​រំពឹងថានឹងប្រកួតប្រជែងក្នុងការបោះឆ្នោត​ជាតិ​ពេលខាងមុខនៅក្នុងប្រទេសថៃ មាន​ដូចជា គណបក្សប្រជាជន គណបក្សភឿថៃ គណបក្ស​ភូមិចៃថៃ គណបក្សរួបរួមជាតិថៃ និង​គណបក្សប្រជាធិបតេយ្យ ជា​ដើម។

ការចុះឈ្មោះបេក្ខជនសម្រាប់មណ្ឌលបោះឆ្នោត និងអាសនៈក្នុងបញ្ជីគណបក្សត្រូវបានគ្រោងធ្វើនៅចុងខែធ្នូឆ្នាំ២០២៥ ដែលក្នុងអំឡុងពេលនោះ គណបក្សនានាត្រូវដាក់បញ្ជីបេក្ខជននាយករដ្ឋមន្ត្រីរបស់ពួកគេជាផ្លូវការទៅគណៈកម្មការរៀបចំការបោះឆ្នោត៕

ប្រែសម្រួល៖ ឈាង