ព័ត៌មានអន្ដរជាតិ

ពលរដ្ឋអាមេរិកកាន់តែវង្វេងពីគោលបំណងពិតនៃសង្គ្រាមអ៊ីរ៉ង់របស់រដ្ឋបាលត្រាំ

បានផុស

៣ ខែ មុន

នៅ

ថ្ងៃចន្ទ ២៣ មីនា ២០២៦

ដោយ

ពលរដ្ឋអាមេរិកមានការភាន់ច្រឡំកាន់តែខ្លាំងឡើងពីគោលដៅរបស់រដ្ឋបាល ដូណាល់ ត្រាំ លើការវាយប្រហារប្រទេសអ៊ីរ៉ង់ក្នុងពេលនេះ ជាងពេលដែលប្រធានាធិបតី ដូណាល់ ត្រាំ បានផ្តួចផ្តើមវាយប្រហារដោយយោធាក្នុងខែកុម្ភៈទៅទៀត។ នេះបើតាមការស្ទង់មតិថ្មីមួយពីសារព័ត៌មាន CBS News និង YouGov។

យោងតាមសារព័ត៌មាន The Independent ផ្សាយថ្ងៃទី២២ខែមីនា ការស្ទង់មតិមួយកាលពីថ្ងៃទី១៧ ខែមីនា និងថ្ងៃទី២០ មានអ្នកឆ្លើយជាង ៦៨ភាគរយ ក្នុងចំណោមអ្នកឆ្លើយ ៣ ៣០០នាក់ បានឆ្លើយថា៖ «រដ្ឋបាលលោកត្រាំមិនទាន់ពន្យល់ពីគោលដៅច្បាស់នៃការវាយប្រហារអ៊ីរ៉ង់នៅឡើយទេ»។

ប្រធានាធិបតីអាមេរិក លោក ដូណាល់ ត្រាំ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនោះគឺខ្ពស់ជាង ៦ភាគរយ បើប្រៀបធៀបទៅនឹងសំណួរដូចគ្នា ដែលបានសួរក្នុងការស្ទង់មតិស្រដៀងគ្នា ធ្វើឡើងថ្ងៃទី០២ ខែមីនា និងថ្ងៃទី០៤។ ការស្ទង់មតិនេះធ្វើឡើងមិនយូរប៉ុន្មាន បន្ទាប់ពីសហរដ្ឋអាមេរិក និងអ៊ីស្រាអែលបានបើកការបាញ់ប្រហារប្រឆាំងនឹងអ៊ីរ៉ង់។

ការស្ទង់មតិរបស់ CBS News / YouGov នោះ អ្នកឆ្លើយតបចំនួន ៦២ ភាគរយនិយាយថា រដ្ឋបាលរបស់ដូណាល់ ត្រាំ មិនទាន់បានពន្យល់ច្បាស់លាស់អំពីគោលដៅរបស់ខ្លួននៅឡើយទេ ខណៈ ៣៨ភាគរយ បាននិយាយថាពួកគេយល់ច្បាស់! ចំណែកតួលេខនេះធ្លាក់មក ៣២ភាគរយ នាពេលបច្ចុប្បន្ន។

ដំបូងឡើយ លោក ដូណាល់ ត្រាំ លើកឡើងថា គោលដៅនៃសង្គ្រាមគឺ ដើម្បីលុបបំបាត់កងទ័ពជើងទឹកអ៊ីរ៉ង់ ដោយធានាថាពួកគេនឹងមិនអាចវាយប្រហារប្រទេសជិតខាងនៅមជ្ឈិមបូព៌ា និងផលិតអាវុធនុយក្លេអ៊ែរបាន។

ទោះបីជាគោលបំណងពិតប្រាកដមិនបានបញ្ជាក់ក៏ដោយក៏ប្រធានាធិបតីអាមេរិករូបនេះ លើកឡើងម្តងរួចហើយថាលោកចង់បានសិទ្ធិក្នុងការជ្រើសរើសមេដឹកនាំថ្មីរបស់របបអ៊ីរ៉ង់។

ពេលសួរអំពីគោលបំណងរបស់ប្រធានាធិបតីដើមខែមីនា អ្នកឆ្លើយតប ៨០ភាគរយនិយាយថា ប្រធានាធិបតីកំពុងព្យាយាមផ្លាស់ប្តូរភាពជាអ្នកដឹកនាំអ៊ីរ៉ង់។

មិនតែប៉ុណ្ណោះ មន្ត្រីរដ្ឋបាលក៏បានផ្តល់ពេលវេលាផ្សេងៗគ្នាក្នុងការបញ្ជប់ជម្លោះនេះ។

ដំបូងឡើយ លោក ត្រាំ និយាយថា ជម្លោះអាចមានរយៈពេលពី៤ទៅ៥សប្តាហ៍ ឬអាចយូរជាងនេះ។ ប៉ុន្តែក្រោយមករដ្ឋមន្ត្រីក្រសួងការពារជាតិ Pete Hegseth ប្រាប់អ្នកសារព័ត៌មានថា៖« មិនមានពេលវេលាច្បាស់លាស់ សម្រាប់សង្គ្រាមនោះទេ»។

ចំណែកនៅដើមខែមីនាលោក ត្រាំ ថា៖ « លោកនឹងមិនទទួលយកអ្វីក្រៅពីការចុះចាញ់ដោយគ្មានលក្ខខណ្ឌពីអ៊ីរ៉ង់នោះទេ»។

ប៉ុន្តែថ្មីៗនេះ គិតត្រឹមថ្ងៃសុក្រលោកថាអាចនឹងបញ្ចប់ជម្លោះក្នុងពេលឆាប់ៗនេះ ពីព្រោះសហរដ្ឋអាមេរិកសម្រេចចិត្តមុនកាលកំណត់។ តែលោកបន្តថាវាមិនមានន័យថាមានបទឈប់បាញ់នោះទេ៕

ប្រែសម្រួល៖ ណឺ មិនា