New York Times៖ មេដឹកនាំកំពូល​អ៊ីរ៉ង់ ត្រូវ​ដាក់​ជើងសិប្បនិម្មិត ហើយមុខត្រូវ​វះកាត់កែសម្ផស្ស

រឿងរ៉ាវដ៏គួរ​​ឲ្យ​ភ្ញាក់ផ្អើលមួយត្រូវបានលាតត្រដាងដោយសារព័ត៌មាន The New York Times កាល​ពី​ថ្ងៃទី​​២៣​ ខែមេសា ​ឆ្នាំ​២០២៦ អំពីស្ថានភាពពិតរបស់មេដឹកនាំកំពូលអ៊ីរ៉ង់ លោក Mojtaba Khamenei ដែលបានឡើងកាន់តំណែងបន្តពីឪពុករបស់លោក។ របាយការណ៍បានឲ្យ​ដឹងថា លោក Mojtaba បានរងរបួសយ៉ាងធ្ងន់ធ្ងរ និងកំពុងសម្រាកព្យាបាលនៅកន្លែងសម្ងាត់មួយ ដោយកាត់ដាច់ការទាក់ទងពីពិភពខាងក្រៅស្ទើរតែទាំងស្រុង។

មន្ត្រីជាន់ខ្ពស់អ៊ីរ៉ង់អះអាងថា ស្មារតីរបស់លោកនៅតែរឹងមាំ និងឆ្លាតវៃ ប៉ុន្តែស្ថានភាពរាងកាយរបស់លោកមានសភាពធ្ងន់ធ្ងរណាស់។ ជើងម្ខាងរបស់លោកត្រូវវះកាត់ដល់ទៅ៣​ដង និងកំពុងរង់ចាំការដាក់ជើងសិប្បនិម្មិត ខណៈដែលដៃក៏ត្រូវបានវះកាត់ដែរ។ អ្វីដែលរឹតតែពិបាកនោះ គឺផ្ទៃមុខ និងបបូរមាត់របស់លោកត្រូវរងការរលាកខ្លាំង ដែលធ្វើ​ឲ្យ​លោកពិបាកក្នុងការនិយាយស្តី។ ហេតុផលនេះហើយដែលធ្វើ​ឲ្យ​លោកមិនដែលបង្ហាញមុខជាសាធារណៈ ចាប់តាំងពីឡើងកាន់អំណាចមក ព្រោះលោកមិនចង់ឲ្យ​ពិភពលោកឃើញរូបភាពទន់ខ្សោយរបស់មេដឹកនាំកំពូលក្នុងកាលៈទេសៈដ៏តានតឹងនេះ។

ដោយសារតែការលាក់ខ្លួន ប្រព័ន្ធគ្រប់គ្រងអំណាចនៅអ៊ីរ៉ង់បានប្រែប្រួលទាំងស្រុង។ ការផ្ញើសារទាក់ទងជាមួយមេដឹកនាំត្រូវធ្វើឡើងតាមរយៈ «សំបុត្រសរសេរដោយដៃ» ដែលច្រកក្នុងស្រោមសំបុត្របិទជិត រួចបញ្ជូនបន្តៗគ្នាពីម្នាក់ទៅម្នាក់ តាមរយៈអ្នកជិះឡាន និងម៉ូតូ រហូតដល់កន្លែងលាក់ខ្លួន។ សូម្បីតែមន្ត្រីជាន់ខ្ពស់ក្នុងរដ្ឋាភិបាលក៏មិនហ៊ានទៅសួរសុខទុក្ខលោកដែរ ព្រោះខ្លាចអ៊ីស្រាអែលតាមដានដឹងពីទីតាំង ហើយបើកការវាយប្រហារសម្លាប់មេដឹកនាំរូបនេះ។

នៅពេលដែលមេដឹកនាំកំពូលមានការពិបាកក្នុងការទាក់ទងនិងបញ្ជាការ ឥទ្ធិពលនៃការសម្រេចចិត្តបានធ្លាក់ទៅលើក្រុមមេបញ្ជាការនៃកងឆ្មាំបដិវត្តន៍អ៊ីរ៉ង់ (IRGC)។ អ្នកវិភាគបានលើកឡើងថា បច្ចុប្បន្នលោក Mojtaba ប្រៀបដូចជាប្រធានក្រុមប្រឹក្សាភិបាលដែលនៅពីក្រោយខ្នង ប៉ុន្តែមេទ័ពទាំងឡាយគឺជាអ្នកសម្រេចចិត្តរាល់កិច្ចការងារសង្គ្រាម ការទូត និងសន្តិសុខជាតិ។ នេះគឺជាការផ្លាស់ប្តូរដ៏ធំមួយ ពីសម័យឪពុករបស់លោក ដែលអំណាចដាច់ខាតស្ថិតលើបុគ្គលតែម្នាក់។

ការឡើងកាន់អំណាចរបស់ក្រុមមេទ័ពនេះ ក៏បានធ្វើឲ្យ​មេដឹកនាំស៊ីវិល ដូចជាលោកប្រធានាធិបតី Masoud Pezeshkian និងរដ្ឋមន្ត្រីការបរទេស ត្រូវដើរតួបន្ទាប់បន្សំ និងផ្តោតតែលើការងារក្នុងស្រុកប៉ុណ្ណោះ។ សូម្បីតែគម្រោងចរចាជាមួយសហរដ្ឋអាមេរិកក៏ត្រូវបានដួលរលំទៅវិញដែរ ដោយសារក្រុមមេទ័ពបានជំទាស់ ស្របពេលដែលអាមេរិកកំពុងឡោមព័ទ្ធផ្លូវទឹករបស់ខ្លួន។

ទោះបីជាលោក ដូណាល់ ត្រាំ ធ្លាប់អះអាងថាអ៊ីរ៉ង់កំពុងមានការប្តូររបបក៏ដោយ ប៉ុន្តែរបាយការណ៍បង្ហាញថា ប្រព័ន្ធគ្រប់គ្រងរបស់អ៊ីរ៉ង់នៅតែរឹងមាំគ្រាន់តែវាបានប្តូររូបរាង។ អំណាចមិនបានបាត់បង់ទៅណាទេ គ្រាន់តែវាបានផ្ទេរពីមេដឹកនាំតែម្នាក់ មកជាការសម្រេចចិត្តរួមគ្នារបស់ក្រុមមេទ័ពដែលមានបទពិសោធន៍សង្គ្រាម ហើយការបញ្ជាការត្រូវបានធ្វើឡើងដោយសម្ងាត់បំផុត ដើម្បីធានាសុវត្ថិភាពពីការតាមប្រមាញ់របស់សត្រូវ៕

ប្រែសម្រួល៖ ឈាង