គម្រោង​ការ​ពារដែន​អាកាស​អាមេរិក​ «Golden Dome» នឹង​ចាយដល់ ១.២ ទី្រលានដុល្លារ គ្រប​ដណ្តប់​​លើ​ទឹកដី​អាមេរិចទាំងអស់

ការិយាល័យថវិកានៃសភាអាមេរិក (CBO) ដែលជាស្ថាប័នមិនលម្អៀងខាងនយោបាយ បានវាយតម្លៃកាលពីថ្ងៃអង្គារ ទី១២ ខែឧសភា ថា ខែលការពារមីស៊ីល «Golden Dome» របស់ប្រធានាធិបតីអាមេរិក លោក ដូណាល់ ត្រាំ អាចនឹងត្រូវចំណាយប្រាក់ប្រហែល ១.២ ទ្រី​លានដុល្លារ សម្រាប់ការអភិវឌ្ឍ ការដាក់ពង្រាយ និងប្រតិបត្តិការក្នុងរយៈពេល ២០ ឆ្នាំ។

តួលេខដ៏ច្រើនលើសលប់នេះ បានលុបតម្លៃ ១៨៥ ប៊ីលាន​ដុល្លារ ដែលស្នើឡើងដោយប្រធានកម្មវិធីនេះរបស់មន្ទីរបញ្ចកោណ ​ដោយ​​ក្លាយជាតួលេខដ៏តិច​តូចមួយប៉ុណ្ណោះ​​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទីភ្នាក់ងារសារព័ត៌មាន Reuters​ ស្ថាប័ន CBO បានប៉ាន់ប្រមាណថា គ្រាន់តែថ្លៃដើមនៃការទិញយកប្រព័ន្ធនេះ នឹងមានចំនួនសរុបជាង ១ ​ទ្រីលានដុល្លារទៅហើយ ដោយក្នុងនោះ ស្រទាប់មីស៊ីលស្ទាក់ចាប់នៅលើលំហអាកាស ដែលជាបណ្តាញផ្កាយរណបចំនួន ៧ ៨០០ គ្រឿង នឹងក្តោបក្តាប់រហូតដល់ប្រហែល ៧០ ភាគរយ នៃថ្លៃដើមទិញយកសរុប។

ប្រព័ន្ធការពារនេះ នឹងគ្របដណ្តប់លើទឹកដីអាមេរិកទាំងមូល រួមទាំងរដ្ឋអាឡាស្កា និងកោះហាវ៉ៃ ផងដែរ ហើយនឹងមានសមត្ថភាពពេញលេញក្នុងការទប់ទល់នឹងការវាយប្រហារពីគូប្រជែងក្នុងតំបន់ ដូចជាប្រទេសកូរ៉េខាងជើង។ ទោះជាយ៉ាងណាក៏ដោយ CBO បានព្រមានថា ប្រព័ន្ធនេះអាចនឹងមិនអាចទប់ទល់រួចឡើយ ប្រសិនបើមានការវាយប្រហារទ្រង់ទ្រាយធំពីសំណាក់ប្រទេសរុស្ស៊ី ឬ ចិន។

ដោយឡែក លោក Jeff Merkley សមាជិកព្រឹទ្ធសភាអាមេរិកមកពីគណបក្សប្រជាធិបតេយ្យ (រដ្ឋ Oregon) និងជាសមាជិកជាន់ខ្ពស់នៃគណៈកម្មាធិការថវិកាព្រឹទ្ធសភា បានរិះគន់ថា៖ «ប្រព័ន្ធ​ការ​ពារដែន​អាកាស​ដែលប្រធានាធិបតីហៅថា «Golden Dome» នេះ គឺគ្មានអ្វីក្រៅពីការយកលុយពន្ធរបស់ប្រជាជនអាមេរិក ដែលខំធ្វើការងារយ៉ាងលំបាក ទៅប្រគល់ឲ្យក្រុមហ៊ុនម៉ៅការ​ផលិត​ឧបករណ៍​ការពារជាតិធំៗនោះឡើយ»។

ជុំវិញករណីនេះ ការិយាល័យគ្រប់គ្រងគម្រោង «Golden Dome» របស់មន្ទីរបញ្ចកោណ មិនបានឆ្លើយតបនឹងសំណើសុំការអត្ថាធិប្បាយរបស់​រ៉យទ័រ​នោះទេ​។

សូមបញ្ជាក់ថា បទបញ្ជាប្រតិបត្តិដើម្បីបង្កើតខែលការពារមីស៊ីល «Golden Dome» នេះ ត្រូវបានចុះហត្ថលេខា កាលពីថ្ងៃទី ២៧ ខែមករា ឆ្នាំ ២០២៥ ដោយបានកំណត់កាលវិភាគយ៉ាងតឹងរ៉ឹង ក្នុងការដាក់ពង្រាយប្រព័ន្ធការពារមីស៊ីលការពារ​ជាតិ​អាមេរិក​​ដ៏ទូលំទូលាយមួយនេះ ឲ្យបានត្រឹមឆ្នាំ ២០២៨។

គម្រោងនេះ គឺផ្ដោតលើការពង្រីកប្រព័ន្ធការពារនៅលើដី ដូចជាមីស៊ីលស្ទាក់ចាប់ ឧបករណ៍ចាប់សញ្ញា និងប្រព័ន្ធបញ្ជា និងគ្រប់គ្រង ព្រមទាំងបន្ថែមសមាសធាតុនៅលើលំហអាកាស ដើម្បីស្វែងរក តាមដាន និងអាចបាញ់ទម្លាក់ការគំរាមកំហែងដែលចូលមកពីគន្លងតារាវិថី។ សមាសធាតុទាំងនេះ នឹងរួមបញ្ចូលទាំងបណ្តាញផ្កាយរណបកម្រិតខ្ពស់ និងអាវុធនៅលើគន្លងតារាវិថីផងដែរ៕

អត្ថបទ៖ សាង ស្រីល័ក្ខ

គ្រោះរញ្ជួយដីកម្រិត ៤.៦ រ៉ិចទ័រ វាយប្រហារនៅក្បែរ​រដ្ឋធានី ប្រទេស​អ៊ីរ៉ង់​​