អង់គ្លេស នឹងបរិច្ចាគវ៉ាក់សាំងកូវីដ បង្គ្រប់ឲ្យបាន ១០០ លានដូស ដល់ប្រទេសដទៃ នៅឆ្នាំក្រោយ

លោក Boris Johnson បានសន្យាថា ចក្រភពអង់គ្លេស នឹងបរិច្ចាគវ៉ាក់សាំងកូវីដ បង្គ្រប់ឲ្យបានយ៉ាងហោចណាស់ ១០០ លានដូស ទៅឲ្យប្រទេសដទៃ នៅឆ្នាំក្រោយនេះ។

ស្របពេលដែលលោក ត្រៀមស្វាគមន៍មេដឹកនាំពិភពលោកមកកាន់តំបន់ Cornwall សម្រាប់កិច្ចប្រជុំកំពូល G7, លោកនាយករដ្ឋមន្រ្តីបានប្តេជ្ញាថា នឹងចាត់វិធានការដ៏ធំមួយឆ្ពោះទៅរកការកម្ចាត់ជំងឺរាតត្បាតនេះឲ្យបានល្អ។

សកម្មភាពរបស់លោក Johnson គឺផ្អែកលើការស្នើសុំរបស់ខ្លួន ឲ្យបណ្តាប្រទេសប្រជាធិបតេយ្យឈានមុខលើពិភពលោក ជួយចាក់វ៉ាក់សាំងនៅទូទាំងពិភពលោកត្រឹមចុងឆ្នាំក្រោយ។

នៅក្នុងកិច្ចប្រជុំកំពូលនាចុងសប្តាហ៍នេះ គេសង្ឃឹមថា មេដឹកនាំ G7 នឹងប្រកាសពីការប្តេជ្ញាចិត្ត ក្នុងការផ្តល់វ៉ាក់សាំងការពារមេរោគកូវីដ យ៉ាងហោចណាស់មួយពាន់លានដូសទៅឲ្យពិភពលោកទាំងមូលតាមរយៈការចែករំលែក និងហិរញ្ញប្បទាន។

ប្រធានាធិបតីអាមេរិកលោក Joe Biden បានប្តេជ្ញាផ្តល់ជូនពាក់កណ្តាលរួចទៅហើយ ក្នុងគោលដៅនេះ ពោលគឺលោកសន្យាទិញវ៉ាក់សាំង Pfizer ចំនួន ៥០០ លានដូសដើម្បីបរិច្ចាគទៅឲ្យប្រទេសក្រីក្រ។

ក្រោមការប្តេជ្ញាចិត្តផ្ទាល់របស់ចក្រភពអង់គ្លេស វ៉ាក់សាំងចំនួន ៥ លានដូស នឹងត្រូវបរិច្ចាគនៅត្រឹមចុងខែកញ្ញាឆ្នាំនេះ ដែលនឹងចាប់ផ្តើមនៅប៉ុន្មានសប្តាហ៍ខាងមុខនេះ ហើយជាចម្បងគឺសម្រាប់ការប្រើប្រាស់នៅក្នុងប្រទេសក្រីក្របំផុតលើពិភពលោក។

លោក Johnson ក៏បានប្តេជ្ញាបរិច្ចាគវ៉ាក់សាំងចំនួន ៩៥ លានដូសបន្ថែមទៀតផងដែរនៅឆ្នាំក្រោយ រួមទាំង ២៥ លានបន្ថែមទៀតនៅបំណាច់ឆ្នាំ ២០២១នេះ។

ក្នុងចំណោម ១០០ លានដូស មាន៨០ភាគរយនឹងត្រូវចូលទៅក្នុងកម្មវិធីចែករំលែកវ៉ាក់សាំងអន្តរជាតិ COVAX ខណៈចំនួនដែលនៅសល់ នឹងត្រូវបានចែកជាលក្ខណៈទ្វេភាគីជាមួយប្រទេសដែលត្រូវការ៕

ប្រែសម្រួល៖ Vann Vann

ប្រភព៖ Sky

ចុចអាន៖ ក្រៅពីវ៉ាក់សាំង មានហេតុផល១ទៀត នាំឲ្យមនុស្សពេញវ័យ ៨០ភាគរយនៅអង់គ្លេស ដុះអង់ទីគ័រប្រឆាំងជំងឺកូវីដ-១៩