ព័ត៌មានអន្ដរជាតិ

រូបសំណាកម្ចាស់ក្សត្រិយ៍ Victoria ដួលរលំចំពេលកំហឹងរកឃើញផ្នូរកុមារជនជាតិដើមច្រើន

បានផុស

៥ years មុន

នៅ

ថ្ងៃសុក្រ ២ កក្កដា ២០២១

ដោយ

រូបសំណាករបស់ព្រះមហាក្សត្រិយ៍ Queen Victoria ត្រូវបានផ្តួលរំលំនៅក្នុងប្រទេសកាណាដាដែលបានកើតឡើងចំពេលដែលមានការខឹងសម្បាពីមហាជនជុំវិញការកឃើញផ្នូរជនជាតិដើមភាគតិចដែលគ្មានស្លាកសំគាល់។

មនុស្សមួយក្រុមបានជួបជុំគ្នានៅ Manitoba និងបានផ្តួលរំលំរូបសំណាករបស់ម្ចាស់ក្សត្រិយ៍ចំទិវាកាណាដា ដែលជាការប្រារព្ធប្រចាំឆ្នាំនៅថ្ងៃទី១ ខែកក្កដាដើម្បីរំលឹកដល់ការរួបរួមសាមគ្គីជាតិ។

រូបសំណាក់មហាក្សត្រិយ៍ Queen Victoria ដួលរលំ

សមាជិកក្រុមទាំងនោះដែលបានពាក់អាវយឹតពណ៌ទឹកក្រូចដើម្បីជាការគោរពដល់កុមារជនជាតិភាគតិចដែលត្រូវបានបញ្ជូនទៅរៀននៅសាលាដែលជាកន្លែងស្នាក់នៅផងបាននៅជុំវិញរូបសំណាក ហើយបានផ្តួលរំលំ និងបានសន្សល់ពាក្យពេចន៍នៅផ្នែកខាងក្រោមថា «យើងធ្លាប់ជាកុមារ។ សូមនាំពួកគេទៅផ្ទះ»។

រូបសំណាកតូចរបស់មហាក្សត្រិយ៍ Queen Elizabeth II ក៏ត្រូវបានផ្តួលរំលំនៅផ្នែកខាងកើត។ រូបសំណាកទាំងពីរជារាជវង្សនៃប្រវត្តិសាស្ត្រអាណានិគមរបស់ប្រទេស។

យ៉ាងហោចណាស់ កុមារជនជាតិដើមភាគតិច១៥០០០០នាក់ត្រូវឃ្លាតពីគ្រួសារដើម្បីទៅរៀននៅសាលាទាំងនោះកាលពីជាងមួយសតវត្សរ៍មុនដែលជាផ្នែកមួយនៃគម្រោងរបស់រដ្ឋាភិបាលដើម្បីបញ្ចូលកុមារជនជាតិដើមភាគតិក្នុងសង្គមកាណាដា។

កាលពីថ្ងៃព្រហស្បតិ៍ ក្រុមជនជាតិដើម Lower Kootenay Band បានប្រកាសពីការរកឃើញសំណល់សាកសព១៨២នៅក្នុងផ្នូរគ្មានស្លាកសំគាល់នៅទីតាំងសាលារៀន និងជាកន្លែងស្នាក់ចាស់មួយដែលបើកដោយដោយក្រុមវិហារកាតូលិក ដែលជាការរកឃើញថ្មីបំផុតក្នុងចំណោមការរកឃើញជាបន្តបន្ទាប់ក្នុងរយៈពេលចុងក្រោយនេះដែលធ្វើឲ្យរន្ធត់តក់ស្លុតដល់សាធារណជន។

ការរកឃើញថ្មីៗនេះបានបណ្តាលឲ្យមានការអំពាវនាវដល់ក្រុមជនជាតិដើមភាគតិចកុំប្រារព្ធទិវាកាណាដា។

ក្រុម Idle No More បាននិយាយថា ៖«យើងនឹងមិនប្រារព្ធទឹកដីជនជាតិដើម និងជីវិតជនជាតិភាគតិចដែលត្រូវបានគេលួចទេ។ ផ្ទុយទៅវិញ យើងនឹងជួបជុំគ្នាដើម្បីគោរពដល់វិញ្ញាណក្ខន្ធរបស់អ្នកបាត់បង់ជីវិតដល់រដ្ឋកាណាដា»។ ក្រុមនេះក៏បានអំពាវនាវឲ្យសាធារណជនប្រមូលផ្តុំដើម្បីគាំទ្រដល់សហគមន៍ជនជាតិដើមភាគតិច»៕

អានអត្ថបទពាក់ព័ន្ធ៖ កាណាដារកឃើញផ្នូរអត់ស្លាកសំគាល់ជនជាតិដើមជិត២០០ទៀត

ប្រែសម្រួល៖ វីរបុត្រ
ប្រភព៖ theguardian

Related Topics:ប្រទេសកាណាដា