មេបញ្ជាការអ៊ីរ៉ង់ម្នាក់ទៀតត្រូវបានសម្លាប់ក្នុងការវាយប្រហារតាមអាកាសនៅព្រំដែនអ៊ីរ៉ាក់-ស៊ីរី

សន្តិសុខអ៊ីរ៉ាក់ និងមន្រ្តីកងជីវពលក្នុងតំបន់បាននិយាយកាលពីថ្ងៃចន្ទថា ការវាយប្រហារតាមអាកាសមួយបានសម្លាប់មេបញ្ជាការម្នាក់នៃឆ្មាំបដិវត្តអ៊ីរ៉ង់ (IRGC) នៅឯព្រំដែនអ៊ីរ៉ាក់-ស៊ីរី ចន្លោះថ្ងៃអាទិត្យ និងថ្ងៃចន្ទ ។

ពួកគេមិនអាចបញ្ជាក់ពីអត្តសញ្ញាណរបស់មេបញ្ជាការដែលពួកគេបាននិយាយថាត្រូវបានសម្លាប់រួមជាមួយបុរស ៣ នាក់ផ្សេងទៀតដែលកំពុងធ្វើដំណើរតាមរថយន្តជាមួយគាត់នោះទេ ។

មន្ត្រីសន្តិសុខអ៊ីរ៉ាក់ពីរនាក់បាននិយាយដោយឡែកថា រថយន្តនេះដឹកអាវុធឆ្លងកាត់ព្រំដែនអ៊ីរ៉ាក់ ហើយត្រូវបានវាយប្រហារ បន្ទាប់ពីបានចូលទឹកដីស៊ីរី ។

ក្រុមមន្ត្រីយោធាអ៊ីរ៉ាក់បាននិយាយដោយមិនផ្តល់ការបញ្ជាក់ ឬផ្តល់ពេលវេលាពិតប្រាកដនៃឧប្បត្តិហេតុនេះថា ក្រុមយោធាប៉ារ៉ាអ៊ីរ៉ាក់ដែលគាំទ្រដោយអ៊ីរ៉ង់បានជួយរកសាកសព ។

ប្រភពព័ត៌មានពីយោធា និងកងជីវពលក្នុងតំបន់បានបញ្ជាក់ពីរបាយការណ៍នេះ ទោះបីជា Reuters មិនអាចបញ្ជាក់ដោយឯករាជ្យថា មេបញ្ជាការអ៊ីរ៉ង់ម្នាក់ត្រូវបានសម្លាប់តាមរបៀបណាក៏ដោយ ។

ឧប្បត្តិហេតុនេះបានកើតឡើងតែប៉ុន្មានថ្ងៃប៉ុណ្ណោះ បន្ទាប់ពីអ្នកវិទ្យាសាស្ត្រនុយក្លេអ៊ែរកំពូលអ៊ីរ៉ង់លោក Mohsen Fakhrizadeh ត្រូវបានគេធ្វើឃាតនៅទីក្រុងតេអេរ៉ង់ក្នុងការសម្លាប់ដែលអ៊ីរ៉ង់បានស្តីបន្ទោសទៅលើប្រទេសអ៊ីស្រាអែល ៕

ប្រែសម្រួលដោយ ៖ ជីវ័ន្ត

ប្រភព ៖ REUTERS

ចុចអាន ៖ ស្របពេលអ៊ីរ៉ង់ប្រកាសសងសឹក មកមើលឃ្លាំងអាវុធទំនើបៗដ៏គួរឲ្យខ្លាចរបស់អ៊ីស្រាអែលសិនទើបដឹងអស្ចារ្យប៉ុនណា

ចុចអាន ៖ អ្នកវិទ្យាសាស្ត្រអ៊ីរ៉ង់ត្រូវធ្វើឃាតក្នុងផែនការដែលចូលរួមដោយអ្នកវាយប្រហារចំនួន ៦២ នាក់