យោធាមីយ៉ាន់ម៉ា វាយប្រហារលើពិធីបុណ្យព្រះពុទ្ធសាសនាសម្លាប់មនុស្ស៣២នាក់

យ៉ាងហោចណាស់មនុស្ស ៣២ នាក់ រួមទាំងកុមារជាច្រើននាក់បានស្លាប់ និងជាង ៥០ នាក់បានរងរបួស ដោយសារយោធាមីយ៉ាន់ម៉ាបើកការវាយប្រហារតាមអាកាសលើកន្លែងប្រារព្ធពិធីបុណ្យពន្លឺរបស់ព្រះពុទ្ធសាសនា ឬពិធីបុណ្យThadingyutនៅទីប្រជុំជន Chaung-U ក្នុងតំបន់ Sagaing។ នេះបើយោងតាមការចេញផ្សាយរបស់សារព័ត៌មាន The Irrawaddy កាលពីថ្ងៃទី០៧ខែតុលា។

សាក្សី​បាន​និយាយ​ថា គ្រាប់បែក​ពីរ​គ្រាប់​ត្រូវ​បាន​ទម្លាក់​ដោយទាហារបបយោធានៅ​ម៉ោង ៧ យប់ទៅលើហ្វូងមនុស្សដែលប្រមូលផ្តុំគ្នាក្នុងពិធីបុណ្យ។ ប៉ុន្មាននាទីក្រោយមក យន្តហោះបានត្រលប់មកទម្លាក់គ្រាប់បែកចំនួនពីរគ្រាប់ទៀត ធ្វើឱ្យមានមនុស្សស្លាប់បន្ថែមទៀត។

របាយការណ៍ក្នុងស្រុកបាននិយាយថា ជនរងគ្រោះរួមមានជនស៊ីវិល សមាជិកក្រុមប្រដាប់អាវុធ និងសកម្មជនយុវជនបួននាក់មកពីគណៈកម្មាធិការអហិង្សា Monywa-Amyint Lan ។ បើតាមវីដេអូ​ដែល​បាន​ចែករំលែក​នៅលើ​បណ្តាញ​សង្គម​បាន​បង្ហាញ​ពី​ទិដ្ឋភាពមនុស្សភ័យ​ស្លន់ស្លោ រត់រកសមាជិកគ្រួសារពួកគេក្រោយការវាយប្រហារ។

ក្រៅពីនេះក៏មានការវាយប្រហារដាច់ដោយឡែកមួយទៀតនៅយប់ដដែលនោះ ដោយរបបយោធាបានទម្លាក់គ្រាប់បែកលើតំបន់នានាក្នុងរដ្ឋ Shan ភាគខាងជើងដែលគ្រប់គ្រងដោយកងទ័ពរំដោះជាតិតាអុង (TNLA) ។

គួរបញ្ជាក់ថារបបយោធាមីយ៉ាន់ម៉ាដឹកនាំដោយ ឧត្តមសេនីយ៍ មីន អ៊ុងឡាំង បានបង្កើនការវាយប្រហាររបស់ខ្លួនដណ្ដើមគ្រប់គ្រងតំបន់ជាច្រើនមកវិញមុនការបោះឆ្នោតនៅចុងឆ្នាំនេះ ដែលបង្គឲ្យមានអ្នកស្លាប់ របួស និងការបំផ្លិចបំផ្លាញកើនឡើង៕

អត្ថបទ៖ ប៊ុន សុភាព