ក្រៅពីកូវីដ ជំងឺមានអត្រាមរណភាពខ្ពស់មួយទៀត កំពុងឆ្លងច្រើនឡើងៗ នៅ ចិន

ចំនួនអ្នកឆ្លងជំងឺផ្តាសាយបក្សីកាន់តែច្រើនឡើងនៅប្រទេសចិន ក្នុងឆ្នាំនេះ កំពុងបង្កើនការព្រួយបារម្ភក្នុងចំណោមអ្នកជំនាញ ដែលនិយាយថា មេរោគនេះ ហាក់ដូចជាបានបំប្លែងខ្លួន ហើយអាចឆ្លងដល់មនុស្សកាន់តែច្រើន។

ប្រទេសចិន បានរាយការណ៍ពីករណីជំងឺផ្តាសាយបក្សី H5N6 ឆ្លងដល់មនុស្សចំនួន២១នាក់ក្នុងឆ្នាំ២០២១ទៅកាន់អង្គការសុខភាពពិភពលោក (WHO) បើធៀបនឹងឆ្នាំមុន ដែលមានតែ៥ករណីប៉ុណ្ណោះ។

ទោះបីជាចំនួននេះទាបជាង​ ចំនួនមនុស្សរាប់រយនាក់ដែលបានឆ្លងមេរោគ H7N9 ក្នុងឆ្នាំ២០១៧ក៏ដោយ ប៉ុន្តែការឆ្លងលើកនេះគឺធ្ងន់ធ្ងរណាស់ ដោយធ្វើឲ្យមនុស្សជាច្រើននាក់ឈឺធ្ងន់  និងយ៉ាងហោចណាស់ប្រាំមួយនាក់បានស្លាប់។

លោក Thijs Kuiken សាស្ត្រាចារ្យផ្នែករោគវិទ្យានៅឯមន្ទីរពេទ្យ Erasmus University Medical Centre ក្នុងទីក្រុង Rotterdam បាននិយាយថា “ការកើនឡើងនៃករណីឆ្លងដល់មនុស្សនៅប្រទេសចិនក្នុងឆ្នាំនេះ គឺគួរឲ្យព្រួយបារម្ភណាស់។ វាជាមេរោគដែលបណ្តាលឲ្យមានអត្រាមរណភាពខ្ពស់”។

ទោះបីជាយ៉ាងណាក៏ដោយ WHO និយាយថា អ្នកឆ្លងភាគច្រើនគឺបានប៉ះពាល់ទៅនឹងបក្សី ហើយមិនទាន់មានករណីឆ្លងពីមនុស្សទៅមនុស្សនោះទេ។

WHO បន្តថា ការស៊ើបអង្កេតបន្ថែមទៀត ត្រូវបានទាមទារជាបន្ទាន់ដើម្បីស្វែងយល់ពីហានិភ័យ និងការកើនឡើងនៃការរាលដាលដល់មនុស្ស។

ស្របពេលជាមួយគ្នានោះដែរ មជ្ឈមណ្ឌលគ្រប់គ្រង និងបង្ការជំងឺរបស់ចិន (CDC) មិនអាចទាក់ទងសុំការអត្ថាធិប្បាយលើការកើនឡើងនៃករណីមនុស្សផ្ទុកវីរុស H5N6 បានទេ។

គួរបញ្ជាក់ថា ចិនគឺជាប្រទេសផ្គត់ផ្គង់បសុបក្សីធំបំផុតរបស់ពិភពលោក ដែលធ្វើឲ្យប្រទេសមួយនេះ ក្លាយជាកន្លែងបណ្តុំនៃមេរោគផ្តាសាយ៕

ប្រែសម្រួល៖ Vann Vann

ប្រភព៖ CNA

ចុចអាន៖ ប្រុងប្រយ័ត្ន! វីរុសកូវីដបំប្លែងខ្លួនក្លាយពូជឆ្លងខ្លាំងជាង Delta ១០ដង ចូលដល់ ថៃ ហើយ