ព័ត៌មានអន្ដរជាតិ

ក្រុមហ៊ុនថៃមួយលួចលក់ស្រោមដៃពេទ្យមួយទឹកទៅអាមេរិក

បានផុស

៤ years មុន

នៅ

ថ្ងៃសៅរ៍ ៣០ តុលា ២០២១

ដោយ

ប៉ូលិសថៃបានចោទប្រកាន់ក្រុមហ៊ុនមួយពីបទនាំចេញស្រោមដៃពេទ្យមួយទឹក គ្មានស្តង់ដារ និងកខ្វក់ទៅកាន់សហរដ្ឋអាមេរិកនៅពេលតម្រូវការប្រើប្រាស់កើនឡើងក្នុងពេលវិបត្តិកូវីដ-១៩ទូទាំងពិភពលោក។ សេចក្តីប្រកាសបានកើតឡើងប៉ុន្មានថ្ងៃបន្ទាប់ពីសារព័ត៌មាន CNN បានស៊ើបអង្កេតជុំវិញបញ្ហានេះ។

ឧបនាយករដ្ឋមន្ត្រីថៃលោក Jurin Laksanavisit ប្រធានគណៈកម្មាធិការរដ្ឋាភិបាលពិសេសដែលត្រូវបានបង្កើតឡើងដើម្បីស៊ើបអង្កេតរបាយការណ៍របស់ CNN បាននិយាយថា ក្រុមហ៊ុន Paddy the Room Trading ប្រឈមនឹងបទចោទប្រកាន់៨ករណីអំពីការលក់សម្ភារៈវេជ្ជសាស្ត្រដោយគ្មានការអនុញ្ញាតពីនិយតករថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុនថៃមួយនេះបានចុះកិច្ចព្រមព្រៀងជាមួយក្រុមហ៊ុនអាមេរិកដើម្បីផ្គត់ផ្គង់ស្រោមដៃវេជ្ជសាស្ត្រដែលមានតម្លៃរាប់លានដុល្លារអាមេរិក ប៉ុន្តែបែរជាផ្គត់ផ្គង់ស្រោមដៃជ័រគ្មានគុណភាព ឬស្រោមដៃមួយទឹកដែលដាក់ក្នុងប្រអប់ដោយបញ្ជាក់ថា ជាស្រោមដៃថ្នាក់វេជ្ជសាស្ត្រ។ ស្រោមដៃខ្លះថែមទាំងមានទឹក សើម និងកខ្វក់ទៀតផង។

អាជ្ញាធរថៃក៏បានបញ្ជាឲ្យមានការស៊ើបអង្កេតទៅលើស្រោមដៃម៉ាក SkyMed ដែលគ្រប់គ្រងដោយដោយអតីតមន្ត្រីយោធាថៃ។

ការិយាល័យស៊ើបអង្កេតកណ្តាលរបស់ថៃ (CIB) បានប្រាប់ថា CNN ថា ខ្លួនកំពុងធ្វើការងារជិតស្និទ្ធជាមួយ FBI ដើម្បីស៊ើបអង្កេតលើម៉ាក SkyMed។

ប្រធាន CIB លោក Jirabhob Bhuridej បាននិយាយថា ៖«រដ្ឋាភិបាលថៃកំពុងយកចិត្តទុកលើបញ្ហានេះខ្លាំងណាស់ ហើយយើងនឹងធ្វើឲ្យប្រាកដច្បាស់ថា រកយុត្តិធម៌ជូនភាគីដែលរងការខូចខាត»។

ស្រោមដៃមួយចំនួនដែលត្រូវបានបញ្ជូនទៅអ្នកទិញតាមរយៈក្រុមហ៊ុន Paddy the Room ត្រូវបានវេចខ្ចប់ដោយដាក់ម៉ាក SkyMed។

លោក Tarek Kirschen អ្នកជំនួយនៅទីក្រុងម៉ៃអាមីបានបញ្ជាទិញស្រោមដៃគិតជាប្រាក់ប្រហែលជា២លានដុល្លារពីក្រុមហ៊ុន Paddy the Room កាលពីឆ្នាំមុន។ ស្រោមដៃទាំងនោះទៅដល់ដោយម៉ាក SkyMed។

លោក Tarek បានឲ្យដឹងថា ៖«ស្រោមដៃទាំងនោះត្រូវបានគេប្រើរួចហើយ។ ស្រោមដៃត្រូវបានលាងសម្អាត ប្រើឡើងវិញ។ ស្រោមដៃខ្លះកខ្វក់ ខ្លះនៅមានស្នាមប្រឡាក់។ ខ្ញុំស្ទើរមិនជឿនឹងភ្នែក»៕

ប្រែសម្រួល៖ វីរបុត្រ
ប្រភព៖ CNN