ទ្វីបអាស៊ីក្លាយជាតំបន់ទី២ដែលមានការឆ្លងកូវីដលើស១០លានករណី – Kampuchea Thmey Daily
Connect with us

ព័ត៌មានអន្ដរជាតិ

ទ្វីបអាស៊ីក្លាយជាតំបន់ទី២ដែលមានការឆ្លងកូវីដលើស១០លានករណី

Published

on

នៅថ្ងៃសៅរ៍ ទ្វីបអាស៊ីបានកត់ត្រាការឆ្លងកូវីដលើស១០លានករណីដែលធ្វើឲ្យខ្លូនក្លាយជាតំបន់មានករណីឆ្លងធ្ងន់ធ្ងរបំផុតលំដាប់ទីពីរនៅលើពិភពលោកខណៈករណីបន្តកើនឡើងខ្ពស់នៅក្នុងប្រទេសឥណ្ឌាថ្វីបើមានការធ្លាក់ចុះនៅកន្លែងផ្សេងក៏ដោយ។

នៅពីក្រោយតំបន់អាមេរិកឡាទីន ទ្វីបអាស៊ីបានរួមចំណែកប្រហែលមួយភាគបួននៃករណីសរុបទូទាំងពិភពលោកដែលមាន៤២.១លានករណី។ ជាមួយនឹងការស្លាប់មនុស្សជាង១៦៣,០០០នាក់ជាសកល តំបន់នេះមានប្រហែល១៤ភាគរយ។

ថ្វីបើអាស៊ីមានការរីករាលដាលខ្លាំងក៏ដោយ តែតំបន់ទាំងមូលបានរាយការណ៍អំពីភាពប្រសើរឡើងក្នុងការដោះស្រាយជាមួយជំងឺរាតត្បាតនេះក្នុងរយៈពេលប៉ុន្មានសប្តាហ៍ថ្មីៗនេះ។

ក្នុងទ្វីបនេះ អាស៊ីខាងត្បូងដែលដឹកនាំដោយប្រទេសឥណ្ឌាគឺជាតំបន់រងផលប៉ះពាល់ខ្លាំងបំផុតពោលគឺរួមចំណែកជិត២១ភាគរយនៃករណីឆ្លងនិង១២ភាគរយនៃករណីស្លាប់។

ឥណ្ឌាជាប្រទេសដែលរងគ្រោះខ្លាំងជាងគេបំផុតនៅលើពិភពលោកបន្ទាប់ពីសហរដ្ឋអាមេរិក។ ឥណ្ឌាបានរាយការណ៍ថា មានករណីឆ្លងវីរុសកូរ៉ូណាជាង៥៧,០០០ករណីក្នុងមួយថ្ងៃ។

ប្រទេសឥណ្ឌាមានអត្រាស្លាប់ជាមធ្យម៧៦៤នាក់ក្នុងមួយថ្ងៃដែលជាអត្រាអាក្រក់បំផុតនៅលើពិភពលោកនិងមានចំនួនមនុស្សស្លាប់ម្នាក់ក្នុងចំណោម១៣នាក់ដោយសារជំងឺរាតត្បាតជាសកល។

ប្រទេសនេះបានរាយការណ៍ថា មានការឆ្លងជិត៧.៨លានករណីនៅពីក្រោយសហរដ្ឋអាមេរិកដែលមាន៨.៥លានករណី។ អ្នកស្លាប់នៅឥណ្ឌាមាន១១៨,០០០នាក់ចំណែកសហរដ្ឋអាមេរិកមាន២២៤,១២៨នាក់។

អ្នកជិតខាងភាគខាងកើតប្រទេសឥណ្ឌាគឺបង់ក្លាដែស ជាប្រទេសដែលរងគ្រោះខ្លាំងជាងគេលំដាប់ទី២នៅអាស៊ីដែលមានករណីជិត៤០០,០០០ករណី។

នៅអាស៊ីអាគ្នេយ៍ ប្រទេសឥណ្ឌូនេស៊ីបានវ៉ាដាច់ហ្វីលីពីនកាលពីសប្តាហ៍មុនជាប្រទេសដែលរងគ្រោះខ្លាំងជាងគេដោយមានអ្នកឆ្លងជាង៣៧០,០០០នាក់៕

ប្រែសម្រួលដោយ៖ Vann Vann

ប្រភព៖ Reuters

ចុច Like Facebook កម្ពុជាថ្មី

ព័ត៌មានពេញនិយម