អ៉ីស្រាអែល​ចាប់​ផ្តើម​ចាក់​វ៉ាក់សាំង​ដូស​ទី​៤​ដល់មនុស្ស​វ័យ​៦០​ឡើង

ប្រទេសអ៉ីស្រាអែលកាលពីថ្ងៃអង្គារ៍បានប្រកាសថា ខ្លួននឹងចាក់វ៉ាក់សាំងបង្ការកូវីដ-១៩ដូសទី៤ដល់មនុស្សដែលមានអាយុចាប់ពី៦០ឆ្នាំឡើងចំពេលមានការរីករាលដាលវីរុសបំប្លែងខ្លួនថ្មី Omicron ដែល​អាច​ជា​ប្រទេស​ទី​១​ក្នុង​ពិភព​លោក​ចាក់​ដូស​ទី​៤។

ក្រុមអ្នកជំនាញក្រសួងសុខាភិបាលបានណែនាំឲ្យចាក់ដូសទី៤ ដែលការសម្រេចចិត្ត​នេះ​ទទួលការ​ស្វាគមន៍ពីលោកនាយករដ្ឋមន្ត្រី Naftali Bennett ថា ៖«ជាដំណឹងល្អនឹងជួយពួកយើងទប់ស្កាត់រលកវីរុស Omicron ដែលកំពុងរាតត្បាតទូទាំងពិភពលោក»។

ទោះបីជាការសម្រេចចិត្តកំពុងរង់ចាំការអនុម័តជាផ្លូវការពីមន្ត្រីសុខាភិបាលជាន់ខ្ពស់ក៏​ដោយ​ ក៏លោក Bennett បានជំរុញឲ្យពលរដ្ឋអ៉ីស្រាអែលទៅ​ចាក់វ៉ាក់សាំងឲ្យបានលឿនតាមដែលអាចធ្វើទៅបាន។

លោកនាយករដ្ឋមន្ត្រីមានប្រសាសន៍ថា ៖«សាររបស់ខ្ញុំគឺថា កុំខាតពេល សូមទៅចាក់វ៉ាក់សាំងឲ្យបានលឿន»។

ការសម្រេចចិត្តធ្វើឡើង បន្ទាប់ពីប្រទេសអ៉ីស្រាអែលមានអ្នកស្លាប់លើកដំបូងដោយវីរុសបំប្លែងខ្លួនថ្មី Omicron។ មន្ទីរពេទ្យមួយរបស់ប្រទេសនេះបានបញ្ជាក់ពីករណីស្លាប់ដោយវីរុសនេះកាលពីថ្ងៃអង្គារ៍ ប៉ុន្តែនិយាយថា ជនរងគ្រោះ​មានអាការជំងឺធ្ងន់ធ្ងរស្រាប់មុនឆ្លងOmicron។

កាលពីថ្ងៃអង្គារ៍ដដែល ក្រសួងសុខាភិបាលនិយាយថា យ៉ាងហោចណាស់មានករណីឆ្លង Omicron ៣៤០នាក់នៅប្រទេសអ៉ីស្រាអែល។

អ៉ីស្រាអែលនៅសប្តាហ៍នេះបានពង្រីកបំរាមធ្វើដំណើរពី​ប្រទេសផ្សេងៗដូចជាសហរដ្ឋអាមេរិក អាល្លឺម៉ង់ អ៉ីតាលី តួកគី និងកាណាដាដើម្បីទប់ស្កាត់ការរីករាលដាល៕

ប្រែសម្រួល៖ វីរបុត្រ
ប្រភព៖ reuters