មិនខុស វៀតណាម រថយន្តដឹកទំនិញ ឡាវ រាប់ពាន់គ្រឿងក៏ជាប់គាំង នៅព្រំដែន ចិន

រថយន្តដឹកទំនិញរាប់ពាន់គ្រឿងមកពីប្រទេសឡាវនៅតែជាប់គាំងក្នុងការកកស្ទះចរាចរណ៍ចម្ងាយ ២០ គីឡូម៉ែត្រនៃខេត្ត Luang Namtha ខណៈដែលកំពុងរង់ចាំការចូលទៅកាន់ប្រទេសចិន ។

ទន្ទឹមនោះវាកើតឡើងប៉ុន្មានថ្ងៃប៉ុណ្ណោះ បន្ទាប់ពីរថយន្តដឹកផលិតផលកសិកម្មរបស់វៀតណាមជិត ៥,០០០ គ្រឿងដែលត្រូវនាំចេញទៅប្រទេសចិនបានជាប់គាំងនៅច្រកព្រំដែនចំនួន ៣ នៅភាគខាងជើងប្រទេសវៀតណាមរយៈពេល ២០ ថ្ងៃ ។

យោងតាមសេចក្តីជូនដំណឹងដែលចេញដោយប្រធានការិយាល័យរដ្ឋបាលខេត្ត Luang Namtha លោក Khamphet Chanthavong បានឲ្យដឹងថា ការដឹកជញ្ជូនទំនិញត្រូវបានផ្អាកដើម្បីសម្រួលការកកស្ទះ ដោយសាររថយន្តដឹកទំនិញមិនអាចឆ្លងចូលប្រទេសចិនបាន ។

បន្ថែមពីនេះ ការផ្អាកនេះក៏ដោយសារតែចំនួនករណីឆ្លងកូវីដខ្ពស់ក្នុងប្រទេសឡាវផងដែរ ដែលបណ្ដាលឲ្យប្រទេសចិនអនុវត្តការរឹតបន្តឹងការចូលសម្រាប់បុគ្គល និងរថយន្តដឹកទំនិញ ។

ស្របពេលជាមួយគ្នានេះអាជ្ញាធរបាននិយាយថា រថយន្តដឹកទំនិញជាង ៣០០ គ្រឿងបានធ្វើដំណើរទៅកាន់ច្រកព្រំដែន Boten ជារៀងរាល់ថ្ងៃ ។ ទោះជាយ៉ាងណាក៏ដោយ អាជ្ញាធរចិនបានអនុញ្ញាតឲ្យរថយន្តត្រឹមតែ ១៥០ គ្រឿងប៉ុណ្ណោះឆ្លងកាត់ចូលប្រទេសចិនក្នុងមួយថ្ងៃ ដែលបណ្តាលឲ្យមានការពន្យារពេលយ៉ាងច្រើន ។

ចំណែកប្រធាននាយកដ្ឋានប៉ូលិសចរាចរណ៍ខេត្ត Luang Namtha លោកវរសេនីយ៍ទោ Ladsavang Pachitham បាននិយាយថា រថយន្តដឹកទំនិញរាប់ពាន់គ្រឿងបានជាប់គាំងនៅលើចិញ្ចើមផ្លូវរវាងតំបន់ Na Toey និងច្រកទ្វារគយអន្តរជាតិ Boten ក្នុងស្ថានភាពកកស្ទះចរាចរណ៍ចម្ងាយ ២០ គីឡូម៉ែត្រ ដោយរង់ចាំការចូលទៅកាន់ប្រទេសចិន ។

លោកបាននិយាយថា “ចាប់តាំងពីថ្ងៃទី ១៣ ខែធ្នូមក ចំនួនរថយន្តដឹកទំនិញដែលចូលមកដល់ព្រំដែននៅតែបន្តកើនឡើង ។ ឥឡូវនេះ មានរថយន្តរាប់ពាន់គ្រឿងបានជាប់គាំងនៅតាមផ្លូវ” ។

លោកបានបន្ថែមថា “ដោយសារតែផ្លូវតូចចង្អៀត ក៏ដូចជាមានការសាងសង់នៅតាមដងផ្លូវ ចំនួនយានយន្តដែលចូលប្រទេសចិនមានកម្រិតក្នុងមួយថ្ងៃៗ ទើបបណ្តាលឲ្យមានការកកស្ទះចរាចរណ៍ជាច្រើនគីឡូម៉ែត្រ” ។

យោងតាមអាជ្ញាធរបានឲ្យដឹងថា ការដឹកជញ្ជូនតាមរថយន្តដឹកទំនិញទូទៅទាំងអស់នៅក្នុងប្រទេសត្រូវបានផ្អាកចាប់តាំងពីថ្ងៃសុក្រ ខណៈរថយន្តដឹកទំនិញកសិផលត្រូវបានហាមឃាត់មិនឲ្យដំណើរការរហូតដល់ថ្ងៃទី ២៦ ខែធ្នូ ដើម្បីដោះស្រាយការដឹកលើសទម្ងន់ ៕

ប្រែសម្រួលដោយ ៖ ជីវ័ន្ត

ប្រភព ៖ Laotian Times

ចុចអាន ៖ មិនដល់ ១០ នាទីផង ឡាវ ជួបគ្រោះរញ្ជួយដីខ្លាំងក្លា ២ ដង

ចុចអាន ៖ រថយន្តដឹកផ្លែឈើ វៀតណាម រាប់ពាន់គ្រឿងជាប់នៅព្រំដែន ចិន កំពុងភ័យស្អុយរលួយ (មានវីដេអូ)