លោក ពូទីន ចេញច្បាប់ថ្មីឲ្យប្រទេសមិនមែនសម្ព័ន្ធមិត្តត្រូវតែបង់ជាលុយ រុស្ស៊ី បើទិញឧស្ម័នពីប្រទេសខ្លួន

ប្រធានាធិបតីរុស្ស៊ីលោក វ្ល៉ាឌីមៀ ពូទីន បានចុះហត្ថលេខាលើក្រឹត្យមួយទាមទារឲ្យប្រទេស “មិនមែនសម្ព័ន្ធមិត្ត” ត្រូវតែបង់ជាប្រាក់ “រូប” សម្រាប់ការទិញឧស្ម័នធម្មជាតិពីប្រទេសរបស់លោក ចាប់ពីថ្ងៃសុក្រនេះទៅ ។

លោកប្រធានាធិបតីក៏បានបញ្ចេញបញ្ជី​ប្រទេស​ដែលមិនមែនជាសម្ព័ន្ធមិត្ត​របស់​រុស្ស៊ី​ផងដែរដោយក្នុងនោះរួម​មាន ​សហរដ្ឋ​អាមេរិក ប្រជាជាតិ​អឺរ៉ុប និង​ជប៉ុន ។

ទន្ទឹមនោះ លោក ពូទីន បានព្រមានកាលពីថ្ងៃព្រហស្បតិ៍ថា កិច្ចសន្យាដែលមានស្រាប់នឹងត្រូវបញ្ឈប់ ប្រសិនបើអ្នកទិញមិនធ្វើតាម ប៉ុន្តែតាមការអនុវត្តជាក់ស្តែង អ្នកទិញនៅតែអាចបង់ប្រាក់ជារូបិយប័ណ្ណបរទេសបាន រហូតដល់មានការកំណត់បន្ថែមទៀត ។

ក្រឹត្យនេះនិយាយថា អ្នកទិញត្រូវតែបើកគណនីរូបិយប័ណ្ណបរទេស និងរូបិយបណ្ណរូបនៅធនាគារ Gazprombank របស់រុស្ស៊ី ដែលនឹងផ្ទេររូបិយប័ណ្ណបរទេសរបស់ពួកគេទៅជារូបិយបណ្ណរូបដើម្បីធ្វើការទិញ ។

គួរបញ្ជាក់ថា ការចុះហត្ថលេខាលើក្រឹត្យនេះត្រូវបានគេជឿថាជាការប៉ុនប៉ងដើម្បីជួយសង្គ្រោះប្រាក់រូបល ខណៈតម្លៃរូបិយប័ណ្ណមួយនេះបាននឹងកំពុងធ្លាក់ចុះ ដោយសារតែការដាក់ទណ្ឌកម្មសេដ្ឋកិច្ចដ៏តឹងតែងពីប្រទេសលោកខាងលិចលើរុស្ស៊ីសម្រាប់ការលុកលុយអ៊ុយក្រែន ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ រុស្ស៊ី ព្រមានប្រទេសណាតូមួយនេះនៅឲ្យឆ្ងាយពីសង្គ្រាម អ៊ុយក្រែន